Նիկոլ Փաշինյանը իշխանությունների հետ երկխոսության 4 պայման ներկայացրեց (տեսանյութեր, լուսանկարներ, թարմացվում է)

09:45 • 20.04.18



00։10

Հանրապետության հրապարակում քիչ առաջ ավարտվեց ընդդեմ Սերժ Սարգսյանի վարչապետության անցկացվող երթը:

Պատգամավոր Նիկոլ Փաշինյանի գլխավորությամբ քաղաքացիներն անցել են Մաշտոցի պողոտայով, Սայաթ Նովա և Աբովյան փողոցներով, ապա վերադարձել են Հանրապետության հրապարակ, որտեղ մինչ այդ տեղի ունեցավ հանրահավաք:

Պատգամավորը ևս մեկ անգամ հիշեցրել է, որ վաղը առավոտյան 11:00-ից Նոր Նորքի 7-րդ զանգվածից սկսվում է երթ:


22։55

Հանրապետության հրարակում անցկացված հանրահավաքից հետո ընդդեմ Սերժ Սարգսյանի վարչապետության դեմ պայքարող շարժումը պատրաստվում է երթ անցկացնել:

Մինչ այդ ելույթ ունեցավ, ողջւյնի խոսքով հանդես եկավ դերասանուհի Լալա Մնացականյանը: Նա նշեց, որ 30 տարի առաջ իրենք էին պայքար սկսել, այսօր էլ՝ երիտասարդները:

«Նայելով ձեզ, ես հասկանում եմ, որ մենք մեր կյանքն իզուր չենք ապրել»,- ասաց Լալա Մնացականյանը:

Պատգամավոր Նիկոլ Փաշինյանի գլխավորությամբ հազարավոր քաղաքացիներ սկսեցին մայրաքաղաքի կենտրոնական փողոցներով երթ իրականացնել:


22։50

Քաղաքացիական անհնազանդության վաղվա բոլոր գործողությունները սկսվում են 11:00-ից:

Այս մասին Հանրապետության հրապարակից հայտարարեց պատգամավոր Նիկոլ Փաշինյանը: Երթը՝ նրա գլխավորությամբ, կմեկնարկի Նոր նորքի 7-րդ զանգվածից:

«Բոլոր ինքնաբուխ ակցիաները շարունակվում են՝ ավելի լայն թափով: Արեք նույն գործողությունները»,- դիմելով քաղաքացիներին կոչ արեց Նիկոլ Փաշինյանը:



22։27

Մեր խնդիրը ներհայաստանյան թշնամության էջը փակելն է: Այս մասին Հանրապետության հրապարակում հայտարարեց պատգամավոր Նիկոլ Փաշինյանը:

«Որևէ մեկը թող չմտածի, թե կարող է անպատիժ հարձակումներ գործել Հայաստանի ազատ ու անկախ քաղաքացու նկատմամբ»,- ասաց պատգամավորը:

Նիկոլ Փաշինյանը ավելացրեց. «Ես օդում բառեր ասող չեմ, ինձ լավ եք ճանաչում»:

Ըստ նրա՝ երկրի ապագայով չեն կարող ավելի մտահոգ լինել, քան մայրերը, քույրերը դուստրերը: «Խոնարհվում եմ բոլորիդ առաջ»,- ասաց Ն. Փաշինյանը:

Նա պատմեց, որ ավտոմեքենաների ձայնային ազդանշաններ տալու ակցիայի ժամանակ ինքը ականատես է եղել մի դրվագի, երբ ավտոմեքենայի վարորդը ազդանշան չի արել, բայց հետևի նստատեղից հղի կինն է ձեռքը առաջ տարել ու ազդանշան տվել:

 

 


21։50


Ի՞նչ երկխոսություն, ուշ է: Դիմելով Հայաստանի իշխանություններին հայտարարեց պատգամավոր Նիկոլ Փաշինյանը: «Поезд ушел»,- նշեց Փաշինյանը: Բայց սա, պատգամավորի խոսքով, չի նշանակում, թե իրենք պատրաստ չեն որևէ քննարկում ունենալ:

«Մենք պատրաստ ենք քննարկել Սերժ Սարգսյանի հրաժարականի ժամկետներն ու դրա հետ կապված որոշ պայմաններ: Ես պատրաստ եմ ասել, կարծում եմ, կհամաձայնեք դրա հետ, որ մենք ընդհանրապես վրեժխնդրություններ չենք ուզում»,– ասաց նա՝ ավելացնելով, որ եթե Սերժ Սարգսյանը օր առաջ հրաժարական տա, ապա դա միայն ու միայն օգուտ կբերի նրան ու Հայաստանի Հանրապետությանը: 

«Ես ուզում եմ խոսել նաև այն մասին, թե կոնկրետ ինչպես ենք մենք պատկերացնում հետագա քաղաքական զարգացումները՝

1. Սերժ Սարգսյանը հրաժարական է տալիս վարչապետի պաշտոնից

2. Ազգային ժողովը վարչապետ է ընտրում ժողովրդի թեկնածուին

3. Ձևավորվում է ժամանակավոր կառավարություն

4. Հայաստանի օրենսդրությամբ վարչապետ նշանակվելուց 20 օր հետո ԱԺ-ն պետք է հավանություն տա կառավարության ծրագրին:

Երբ ձևավորվի ժամանակավոր կառավարություն քաղաքական պայմանավորվածության համաձայն Ազգային ժողովը չի ընդունում կառավարության ծրագիրը, ինչից հետո իրավունքի ուժով տեղի են ունենում արտահերթ խորհրդարանական ընտրություններ»,- մանրամասնեց Ն. Փաշինյանը:

Պատգամավորն ասաց, որ այս ծրագրի կետերն իրենք պատրաստ են քննարկել ՀՀԿ ներկայացուցիչների հետ, որպեսզի ապահովեն իշխանության անցնցում փոխանցումը ժողովրդին: «Բայց այստեղ կա մի կարևոր նախապայման, որ տեղի ունենալիք արտահերթ խորհրդարանական ընտրությունների արդյունքները որևէ մեկի կողմից կասկածելի պիտի չլինեն, դա պետք է լինի 100 տոկոսով մաքուր ու ազատ ընտրություն,- ասաց Նիկոլ Փաշինյանը:

 

21։41


Իշխանությունը պատկանում է Հայաստանի ժողովրդին: Այս մասին Հանրապետության հրապարակում հայտարարեց պատգամավոր Նիկոլ Փաշինյանը:

Նա մեջբերեց ՌԴ ԱԳ նախարարի մամուլի խոսնակ Մարիա Զախարովայի հայտարարությունը, որ իրենք վստահ են, որ «Հայաստանում ստեղծված իրավիճակը կկարգավորի ժողովրդավարական ճանապարհով, իրավական դաշտում»:

«Սա չափազանց կարևոր հայտարարություն է: Սերժ Սարգսյանը կորցնում է նաև Ռուսաստանի աջակցությունը»,– ասաց Նիկոլ Փաշինյանը՝ ավելացնելով, որ այս պայմաններում ծիծաղելի է, որ Սերժ Սարգսյանի իշխանությունը երկխոսության կոչ է անում: «Իշխանությունն այլևս անվերադարձ պատկանում է Հայաստանի ժողովրդին»,- ասաց Նիկոլ Փաշինյանը:





21։37 


Նիկոլ Փաշինյանը շարունակելով իր ելույթը նշեց, որ երեկ և այսօր Սերժ Սարգսյանի հրաժարականի պահանջով ցույցեր են տեղի ունեցել տարբեր երկրներում:

Հատուկ նամակով իր անվերապահ շարժմանն աջակցությունն է ցուցաբերել հանրաճանաչ ֆուտբոլիստներ Յուրա Մովսիսյանը, Ռոբերտ Արզումանյանը, Լևոն Պաչաջյանը, ինչպես նաև դերասաններ Հրանտ Թոխատյանը, Սարգիս Գրիգորյանը, Արման Նշանյանը, Սոս Ջանիբեկյանը, օպերային երգչուհի Հասմիկ Պապյանը, երգիչ Սարգիս Մանուկյանը,  դերասան Հովհաննես Ազոյանը, Հայկ Մարությանը, Ալինա Մարտիրոսյանը, Ջուլիետա Ստեփանյանը, Սերգեյ Դանիելյանը, Սարգիս Հակոբյանը և այլք: 

Այնուհետև Նիկոլ Փաշինյանը լսելով հանրության կոչը նշեց.«Հենրի՛խ Մխիթարյան, նայի՛ր, թե ինչ է կատարվում Երևանում»:

