Եղանակն՝ այսօր
Հրայր Թովմասյանն առաջադրվել է ՍԴ անդամի պաշտոնում, իսկ պետաիրավական հանձնաժողովի նախագահի պաշտոնում կառաջադրվի Գևորգ Կոստանյանը. Է. Շարմազանով
ԱԺ փոխնախագահ, ՀՀԿ խոսնակ Էդուարդ Շարմազանովը ՀՀԿ ԳՄ նիստից հետո լրագրողներին տեղեկացրեց, որ հաշվի առնելով այն հանգամանքը, որ փետրվարի 12-ին Պետական-իրավական և մարդու իրավունքների պաշտպանության հարցերի մշտական հանձնաժողովի նախագահ Հրայր Թովմասյանն առաջադրվել է Սահմանադրական դատարանի անդամի պաշտոնում, վաղը նա հրաժարականի դիմում կներկայացնի հանձնաժողովի նախագահի պաշտոնից:
«Հաշվի առնելով այն հանգամանքը, որ Հրայր Թովմասյանը առաջադրվել է Սահմանադրական դատարանի անդամի պաշտոնում և այս ժամանակահատվածում ավելի արդյունավետ կլինի, որպեսզի չհամատեղվի»,-ասաց Շարմազանովը:
Ըստ նրա, կուսակցությունը որոշել է, իսկ վաղն արդեն խմբակցությունը ԱԺ պետաիրավական հանձնաժողովի պաշտոնում կառաջադրի ՀՀԿ անդամ Գևորգ Կոստանյանի թեկնածությունը:
«Կոստանյանը կարող է դրականորեն ներկայացնել այդ հանձնաժողովը, ունի մեծ փորձ Դատախազությունում, Զինվորական դատախազությունում, Արդարադատության նախարարությունում, ինչու չէ նաև օրենսդիր մարմնում»,-ասաց նա:
Էդուարդ Շարմազանովը տեղեկացրեց, որ Հրայր Թովմասյանը շարունակելու է լինել պատգամավոր և վաղը հրաժարական է տալու միայն Պետական-իրավական և մարդու իրավունքների պաշտպանության հարցերի մշտական հանձնաժողովի նախագահի պաշտոնից։
«Երբ Հրայր Թովմասյանը կընտրվի ՍԴ անդամ և այլևս պատգամավոր չի լինի, ցուցակում հաջորդը կարծեմ Տաճատ Վարդապետյանն է»,–ասաց նա։
Էդուարդ Շարմազանովը նշեց, որ ՀՀԿ կուսակցությունը քիչ առաջ ավարտված նիստում քննարկել է ներքաղաքական, արտաքին քաղաքականությանն առնչվող հարցեր: Քննարկվել են նաև ազգային փոքրամասնությունների մասին օրենքը:
Studio One