Եղանակն՝ այսօր
Եթե «Ծառուկյան» դաշինքը կողմ քվեարկի վարչապետի թեկնածուի օգտին, անբնական կլինի նրանց՝ ընդդիմության դաշտում մնալը. Վիգեն Հակոբյան
Իշխող «Հանրապետական» կուսակցության ներկայացրած վարչապետի թեկնածուի շուրջ քաղաքական կոնսենսուս ապահովելու համար հարկավոր է, որ «Ծառուկյան» խմբակցությունը կողմ քվեարկի այդ թեկնածությանը:
Tert.am-ի հետ զրույցում այս մասին ասաց քաղաքական հարցերով տեխնոլոգ Վիգեն Հակոբյանը:
Այնինչ, ըստ նրա, այս անգամ «Ծառուկյան» խմբակցությունը կարող է ազատ քվեարկել վարչապետի թեկնածությանը, որովհետև այդ ուժն ունի իր «դեմքը որպես ընդդիմություն պահպանելու խնդիր»:
««Ծառուկյան» դաշինքը նախագահի ՀՀԿ-ական թեկնածուին քվեարկեց կողմ, և դա անակնկալ չէր, որովհետև բոլորը հասկանում են, որ նրանք պայմանական ընդդիմություն են: Արմեն Սարգսյանը, սակայն, ՀՀԿ անդամ չէ, և նրա թեկնածությանը կողմ քվեարկելն ու վարչապետի թեկնածությանը կողմ քվեարկելը միանգամայն տարբեր կերպ կընդունվի, հատկապես, եթե վարչապետի թեկնածուն լինի Սերժ Սարգսյանը»,- նշեց Վիգեն Հակոբյանը:
Քաղտեխնոլոգը նշեց, որ «Ծառուկյան» դաշինքը վարչապետի թեկնածուի հարցում ազատ քվեարկություն կհայտարարի: «Նրանք կփորձեն պահպանել իրենց դեմքը: Նախագահի թեկնածուի շուրջ միահամուռ աջակցությունը միանշանակ չընկալվեց հանրության կողմից, վարչապետի թեկնածուի շուրջ աջակցությունն էլ նրանց դուրս կմղի ընդդիմության դաշտից: Մի բան է, երբ քվեարկում ես նեյտրալ ընկալվող Արմեն Սարգսյանին, մեկ այլ բան՝ վարչապետին, հատկապես, կրկնում եմ, եթե վարչապետի թեկնածու լինի Սերժ Սարգսյանը»,- ասաց Վիգեն Հակոբյանը՝ նշելով, որ «Ծառուկյան» դաշինքի այս կեցվածքից դժգոհ է հատկապես հանրության այն շերտը, որը ձայն է տվել նրանց որպես այլընտրանք՝ ՀՀԿ-ՀՅԴ կոալիցիային:
Քաղտեխնոլոգի խոսքով՝ եթե «Ծառուկյան» դաշինքն ուզում է մնալ որպես հռչակված ընդդիմություն, պետք է դեմ քվեարկի վարչապետի թեկնածուին, կամ էլ հայտարարի ազատ քվեարկություն, որ պատգամավորներն իրենց խղճի մտոք քվեարկեն:
«Նրանք պետք է փորձեն պահպանել խաղի կանոնները: Այն, ինչ արեցին նախագահի թեկնածուի հարցում, դա բնական չէր, քաղաքական ընդդիմադիր ուժը չի կարող սատարել նախագահի թեկնածուին: Եթե կողմ քվեարկեն վարչապետի թեկնածուի օգտին, իրենց մնում է միանալ իշխանական կոալիցիային: Անգամ նախագահի թեկնածուի օգտին քվեարկելուց հետո իրենք ապացուցեցին, որ այլընտրանք չեն տեսնում, տրամաբանական է, որ պետք է մտնեն իշխանության մեջ: Եթե վարչապետի օգտին էլ քվեարկեն, անբնական կլինի ընդդիմության դաշտում մնալը»,- շեշտեց Վիգեն Հակոբյանը:
Studio One