Նիկոլ Փաշինյանը նաև ասաց, որ մեղմ է ասված, թե Փարաքյարը փակվել է: «Պարզվում է՝  Փարաքյարում ճանապարհի վրա 800 հոգանոց քեֆ է, մեր հաղթանակն են նշում»,-ասաց նա:


21։23


Հայաստանում Սերժ Սարգսյանի իշխանությունն անցյալ է, նա չի տիրապետում Հայաստանում տիրող իրավիճակին, նրա իշխանությունը մահացած է: Այս մասին Հանրապետության հրապարակում մեկնարկած հանրահավաքի ժամանակ հայտարարեց շարժման առաջնորդ, պատգամավոր Նիկոլ Փաշինյանը:

«Էսօր էս ի՞նչ արեցիք: Այսօր հրապարակը այսօր ավելի լեփ-լեցուն է»,- ասաց Ն. Փաշինյանը: Նա նշեց, որ իր կարծիքով ամբողջ աշխարհն է տեսնում, որ տեղի է ունենում ժողովրդական, ոչ բռնի թավշյա հեղափոխություն, որը շատ շուտով հաղթելու է: 

Պատգամավորը նշեց, որ իշխանության ներկայացուցիչները խոսում են իրենց հետ երկխոսություն սկսելու իրենց պատրաստակամության մասին:

Խոսելով այսօր Երևանում իրենց իրականացրած գործողությունների մասին՝ Նիկոլ Փաշինյանն ասաց. «Երեկ մենք կոչով հանդես եկանք և այսօր փողոցներ փակելու գործողությունները կրում էին զանգվածային բնույթ: Փակ են եղել 15-րդ թաղամասի հրապարակը, նրանից դուրս եկող փողոցները, Դավթաշենի կամուրջը, Կոմիտաս-Վաղարշյան խաչմերուկը, Կոմիտաս-Տիգրանյան, Կոմիտաս-Գլյուլբենկյան խաչմերուկները, Հալաբյան փողոցը, Հաղթանակ, Կիևյան կամուրջները և այլն»:

 


20:56


Երկիրը կարգի է պետք բերել: Հանրահավաքի ժամանակ հայտարարեց Գյումրու Ասպարեզ ակումբի նախագահ Լևոն Բարսեղյանը: Նա նշեց, որ իրենք անպայման հաղթելու են:

«Առավոտյան գալիս էի Երևան, իմ ճանապարհը փակեցին: Փակել են միշտ ոստիկանները: Մի քիչ ուշադիր նայեցի, տեսա, որ ավտոներից մեկն է փակել ճանապարհը: Հասկացաք, թե վարորդը ով էր: Հետո իմացա, որ վարորդին բռնել են: Հարցնում էին՝ ի՞նչ եղավ Հայկը: Ասում եմ՝ ոստիկանները թող մտածեն, թե ոնց են պրծնելու ձեռից»,- ասաց նա:

Լևոն Բարսեղյանի խոսքով՝ դպրոցի որոշ տնօրեններ «կրծքով պաշտպանել են Սերժ Սարգսյանի փակցված լուսանկարը»: «Հերթով անցնելու ենք այդ դպրոցներով, հանելու ենք բոլորի նկարները»,- նշեց Լևոն Բարսեղյանը: 

Ինչ վերաբերում է ցուցարարների կեցվածքին, ապա Լևոն Բարսեղյանն ասաց. «Արդեն ամոթ է ոստիկանատանը չլինել, խայտառակություն է չլինել: Չվախենա՛ք: Մի՛ հրեք, մի՛ խփեք ոստիկանին, բայց հեշտությամբ մի՛ տրվեք, որ տանեն: Դուք իրավունք ունեք ոստիկանության բաժնում ներկայանալ ու չներկայանալ: Կուզեք՝ կխոսեք, չեք ուզի, չեք խոսի: Կարող եք չխոսել 2 ժամ 50 րոպե: Վերջին 10 րոպեին կարող եք ասել, որ փաստաբան եք ուզում»:

 


20:45

«Քաղաքացիական պայմանագիր» կուսակցության անդամ, Երևանի ավագանու անդամ  Զարուհին Բաթոյանը հարթակից հայտարարեց, թե երեկ Երևանի ավագանու ՀՀԿ անդամներից մեկը գրառում էր արել, թե «փողոցներում թրև եկողներին չհերոսացնեք»: «Ես պատասխանեցի, որ սա մեր քաղաքն է, մեր երկիրն է, մենք պայքարում ենք մեր արժանապատիվ կյանքի համար՝ ինչպես ուզում ենք, որտեղ ուզում ենք և ոնց կարողանում ենք»,-ասաց նա:

Ըստ նրա, ՀՀ-ում բոլոր ոլորտներում անարդարությունը կա, խնդիրները խորացրել են: «Չկա արդարություն, չկա մատչելի արդարադատություն, սոցիալական ոլորտի մասին խոսելն ավելորդ է»,- ասաց նա և նշեց, թե իրենց չի հետաքրքրում իշխանության հրապարակած սուտ թվերը:

Նա նշեց, որ իշխանությունները բավական թվով հաշմանդամների կարգ չեն տվել. «Խնայողություն են արել հաշմանդամություն ունեցողների հաշվին»:

Զարուհին Բաթոյանը նաև նշեց, թե իրենց ասում են եկեք երկխոսության, եկեք խոսենք: «Հարգելի՛ իշխանություն, այս հարցերի մասին չե՞նք խոսել»,-հարցրեց նա և նշեց, որ դրանք ձևական բնույթ են կրում: 

Նա նաև ասաց, որ այս երկրում քաղաքացին պետք է հավասար իրավունքներ ունենա, չպետք է լինեն արտոնյալներ ու երկրորդ կարգի քաղաքացիներ, մարդը պետք է բարձրագույն արժեք լինի:



20:34


Հայաստանում գաղջ մթնոլորտը ցրված է. Հանրապետության հրապարակում հայտարարեց շարժման անդամ քաղաքագետ Արմեն Գրիգորյանը և նշեց, որ դրա պատճառը լրագրողները չեն:

«Ժողովրդավարության այս գործընթացը հաղթանակ է գրանցել Հայաստանում, և դրա ապացույցն է այս հրապարակն է: Չկա որևէ պետական կամ ոստիկանական ուժ, որ կարող է հաղթել այս կազմակերպված շարժմանը: Ես ուզում եմ կոչ անել, որ շարունակենք մեր պայքարը»,-ասաց նա։ 

Արմեն Գրիգորյանը նաև նշեց, որ իշխանություններն արդեն գնում են զիջումների, քանի որ Սերժ Սարգսյանը հրաժարվել է իրեն նվիրաբերված տան սեփականության իրավունքից, իսկ այսօր առաջարկում են հարկերը իջեցնել, իսկ հետագայում թոշակներ բարձրացնել։


20։21


Հանրահավաքին ելույթ ունեցան նաև դերասանուհիներ Ալինա Մարտիրոսյանը Ջուլիետա Ստեփանյանը: Ալինա Մարտիրոսյանը կոչ արեց շոու-բիզնեսի ներկայացուցիչներին` վեր կենալ և գալ ժողովրդի կողքին կանգնել: «Դեն նետեք ձեր մեդալները, դրանցով չեք սիրվելու, ժողովրդի սերը պետք է վայելեք, ոչ թե մեդալները կախեք և նստեք տանը: Սա ձեզ համար սերիալ չի՝ նստում նայում եք»,- ասաց նա և նշեց, որ շատ հուզված է: Նա նաև հայտնեց, որ ցանկանում է տեսնել վարչապետ միայն Նիկոլ Փաշինյանին:

Ջուլիետա Ստեփանյանն ասաց, որ հայ ազգն այսքան ազնիվ, անաղարտ միասնական եղել է այսօր և կլինի վաղը: «Ես այսօր առավելևս հպարտ եմ, որ հայ եմ, որ այս ազգի մի փոքր մասնիկն եմ»,-ասաց նա:

Դերասանուհին ասաց, որ երջանիկ է, որ ունեն այսպիսի «տղամարդ» երիտասարդություն: «Ինձ համար այս երիտասարդությունն այն սերմն է, որ ժայռի վրա էլ գցես պտղատու ծառ կաճի, միշտ մնացեք այդպես քաջ: Ես կուզեմ որպես մայր, որպես տատ բացեմ սիրտս ու բոլորիդ առնեմ սրտիս մեջ»,-ասաց նա:



20։04


Հանրապետության հրապարակում ելույթի խոսք ասաց Լոս Անջելեսից Հայաստան ժամանած Մուշեղ Մուրադյանը, ով նշեց, որ հատուկ եկել է մասնակցելու այս «համաժողովրդական աննախադեպ զարթոնքին»:

«Մենք եկել ենք այսօր օգնենք, որպեսզի կարոտը, տագնապը, անհանգստությունը վերածվեն լույսի, հույսի, հավատի»,- ասաց նա՝ հայտարարելով, թե հրաշք կա հավատացողի համար:

Ըստ նրա, հարյուր հազարավոր հայեր հայրենիքից հեռացել են, քանի որ հասկացել են, որ «արժանապատիվ ապրելու համար ապրելն այլևս արտաքին թշնամու հետ չէ, այլ սեփական հայրենիքում, սեփական հայրենակցի հետ»,- ասաց նա և ավելացրեց, որ շարժումը նրա համար է, որ կռվենք բաց ձեռքերով՝ վերագտնելու 10 տարի առաջ կորցրած գարունը:





19։48


Ժողովուրդը ոտքի է ելել՝ վերադարձնելու ուզուրպացված իշխանությունը: Այս մասին Հանրապետության հրապարակում մեկնարկած հանրահավաքի ժամանակ հայտարարեց պատգամավոր Արարատ Միրզոյանը: 

«Տոտալ մասնակցություն ու աջակցություն ունի ՀՀ քաղաքացիների կողմից: Շարժման աշխարհագրությունն ընդգրկում է ողջ Հայաստանը՝ Աշոցքից մինչև Մեղրի: ՀՀ տասնյակ բնակավայրերում տեղի են ունենում անհնազանդության ակցիաներ, մեր շարժումն ընդգրկում է դպրոցներ, բուհեր, հիմնարկներ, կոլեկտիվներ: Դպրոցներում անգամ այս վերջին օրը որոշ տնօրեններ են հանում Սերժ Սարգսյանի փակցրած նկարը՝ ասելով, որ մեկ է երեխաներն են հանում»,- ասաց Արարատ Միրզոյանը: 

Պատգամավորը նշեց, որ ոստիկանական ջոկատներ են ուղարկվում դպրոցներ, որ դասադուլ տեղի չունենա, բայց չի հաջողվում:

Ինչ վերաբերում է բուհերին, Ա. Միրզոյանն ասաց, որ դասի չեն մասնակցել հազարավոր ուսանողներ, բուհերը դատարկ են մնացել, շենքերում եմ միայն ուսխորհրդի նախագահները:

Պատգամավորը նշեց, որ իրեն մի բարձրաստիճան պաշտոնյա ասել է, թե բոլորն են շարժման հետ, միայն թե «մի քիչ էլ կանգնեք»: Ըստ նրա՝ իրենց հետ է նաև Սփյուռքը: 

Միրզոյանը նշեց նաև, որ իրենց հասած լուրերով մարդիկ հրաժարվում են ՀՀԿ անդամակցությունից, նա տեղեկացրեց, որ հրապարակում տեղադրելու են աղբարկղ, թող մարդիկ բերեն ու շպրտեն անդամատոմսերն այդտեղ:

Ինչ վերաբերում է ՀՀԿ-ից հնչած մտքերին՝ երկխոսության առաջարկի մասին, Արարատ Միրզոյանն ասաց. «Մենք պատրաստ ենք նրանց հետ բանակցել մի թեմայով՝ Սերժ Սարգսյանի ու ՀՀԿ կապիտուլիացիայի: Վախենում էի, իմ սիրտը քցում էր էդ բառից, բայց հիմա ասում եմ՝ «հաղթանակ»»:






19:05


Այս պահին ցուցարարները հավաքվում են Հանրապետության հրապարակում, որտեղ քիչ անց պետք է մեկնարկի հանրահավաքը։ 


18:51

Ընդդեմ Սերժ Սարգսյանի վարչապետության պայքար մղող «Քայլ արա» նախաձեռնությունը չի բացառում, որ նախատեսելու է ակցիաներ իրականացնել նաև ապրիլի 24-ին: Լրագրողների հետ զրույցում այս մասին ասաց պատգամավոր Նիկոլ Փաշինյանը:

«Տեսնենք, թե ինչ իրավիճակ կլինի ամսի 23-ին: Բայց պարզ է, որ նախատեսում ենք, պարզ է, որ ՀՀ ցանկացած քաղաքացի ապրիլի 24-ին նախատեսում է առնվազն այց Ծիծեռնակաբերդ»,- ասաց Ն. Փաշինյանը՝ նշելով, որ մարդիկ ինքնաբուխ շատ հաճախ ծրագրում են գործողություններ և իրեն ասում, որ իշխանափոխության օր պետք է նշանակել ապրիլի 24-ը:

«Եթե ժողովուրդը ուզում է, որ այդպես լինի, պետք է ենթադրել, որ կարող է նաև այդպես լինել: Եթե Սերժ Սարգսյանն այդ օրը լինելու է Ծիծեռնակաբերդում, ես ենթադրում եմ, որ մարդիկ ուզում են առերես հանդիպել նրա հետ: Կքննարկենք այս տարբերակը և եթե այն աջակցություն ունենա, կքննարկենք դա»,- շեշտեց Նիկոլ Փաշինյանը:



18:38


Մաշտոց-Ամիրյան խաչմերուկում իրավիճակը շարունակում է լարված մնալ: Քաղաքացիները պարբերաբար փակում են փողոցը: Կարմիր «բերետավորները» տարածքից չեն հեռանում, նրանց թիվը ավելանում է, բայց իրավիճակը շտկել չի հաջողվում: Մինչ ոստիկանները բացում են Մաշտոցը, ակտիվիստները փակում են Ամիրյանը: Պարբերաբար հրմշտոց ու վեճ է սկսվում ոստիկանների ու քաղաքացիների միջև: Կարմիր «բերետավորները» լքեցին տարածքը:



18:15

Մաշտոց-Ամիրյան խաչմերուկում բավական լարված իրավիճակ է: Ակտիվիստները մի քանի րոպեով դադարեցրել էին երթևեկությունը, մեքենաները ազդանշան էին տալիս՝ ի աջակցություն շարժման:  

Ոստիկանական մեծ խմբի ժամանումից հետո նրանք մայթի երկայնքով շղթա կազմեցին՝ թույլ չտալով, որ քաղաքացիները առաջ գնան: Ոստիկանները հրեցին քաղաքացիներին, մի քանի հոգու բերման ենթարկեցին: Անցորդները պարբերաբար փորձում են միջնորդել, որ ոստիկանները չտանեն քաղաքացիներին, բայց նրանց չի հաջողվում:

«Մենք ձեզ համար ենք անում, ձեր ապագայի համար ենք անում, դուք հայ եք, մի վարվեք ձեր երեխաների, մայրերի հետ այդպես, ազգությունը հագուստով չի որոշվում, մի արեք»,- դիմելով ոստիկաններին` ասաց քաղաքացիներից մեկը:











17։34

ԱԺ «Ելք» խմբակցության պատգամավոր Արարատ Միրզոյանն իր Facebook-ի էջում կոչ է անում քաղաքացիներին բացել փողոցները:

Նա մասնավորապես գրել է. «Խնդրում ենք սկսել բացել բոլոր փողոցները, որ մարդիկ կարողանան գալ հրապարակ՝ հանրահավաքի»։

17։08

Նիկոլ Փաշինյանը ցուցարարների հետ անցավ քաղաքապետարանի կողքով, որի մուտքի մոտ ոստիկաններ էին կուտակված: Ցուցարարները ողջունեցին ոստիկաններին և շարունակեցին երթը:

Նիկոլ Փաշինյանը ցուցարարներին կոչ արեց մտնել Կոմայգի և հանգստանալ:

16։53

Արդեն մոտ կես ժամ է՝ ցուցարարները փակել են Վաղարշյան փողոցը։ Վաղարշյան 12 հասցեի մոտ ցուցարարները փակել են ճանապարհը, սակայն բաց են թողել հարակից խաչմերուկները՝ Ավետ Ավետիսյան և Սունդուկյան փողոցների խաչմերուկները։

Ցույցին մասնակցում են նաև երեխաներ։ Երթևեկությունը կարգավորող ՃՈ աշխատակիցներ այս պահին չկան։ 





16:30 

Չաուշի հրապարակում այս պահին լարված իրավիճակ է։ Քաղաքացիները փակել են հրապարակի մի մասը: Ցուցարարներից մեկը պատմեց, որ արդեն մեկ ժամ կլինի այս հատվածի ճանապարհը փակել են: Այստեղ կան նաև ոստիկաններ: 

Կոմիտասի փողոցում ևս ցուցարարները փակել են ճանապարհը և կանգնեցրել երթևեկությունը: Խցանման մեջ հայտնված մեքենաները միացրել են ձայնային ազդանշանները:

16:28 

Մեր գործողությունների թափը, ծավալը կրկնապատկվել է հանրապետության ողջ տարածքով: Այս մասին Azatutyun.am-ի հետ զրույցում ասաց Նիկոլ Փաշինյանը և շեշտեց, որ իրենք շարունակում են նույն քաղաքական գծի մեջ մնալ, և իրենց գործողություններում բացառվելու է բռնությունը:

«Եթե նույնիսկ ոստիկանները բռնություն են կիրառելու մեր կողմնակիցների նկատմամբ, մենք բռնությամբ չենք պատասխանելու: Մենք ունենք մեր հանրության 80 տոկոսի աջակցությունը, և Սերժ Սարգսյանը պետք է հեռանա, երկրորդ կարծիք լինել չի կարող»,-ասաց նա և բերման ենթարկվածների թվի աճը պայմանավորեց ցույցի մասնակիցների թվի աճով:

«Հայաստանի քաղաքացին ազատագրված է, և նրան հնարավոր չէ կանգնեցնել»,-հայտարարեց նա: Նշենք, որ այս պահին Նիկոլ Փաշինյանը ցուցարարների հետ անցնում է Իսակովի պողոտայով:







16:27

Ցուցարարների մի մասը քայլերթ է իրականացնում Մաշտոցի պողոտայով: Քայլերթի հատվածում երթևեկությունը դադարեցվել է: Ցուցարարները կոչ են անում քաղաքացիներին՝ միանալ իրենց: 

Բողոքի ակցիա է նաև Աշտարակի խճուղում: Ցուցարարները քարերով փակել էին Աշտարակից Երևան տանող ճանապարհը: Այս պահին ճանապարհը մասամբ բաց է: 

15։48

Երևանի տարբեր հատվածներում բողոքի ակցիաները շարունակվում են:  Հանրապետության հրապարակի տարածքում երթի մասնակիցները քայլելով հասան Սախարովի հրապարակ և փակեցին Նալբանդյան փողոցը: Որոշ ժամանակ անց երթի մասնակիցները շարունակեցին երթը Նալբանդյան փողոցով և հասել են Չարեցի փողոց՝ Ոստիկանության գլխավոր մասնաշենքի մետ։  

Նշենք, որ Կառավարության շենքը շարունակվում է շրջափակված մնալ ոստիկանության ծառայողների կողմից, սակայն այդ հատվածում նրանց թիվը զգալիորեն նվազել է:






15:18

Երթևեկության մասնակիցների համար խոչընդոտ ստեղծող կամ կայանումն արգելված տեղերում կանգնած տրանսպորտային միջոցները տեղափոխվում են հատուկ տարածք, եթե վարորդը տեղում չէ կամ հրաժարվում է վերացնել խոչընդոտը կամ կայանման կանոնների խախտումը:

Այս մասին Facebook-ի իր էջում գրել է ՀՀ ոստիկանության հասարակայնության հետ կապի և լրատվության վարչության պետ Աշոտ Ահարոնյանը՝ մեջբերելով «Ճանապարհային երթևեկության անվտանգության ապահովման մասին ՀՀ օրենքի» համապատասխան հոդվածը։

Նշենք, որ Երևանում ընթացող ցույցերը և երթերն ուղեկցվում են քաղաքացիների կողմից ավտոմեքենաներով ճանապարհները փակելու ակցիաներով։




15:04
 
Արշակունյաց պողոտայում մեքենաների վարորդները փակել են ճանապարհը:

Մեքենաներից մեկի վարորդը հորիզոնական դիրքով կանգնել է և չի իջնում մեքենայից: Ճանապարհային ոստիկանության ծառայողները երկու քարշակ են  հրավիրել, սակայն վարորդը մեքենայից չի իջնում:

Իրավապաշտպան Դանիել Իոաննիսյանը, դիմելով ՃՈ աշխատակցին, ասաց, որ օրենքը թույլ չի տալիս քարշակել մեքենան, եթե ներսում մարդ կա: ՃՈ աշխատակիցը հորդորեց հարցերն ուղղել ոստիկանության լրատվական վարչություն:

Մեքենան քարշակը հեռացրեց, վարորդը հրաժարվեց իջնել մեքենայից և մնաց մեքենայում:

Մինչ տեղափոխում էին երկրորդ մեքենան, այլ մեքենաներ եկան և կանգնեցին ճանապարհի երթևեկելի մասում:

Ոստիկանները մտան մեքենայի մեջ և վարորդին բռնի ուժով հանեցին մեքենայից:

Մինչ նրան տեղափոխում էին և ուժով փորձում խցկել մեքենան, նրա ինքնազգացողությունը վատացավ:

Ոստիկանները պառկեցրին նրան ասֆալտին, ինչից հետո խցկեցին մեքենան և տարան:



14։43

Մալաթիայում ցուցարարներին էին միանում քաղաքացիները, հյուրասիրում նրանց: Նիկոլ Փաշինյանը ողջունեց Մալաթիայի տոնավաճառի աշխատողներին, որոնք հավաքվել էին ցուցարարներին դիմավորելու:

14:34

Սարյան-Մոսկովյան խաչմերուկում ցուցարարները կանգնեցրին բեռնատար և վրան փակցրին Հայաստանի դրոշը՝ համոզելով վարորդին, որ մեքենան չվարի, զանգի գործատուին և բացատրի, որ ցուցարարները թույլ չեն տալիս, որ նա անցնի:

«Այսօր ոչ ոք չի աշխատում»,- ասացին ցուցարարներից:

Մի խումբ երիտասարդներ փակել են հարակից փողոցներից մեկը: Նրանք ասացին, որ Արևելագիտության ֆակուլտետից են: Լրագրողի հետ զրույցում երիտասարդներից մեկը նշեց, որ պայքարում է ազատ, անկախ Հայաստանում ապրելու համար, որ ուսանողն արդար ստանա իր գնահատականը:

Վարորդներից մեկն էլ ասաց, որ միանում է պայքարին, քանի որ ինքն էլ հայ ժողովրդի մի մաս է:


14։22 

Ազատության պողոտայում թիվ 1 երթուղին սպասարկող վարորդներից մեկին ոստիկանության ծառայողները կանգնեցրին, իջեցրին ուղևորներին և սկսեցին քաղաքացիներին բաժին տեղափոխելու նպատակով բռնի տեղափոխել ավտոբուս: 

Մի քանի քաղաքացիներ մոտեցան վարորդին և ասացին, որ բանալիները վերցնի և դուրս գա ավտոբուսից: Արդյունքում ավտոբուսի վարորդը հրաժարվեց տեղափոխել բերման ենթարկվածներին:

Նրա ձեռքից ոստիկանները վերցրին բանալիներն ու բերման ենթարկվածներին տեղափոխեցին քաղաքային տրանսպորտով:



14:18

Մալաթիայում ցուցարարներին հյուրասիրությամբ դիմավորեցին և նշեցին, որ սա հաղթանակի, հայ ազգի համար է:







14:03

Ժամը յոթին հավաքվում ենք Հանրապետության հրապարակում, այսօր լուրջ և կարևոր խոսակցություն է լինելու իշխանափոխության մասին: Այս մասին հայտարարեց Նիկոլ Փաշինյանը` շարունակելով երթը:

Նա նաև պարբերաբար կոչ է անում ցուցարարներին հարգալից վերաբերմունք ցուցաբերել ոստիկանների նկատմամբ:




14:01

Կորյունի փողոցում քաղաքացիներից մեկը լրագրողների հետ զրույցում պատմեց, որ իր հետ ընդմիջման դուրս եկած երիտասարդին ոստիկանները բռնեցին և տարան՝ հաշվի չառնելով, որ նա ցույցի հետ ընդհանրապես կապ չուներ: 

«Մենք պարզապես դուրս էինք եկել, բռնեցին-տարան: Պարզվում է՝ վտանգավոր է փողոցում կանգնելը: Ինձ չտարան, իրեն տարան,- պատմեց նա՝ նշելով, որ կարծես թե ոստիկանները չեն էլ հարցնում, թե ում են տանում,- իրենց ոնց որ քանակ է պետք, ուզում են իրենց 50 000 դրամը վերցնեն ու բաց թողնեն»:

13:43

Azatutyun.am-ի հետ զրույցում բեռնատարի վարորդներից մեկը նշեց, հատուկ եկել է Ռուսաստանից, որպեսզի մասնակցի ցույցերին:

«Մենք ուզում ենք ձեր, մեր ջահելության կողքը լինենք»,- ասաց նա և միևնույն համարեց, թե ոստիկանությունը կանհանգստացնի իրեն, թե ոչ: Մեկ այլ բեռնատարի վարորդ էլ ասաց, որ ինքը ազգի հետ է և գործադուլ է անում:




13:38

Սխալ բան եք անում: Այս մասին ասաց Երևանի փոխոստիկանապետ Վալերի Օսիպյանը բեռնատարների վարորդներին, իսկ Նիկոլ Փաշինյանը կոչ արեց հավաքվել վարորդների շուրջը: 



13:36

Երևանի Կորյուն-Տերյան խաչմերուկից ցուցարարներ են բերման ենթարկվել:

Ցուցարարները փակել են երթևեկելի գոտին, ոստիկանությունը հորդորում էր բացել այն: Ցուցարարների թիվը գնալով ավելանում էր: Ոստիկանությունն ուժի կիրառմամբ մի քանի հոգու բերման ենթարկեց, իսկ որոշ քաղաքացիներ հասցրին մտնել «Ցիտատելի» շենք: Երթևեկությունը միակողմանի բաց է:

Միաժամանակ բողոքի երթեր են ընթանում Խանջյան փողոցում, Տիգրան Մեծի պողոտայում, Աջափնյակում, որին մասնակցում է նաև նախաձեռնության ղեկավար Նիկոլ Փաշինյանը:

Ոստիկանական ուժերն ու ցուցարարները չեն լքում նաև Ազատության պողոտան: Թումանյան-Սարյան խաչմերուկը ևս փակ է:

13:32

Նիկոլ Փաշինյանի քայլերթի ընթացքում բեռնատարներիի վարորդները, կանգնեցնելով մեքենաները, իջան և ողջունեցին Նիկոլ Փաշինյանին, ով առաջարկեց փակել ճանապարհը:

Այսպիսով, բեռնատարով փակեցին ճանապարհը և ոստիկանությանը հայտնեցին, թե մեքենան անսարք է:




13:24

«Սինոփսիս Արմենիա» ընկերության աշխատակից, Երևանի ավագանու անդամ Սերգեյ Ղահրամանյանը լրագրողի հետ զրույցում նշեց, որ դուրս են եկել փողոց, որ բռնություն չլինի:

«Այստեղ շատ քաղաքացիական հագուստով ոստիկաններ են հավաքվել, դուրս ենք եկել, որ բռնություն չլինի: Դուրս ենք եկել, որ այնպես լինի, ինչպես ժողովուրդն է ուզում»,- ասաց նա՝ նշելով, որ ոչ թե «Սինոփսիս Արմենիա» ընկերության աշխատակիցներն  են փակել փողոցը, այլ ուրիշ ընկերության աշխատակիցներ:

13:15

Ժամը 13:00-ի դրությամբ ոստիկանություն է բերվել 107 ցուցարար

Ոստիկանության տարբեր ստորաբաժանումներ են բերվել Երևան քաղաքում տեղի ունեցող ցույցերի մասնակիցներ: Ժամը 9:00-ի դրությամբ` Ոստիկանության տարբեր ստորաբաժանումներ բերվածների թիվը կազմում էր 16, այժմ՝ 107:

Tert.am-ի հետ զրույցում ՀՀ ոստիկանության լրատվական վարչության ԶԼՄ-ների հետ կապի բաժնի պետ Էդգար Ջանոյանն ասաց, որ բերված քաղաքացիների թիվը հասել է 107-ի:

«Ժամը 13:00-ի դրությամբ Ոստիկանության Երևան քաղաքի վարչության տարբեր ստորաբաժանումներ է բերվել  107 քաղաքացի»,-ասաց Ջանոյանը:


Նշենք, որ ժամը 11:00-ի դրությամբ բերման էր ենթարկվել 52 անձ, 10:30-ի դրությամբ  Ոստիկանության Երևան քաղաքի վարչության տարբեր ստորաբաժանումներ է բերվել  37 անձ: 
 
Հիշեցնենք, որ ապրիլի 13-ից Երևանում ցույցեր ու երթեր են ընթանում Սերժ Սարգսյանի վարչապետության դեմ՝ «Իմ քայլը» շարժման նախաձեռնությամբ և ԱԺ «Ելք» խմբակցության ղեկավար Նիկոլ Փաշինյանի գլխավորությամբ։

 



13:14

«Սինոփսիս Արմենիա» ընկերության աշխատակիցները փակել են Արշակունյաց փողոցի մի հատվածը:



13:08

Հալաբյան փողոցով շարժվեցին Նիկոլ Փաշինյանը և երթի մասնակիցները, թեև դեռ չի հայտարարվել հստակ, թե որ ուղղությամբ են շարժվում:



13:05

Ժողովո´ւրդ, գաղափար կա` երթը երկու մասի  բաժանելու: Այս մասին երթի մասնակիցներին ասաց Նիկոլ Փաշինյանը և առաջարկեց գնալ Մալաթիա Սեբաստիա:

«Գյուլբենկյանի անվան համար 190 ավագ դպրոցի դռները փակել են, հիմա ամբողջ դպրոցը վանկարկում է` դուռը բա'ց»,- հայտնեց Նիկոլ Փաշինյանը և կոչ արեց ծափահարել երեխաներին:

«Առայժմ Նոր Նորքն է պասիվ, ես Նոր Նորքի մեր աջակիցներին կոչ եմ անում` ամբողջ Երևանում երթ է, ցույց է, Մասիվում ոչ մի բան չկա, ոտքի' կանգնեք, ինչո՞ւ եք նստել, մասիվցինե´ր, անցե´ք գործի»,-ասաց նա և հայտնեց, որ Նոր Հաճն քաղաքում բազմամարդ երթ է անցկացվում:

Պատգամավորը հայտնեց նաև, որ այնքան շատ նամակներ է ինքը ստանում, որ չի հասցնում հետևել, ամեն վայրկյան նոր նամակ է ստանում:


12:49 

Նիկոլ Փաշինյանը և իր հետ քայլող ցուցարարները «Արմենիա ԲԿ-ի» հարակից այգում դադար են առել՝ հանգստանալու համար:

Նիկոլ Փաշինյանը հայտնեց, որ այսօր քայլել են 12 913 քայլ՝ 9 կմ:

 


12:36

Այսօր առավոտյան ոստիկանության Երևանի Կենտրոնական բաժին է բերվել «Քայլ արա» նախաձեռնության ղեկավար Նիկոլ Փաշինյանի որդին:

Tert.am-ի հետ զրույցում ՀՀ ոստիկանության հասարակայնության հետ կապի և լրատվության վարչությունից հայտնեցին, որ Նիկոլ Փաշինյանի որդին Ոստիկանության բաժնում չէ.«Փաշինյանի որդին ազատ է արձակվել»:


12:25

Նիկոլ Փաշինյանի ղեկավարած բողոքի երթը շարունակվում է: Երթի մասնակիցները Դավթաշեն համայնքից` Եղվարդի խճուղով, շարժվում են դեպի Աջափնյակ:









12:17

Այս պահին ցուցարարները Նիկոլ Փաշինյանի գլխավորությամբ շարժվում են Եղվարդի խճուղով: 



12:04

Լրագրող Տիրայր Մուրադյանը  ոստիկանության որևէ բաժին չի բերվել:

Այս մասին Tert.am-ին հայտնեցին ՀՀ ոստիկանության լրատվական վարչությունից:

«Լրագրող Տիրայր Մուրադյանը չի բերվել ոստիկանության բաժին, նա մեքենայով մի փոքր հեռացվել է նշված վայրից և իջեցվել մեքենայից: Այս պահին ոստիկանները զրուցում են նրա հետ»,- հայտնեցին ոստիկանությունից:

11:54

Առավոտյան ոստիկանության Կենտրոնականի բաժին բերված ակտիվիստ Դավիթ Սանասարյանն ազատ է արձակվել:


Ազատ արձակվելուց հետո «Ազատության» լրագրողի հետ զրույցում Դավիթ Սանասարյանն ասաց, որ իրեն բաժին են տարել ճանապարհը բացելուց հետո:

«Անցումի վրա կանգնած էինք, փողոցը փակել էինք, որից հետո ոստիկանները մոտեցան մեզ և մեր կամքին հակառակ մտցրին ոստիկանական մեքենան: Փողոցը մենք էինք բացել, ոչ թե իրենք բացեցին ու չկարողացան ասել, թե ինչու են բերում ոստիկանություն:
Բայց քանի որ իրենց խնդիրն ինձ մեկուսացնելն էր, դա արեցին»,-ասաց Սանասարյանը:


Նա շնորհակալություն հայտնեց ոստիկաններին իրեն մի քանի ժամ հանգստանալու հնարավորություն տալու համար:
 

 

 



11:40

Ոստիկանության ստորաբաժանում տարվեց նաև ցույցերի ժամանակ իր ծանոթ ոստիկան Աշոտին ցուցարարների կողմն անցնելու կոչ անող Մանվելը:


Այսօր նա Երևան-Աբովյան ճանապարհահատվածում էր. նրա մեքենան, ըստ իր ներկայացրածի, փչացել էր:


Լրագրողի հարցին, թե Աշոտի հետ հանդիպե՞լ է, Մանվելն ասաց, որ Աշոտը դեռ տուն չի եկել, ոչ էլ տնեցիք են տանը:


Հարցին, թե որ տեսնի, ի՞նչ կասի Աշոտին, Մանվելը պատասխանեց. «Աշոտին սաղ աշխարհն ասաց էլի: Իր ընտանիքը հիմա տանը չի, գյուղում է, թողել, գնացել են, երևի, որ հարևանները հարցեր չտան»:


Հարցին, թե ցույցի մասնակցում են, ասաց՝ այո, տատիկը մասնակցում էր ցույցի, իր հայրն էլ Օպերայում էր. «Իմ կոչն այնքանով բան փոխեց, որ ոստիկաններից շատերը դիմակով են կրում, որ շատերը չճանաչեն»:


Հարցին, թե որ Աշոտը վերադառնա ի՞նչ է ասելու, Մանվելն ասաց, որ դժվար թե Աշոտը վերադառնա, որովհետև իրենց տունը վաղուց վաճառում են:


Մանվելին մոտեցավ ոստիկանը ու ասաց. «Արի ստե»: Քաղաքացիական հագուստով անձինք քաղաքացիական մեքենայով տարան Մանվելին, իսկ նրա մեքենան մնաց ճանապարհին:

 



11:28

Երևան-Աբովյան ճանապարհահատվածից ոստիկանության բաժին բերվեց Տիրայր Մուրադյանը, ով երեկ բռնության էր ենթարկվել քաղաքացիական հագուստով անձանց կողմից և երեկ երեկոյան էր դուրս գրվել հիվանդանոցից: 

Ոստիկանության գնդապետը, հարված հասցնելով Տիրայրին, ով այդ պահին պատասխանում էր լրագրողների հարցերին, հրահանգավորեց ոստիկաններին, որ տեղափոխեն նրան բաժին: 

Տիրայրն իր ֆեյսբուքյան էջում գրառում է կատարել, որ իրեն տանում են անհայտ ուղղությամբ: 

Լուսանկարում լրագրողին հարված հասցրած գնդապետն է: 






11:13

Երթի մասնակիցները հասել են Դավթաշեն վարչական շրջան: Նիկոլ Փաշինյանը հայտարարեց, որ այստեղ մի փոքր կանգ կառնեն, որպեսի Դավթաշենի այն բնակիչները, ովքեր անկանում են միանալ ցույցին, հնարավորություն ունենան միանալու:

Երթի մասնակիցները նստել են Տիգրան Պետրոսյանի արձանի մոտ և 15 րոպե շարունակելու են մնալ այդտեղ:

Երթն ուղեկցվում է ոստիկանության կողմից:



11:01

Երթի մասնակիցները շարժվում են դեպի Դավթաշեն, այս պահին ցուցարարները կամրջի վերջնամասում են:

Նիկոլ Փաշինյանը ընթացքում լրագրողների հետ զրույցում ասաց, որ այսօր երեկոյան հանրահավաքի ժամին կխոսի առաջիկա անելիքների մասին:


Հարցին, թե իշխանությունը երկխոսության կոչ է անում, կարո՞ղ է երկխոսության մասին խոսք լինել, Փաշինյանն ասաց, որ Հայաստանում այլևս իշխանություն չկա.
«Սերժ Սարգսյանի իշխանությունը չկա, Հայաստանում իշխանությունն այլևս ժողովուրդն է»:


Դիտարկմանը, թե երկխոսության կոչ նախագահ Արմեն Սարգսյանն է արել, Նիկոլ Փաշինյանն ասաց. «Արմեն Սարգսյանը որևէ բան առաջարկելուց առաջ պետք է կատարի իմ առաջ ստանձնած պարտավորությունը: Նա պետք է ցույց տա տեղեկանք, թե երբ է ինքը հրաժարվել Մեծ Բրիտանիայի քաղաքացիությունից: Երբ մեկը խոսում է օրենքի գերակայությունից, ինքը պետք է նախ ապացուցի, որ չի արհամարհում օրենքը»:



10:43

Այս պահին ցուցարարները Փաշինյանի առաջնորդությամբ շարժվում են Դավթաշենի կամրջով: 






10:37 

Գյուլբենկյան փողոցում ցույցի մասնակիցներին մոտեցավ Երևանի փոխոստիկանապետ Վալերի Օսիպյանը, ով նախ հետաքրքրվեց, թե ինչպես է Նիկոլ Փաշինյանը, արդյոք վիրակապը փոխե՞լ են, թե՞ ոչ: Նիկոլ Փաշինյանն էլ կատակեց, որ արդեն կարոտում են իրար:

Հարցին, թե ինչ է ծրագրում Փաշինյանը, վերջինս պատասխանեց. «Ճիշտն ասած՝ «թավշյա հեղափոխություն» ենք ծրագրում»:

Օսիպյանն ասաց, որ օրենքով նախատեսված է ոստիկանությանը հայտնել երթի մասին, և ոստիկանությունը պարտավոր է ապահովել խաղաղ երթի ընթացքը:

Փաշինյանն ասաց, որ խորհրդակցելու է ցույցի մասնակիցների հետ և որոշում կայացվեց Գյուլբենկյան փողոցից քայլել դեպի Դավթաշեն:
Գյուլբենկյան փողոցից սկսվեց երթը դեպի Դավթաշեն:

«Դանդաղ երթով առաջ ենք շարժվում»,- ասաց Փաշինյանը: Երթի մասնակիցները հասել են Կոմիտաս:



10:30

Tert.am-ը ոստիկանության լրատվական վարչությունից փորձեց ճշտել, թե քանի փողոց է փակ Երևանում այս պահի դրությամբ:

Ոստիկանության ԶԼՄ-ների հետ կապի բաժնի պետ Էդգար Ջանոյանն ասաց, որ այս պահի դրությամբ Երևանում փակ փողոցներ չկան:

«Երևանում բոլոր փողոցները բաց են, երթևեկությունը կարգավորվում է Ճանապարհային ոստիկանության ծառայողների կողմից»,- ասաց նա:

Դիտարկմանը, թե ցուցարարները կայանել են իրենց մեքենաները փողոցների երթևեկելի մասում, Ջանոյանն ասաց, որ փորձ արվել է փակել փողոցները, սակայն կարճ ժամանակ անց երթևեկությունը կարգավորվել է:

10:24

Ոստիկանությունը տեղեկացրել է, որ բերվածների թիվը ժամը 10-ի դրությամբ 26 է: 



10:13

Ցուցարարները քայլում են Գյուլբենկյան փողոցով. նրանց հետո է Նիկոլ Փաշինյանը: 





10:07

Գյուլբենկյան փողոցում գտնվող Նիկոլ Փաշինյանը կոչ արեց վարորդներին կայանել մեքենաներն ու փակել փողոցը:

Նրան մոտեցավ ոստիկանության գնդապետն ու ասաց. «Ես խնդրում եմ՝ այն մեքենաները,  որոնք հորդորել եք, որ փակեն ճանապարհը, հիմա հորդորեք, որ բացեն ճանապարհը»:

Ի պատասխան՝ Փաշինյանն ասաց. «Բայց ես արդեն հորդորեցի «պրծա», պարո՛ն գնդապետ: Գոնե Դուք իմ ձայնը խնայե՛ք»:

Փաշինյանն ասաց, որ այս մարդիկ իրենց բողոքն են հայտնում, և այդ բողոքը կապված է Սերժ Սարգսյանի և նրա գործողությունների հետ, իսկ լարվածությունն առաջ է գալիս, երբ ոստիկանությունը հանդես է գալիս որպես իշխանության ներկայացուցիչ:

«Մարդիկ ձեզ սկսում են նույնացնել կոռումպացված, փտած համակարգի հետ: Որ պահին դուք հայտարարեք, որ դուք այդ իշխանության ներկայացուցիչը չեք , այդ կոռումպացված համակարգի ու Սերժ Սարգսյանի ներկայացուցիչը չեք, այս լարվածությունը կվերանա»,-ասաց Փաշինյանը:

Ոստիկանության գնդապետն ասաց, որ խոսքը ոչ թե բողոքի, այլ բողոքի ձևի մասին է:
«Ոչ մեկը ձեզ չի արգելում արտահայտվել կամ ձեր իրավունքներից օգտվել: Խոսքը վերաբերում է իրավունքների օգտագործման ձևին, յուրաքանչյուրն իր իրավունքը պետք է օգտագործի այնպես, որքանով չի ոտնահարում այլոց իրավունքը»:

Փաշինյանը հարցրեց, թե ինչու դա Սերժ Սարգսյանին չի ասում, ինչին ի պատասխան ոստիկանն ասաց, որ խոսում է Նիկոլ Փաշինյանի հետ:




9:49

Գյուլբենկյան փողոցում իրավիճակը լարված է, Փաշինյանը կոչ է անում ագրեսիվություն չդրսևորել

Գյուլբենկյան փողոցում մեքենան կայանած կին վարորդին բերման ենթարկելուց հետո այդ փողոց ոստիկանության լրացուցիչ ուժեր են տեղակայվել: Իրավիճակը լարված է:

Այստեղ եկավ նաև «Քայլ արա» նախաձեռնության ղեկավար Նիկոլ Փաշինյանը:

«Ժողովո՛ւրդ, հավաքվեք Գյուլբենկյան փողոցում և բացառիկ հարգալից վերաբերմունք ցուցաբերեք ոստիկանների նկատմամբ, ոչինչ մի արեք, ագրեսիվություն մի դրսևորեք»,-ասաց նա։

Ի պատասխան Փաշինյանի կոչին` մի կին արձագանքեց. «Ո՞վ կարող է սրանց բան ասել, ամեն մեկը՝ մի մարդակեր»: Ոստիկանները կոչ են անում բացել ճանապարհը:





9:42

Ոստիկանության տարբեր ստորաբաժանումներ բերվել են քաղաքացիներ:

Tert.am-ի հետ զրույցում ՀՀ ոստիկանության լրատվակական վարչության ԶԼՄ-ների հետ կապի բաժնի պետ Էդգար Ջանոյանն ասաց, որ բերված քաղաքացիների թիվը կազմում է 16:

«Ժամը 9:00-ի դրությամբ ոստիկանության Երևան քաղաքի վարչության տարբեր ստորաբաժանումներ է բերվել 16 անձ»:

Ինչ վերաբերում է ակտիվիստ Դավիթ Սանասարյանին, ոստիկանությունից հայտնեցին, որ նա բերվել է ոստիկանության Կենտրոնական բաժին:



9:33

Ցուցարարները փակել են Գյուլբենկյան փողոցը: Կին վարորդին հրավիրում են ոստիկանություն, ով փողոցի երթևեկելի մասում կայանել է և միացել է ակցիային: Քաղաքացին հրաժարվեց ներկայանալ ոստիկանություն և պահանջեց, որ ոստիկանության ծառայողը ներկայանա:

Քաղաքացիները ոստիկաններին հորդորեցին չքաշքշել կնոջը, իսկ մեկ քաղաքացի ի պատասխան ոստիկանների, թե հասարակական կարգն են պահպանում ասաց.« Ամեն օր այս փողոցում այս իրավիճակն է, ու երբեք այս տարածքում ոստիկան չեմ տեսելկ, հիմա եկել կարգավորու՞մ եք»:

Քաղաքացիների և ոստիկանների միջև քաշքշուք սկսվեց, Արաբկիրի ոստիկանապետի տեղակալը հրահանգեց տանել կնոջը: Քաղաքացիները չէին թողնում մոտենալ ու քաշել կնոջը:

Կինը բերվեց Արաբկիրի ոստիկանության բաժին քաղաքացիական համարանիշով մեքենայով: Կնոջ կայանած մեքենան ոստիկանները հրելով հեռացրին տարածքից, իսկ քաղաքացիները նշում էին, որ այդ կերպ վնասում են քաղաքացու գույքը:


9:15

Ցուցարարները փակել են նաև Աբովյան փողոցի ու Հանրապետության հրապարակի հատող հատվածը, փորձում են փակել նաև Ամիրյան փողոցը:

Մեքենաները կանգ են առել ու չեն շարժվում առաջ՝ այդ կերպ իրականացնելով իրենց ակցիան: Նույն հատվածից ոստիկանության ծառայողների կողմից ոստիկանության ստորաբաժանում է բերվել քաղաքացիական ակտիվիստ Դավիթ Սանասարյանը և ևս մեկ այլ քաղաքացի:

Այս մասին ֆեյսբուքյան իր էջում ուղիղ եթերի միջոցով տեղեկացրեց Դավիթ Սանասարյանը:

 

 



9:08

Սկսվում է բեռնատարներով ճանապարհները փակելու օպերացիան:

Այս մասին ֆեյսբուքյան իր էջում ուղիղ եթերի միջոցով հայտնեց ԱԺ «Ելք» խմբակցության ղեկավար Նիկոլ Փաշինյանը:

Նա բեռնատարների վարորդներին կոչ արեց բոլոր ճանապարհներին հորիզոնական կանգնեցնել մեքենաները և ըստ հնարավորության թուլացնել անիվները, անել այնպես, որ մեքենայի շարժիչը չմիանա, որ ՃՈ-ը չկարողանա բեռնատարները հեռացնել:

«Այսօրվա ակցիան շատ կարևոր է, և եթե մենք կարողանանք այս գործողությունն այսօր հաջողությամբ իրականացնենք հանրապետության ողջ տարածքում, դա կնշանակի, որ «թավշյա հեղափոխության» ավարտին ընդամենը մի քանի օր է մնացել: Պետք է հստակ ցույց տալ, որ Սերժ Սարգսյանը չի տիրապետում իրավիճակին: Այսինքն՝ եթե մենք կարողանանք այնպես անել, որ քաղաքը, տրանսպորտը կաթվածահար լինի, մենք դրանով պետական իշխանության մարմիններին, նաև ոստիկանությանը ցույց ենք տալիս, որ Սերժ Սարգսյանը չի տիրապետում իրավիճակին: Իհարկե, հիմա արդեն պարզ է, որ նա շատ իրավիճակների չի տիրապետում, բայց ընդհանուր առմամբ այսօրվա ցույցը Սերժ Սարգսյանին  պետք է համոզի իր հեռանալու ժամանակի մասին»,- ասաց Նիկոլ Փաշինյանը:

Նա ասաց, որ պետք է անել այդ գործողությունները օր  առաջ այս խնդիրն ավարտելու համար, և ինքը, համոզված եմ, որ ինչքան ջանասեր լինեն այս գործողության մեջ, այդքան կարճ կտևի «թավշյա հեղափոխության» ավարտի գրանցումը:

Փաշինյանը նշեց, որ հանրապետության տարածքում բեռնատարները շատ չեն,հետևաբար յուրաքանչյուրը պետք է անի իր քայլը:

 

------------------------------------

Ցուցարարները սկսել են ճանապարհներ փակել առավոտյան ժամը 8:00-ից: 7:30-ից սկսած փակ է Երևանի Վաղարշյան-Սունդուկյան փողոցների խաչմերուկը: Այդ հատվածում կայանել են մեքենաներ, որոնք թույլ չեն տալիս մյուսներին երթևեկել և կոչ են անում միանալ իրենց: Նշված ճանապարհահատված են ժամանել Ճանապարհային ոստիկանության ծառայողները, ովքեր փորձում են կարգավորել երթևեկությունը:

Հիշեցնենք, որ «Քայլ արա» նախաձեռնության ղեկավար Նիկոլ Փաշինյանը երեկ Հանրապետության հրապարակում տեղի ունեցած հանրահավաքի ավարտին հայտարարեց՝ ապրիլի 20-ին՝ առավոտյան ժամը 8:00-ից, սկսում են ցանցային գործողությունները, փակում են մայրաքաղաքի տարբեր հատվածներ:

 

 

 





Загрузка...

ԼՐԱՀՈՍՕրվա բոլոր նորությունները

15:19 • 15/08

Երևանի Ծովակալ Իսակովի պողոտայում մեքենան բախվել է էլեկտրասյանը. ուղևորուհին մահացել է

15:17 • 15/08

Ժիրինովսկին ասել է, որ ԽՍՀՄ-ի վերականգնումը պետք է սկսել Ուկրաինայի «ազատագրումից», ինչից հետո անցնել Հարավային Կովկասին

15:09 • 15/08

Օլեգ Եսայանը հետ է կանչվել Բելառուսում ՀՀ դեսպանի պաշտոնից. նրան կփոխարինի Արմեն Ղևոնդյանը

14:59 • 15/08

Ինձ հետապնդելու միակ պատճառը ազգանունս է, որով միայն հպարտանում եմ. Անահիտ Ֆարմանյանը՝ իրեն առաջադրված մեղադրանքների մասին

14:56 • 15/08

Ոստիկանության բաժին միասեռականների մուտք գործելու փաստի առթիվ հարուցվել է քրգործ խուլիգանության հատկանիշներով. մեկ անձ ձերբակալված է

14:50 • 15/08

Օդի ջերմաստիճանն օգոստոսի 16-17-ը կբարձրանա 3-4 աստիճանով, ապա նորից կնվազի

14:36 • 15/08

Ադրբեջանական հեռուստաալիքով ցուցադրվել է Մեծ Հայքի քարտեզը՝ շարժելով ադրբեջանցիների զայրույթը (տեսանյութ)

13:54 • 15/08

ՊՊԾ գնդի գործով դատական նիստը տեղի չունեցավ, Պավել Մանուկյանը առողջական խնդիրների պատճառով չէր ներկայացել դատարան

13:52 • 15/08

Վրաերթ Ճամբարակում. 54-ամյա կինը հիվանդանոցում մահացել է

13:48 • 15/08

ՌԴ քաղաքացին, ով  հետախուզվում էր զինծառայությունից խուսափելու համար, կամավոր ներկայացել է «Զվարթնոց» օդանավակայանի գծային բաժին

13:45 • 15/08

Գողության մեղադրանքով հետախուզվող 32-ամյա քաղաքացին բերման է ենթարկվել

13:43 • 15/08

Հորը դաժանաբար սպանած Խաչատուրյան քույրերից կրտսերը զղջում է արածի համար. ռուս իրավապաշտպան

13:42 • 15/08

Երևանի Իսահակյան փողոցում գտնվող սրճեփ սարքից առևանգել են մանրը վերադարձնող սարքը (լուսանկարներ)

13:41 • 15/08

Ներկայացվել է Չեմպիոնների լիգայի նոր գնդակը (լուսանկար)

13:39 • 15/08

Անցած 1 օրում արձանագրվել է ճանապարհատրանսպորտային 11 պատահար, ինչի հետևանքով 3 մարդ զոհվել է. օպերատիվ իրավիճակը՝ հանրապետությունում

13:17 • 15/08

Հայ ծրագրավորողներն արդեն կարող են իրենց վճարովի հավելվածները տեղադրել ու վաճառել «Google play»-ում. ՏԿՏՏ նախարարություն

13:13 • 15/08

Նախարար Վահրադյանը դիմավորել է ջրացատկի Եվրոպայի առաջնության բրոնզե մեդալակիրներին հայրենիքում (լուսանկար)

13:10 • 15/08

Համացանցի շնորհիվ հայտնի դարձած հայ պղնձագործը պատմել է հալված մետաղի մեջ ձեռքը մտցնելու հնարքի մասին (տեսանյութ)

13:09 • 15/08

Կառավարության 3-րդ մասնաշենքում ռումբ տեղադրելու մտադրության մասին ահազանգողի ինքնությունը հայտնի է. Ոստիկանություն

13:06 • 15/08

Զորակոչի հարցերով 142 դիմում-բողոքից 80-ին ընթացք է տրվել. ՊՆ

13:03 • 15/08

Արտահերթ ընտրությունների համար չպետք է սպասել մինչև գարուն. Արա Պապյան

12:58 • 15/08

Սերենա Ուիլյամսը պարտվել է Կվիտովային Ցինցինատիի մրցաշարի երկրորդ շրջանում

12:47 • 15/08

Ֆրանկոֆոնիայի գագաթնաժողովի մասնակիցների կեցությունն ապահովելու համար կառավարությունը կհատկացնի 120 մլն դրամ

12:44 • 15/08

Բաքվում դոլարներ են այրել հաջակցություն Թուրքիայի (տեսանյութ)

12:26 • 15/08

Մաքսատուրք՝ մաքսատուրքի հետևից. Թուրքիան ԱՄՆ-ի հետ «առևտրային պատերազմի» մեջ է ներքաշվել. «Газета»-ի անդրադարձը

12:25 • 15/08

«Դատապարտյալների հիվանդանոց» ՔԿՀ-ում ՄԻՊ ներկայացուցիչները տեսակցել են հացադուլ և ջրադուլ հայտարարած կալանավորված անձին

12:05 • 15/08

«Նուբարաշենի» կալանավորը փախուստի փորձ է կատարել

11:58 • 15/08

Վերջին պահին կնքված գործարքն իրավունք է տվել Իսրայելին հյուրընկալել «Եվրատեսիլ-2019»-ը

11:56 • 15/08

ԱԺ չանցնելու դեպքում կնախապատրաստենք երկրորդ հեղափոխություն. Քրիստոնյա Ժողովրդավարական կուսակցության նախաձեռնող խումբ (տեսանյութ)

11:55 • 15/08

Գաբի. Ցավալի ու շատ տարօրինակ է Կուրտուային տեսնել Ռեալի մարզաշապիկով

11:40 • 15/08

Apple-ը մտադիր է օգտատերերի առողջությանը հետևող անհատական չիպեր ստեղծել

11:38 • 15/08

Լոռու մարզի մի քանի բնակավայրերում դադարեցվել է ջրամատակարարումը

11:35 • 15/08

«Ամերիկյան ապրանքների մաքսատուրքերի բարձրացումը կապված է թուրքական տնտեսության վրա ԱՄՆ-ի հարձակման հետ». Թուրքիայի փոխնախագահ

11:22 • 15/08

Հրազդանի 2 բնակչի սպանության քրգործի նախաքննությունն ավարտվել է.  մեղադրանք է առաջադրվել նույն քաղաքի 33-ամյա բնակչին

11:21 • 15/08

Սամուել Էտո'Օ-ն կարիերան կշարունակի Քաթարում (լուսանկարներ)

11:13 • 15/08

Նախագահը ցավակցական հեռագիր է հղել Իտալիայի իր գործընկերոջը

10:58 • 15/08

Daily Mail-ը տեսանյութերով ցույց է տվել Ջենովայում կամրջի փլուզման սարսափելի հետևանքները (տեսանյութեր)

10:56 • 15/08

ԶԼՄ-ներ. Զիդանը ցանկանում է աշխատել ԱՊԼ-ում, Մանչեսթեր Յունայթեդը նախընտրելի տարբերակ է

10:53 • 15/08

«Նա, իհարկե, չարաճճի էր, էներգիայով լի». Պուտինի դասղեկը պատմել է՝ ինչպիսին էր ՌԴ նախագահը դպրոցական տարիներին

10:52 • 15/08

Գյումրիում վիճաբանության ժամանակ տղամարդը ջեռուցիչով և խոհանոցային դանակով հարվածներ է հասցրել այլ տղամարդու. ոստիկանություն (տեսանյութ)

10:35 • 15/08

«Փյունիկի» ֆուտբոլիստները մեկնել են Թել-Ավիվ` Եվրոպա լիգայի որակավորման երրորդ փուլի խաղին (տեսանյութ)

10:34 • 15/08

ԱՄՆ-ում առաջին անգամ տրանսգենդերը նահանգապետի թեկնածու է դարձել (լուսանկարներ)

10:28 • 15/08

Փոխարժեքները օգոստոսի 15 -ի դրությամբ

10:19 • 15/08

Ճապոնիայում նախապատրաստվում են հրաբխի՝ «աղետալի» ժայթքմանը

10:13 • 15/08

«Ժողովուրդ». Մարզպետները չեն վստահում աուդիտի բաժնի աշխատակիցներին. գյուղապետարաններում ստուգումներ անելու գործին իրավապահներն են միացել

10:03 • 15/08

Պուտինը հայտնել է մոտ ապագայում Կիմ Չեն Ընի հետ հանդիպման պատրաստակամության մասին

09:51 • 15/08

«Ժողովուրդ». Նիկոլ Փաշինյանն իրականացնում է 2015 թ. ծրագիրը

09:36 • 15/08

Հակազդեցություն Էրդողանի քարոզչությանը «Նյու Յորք թայմս» թերթում. Հարութ Սասունյան 

09:36 • 15/08

Թուրքիան կտրուկ բարձրացրել է ամերիկյան ապրանքների ներկրման մաքսատուրքերը

09:31 • 15/08

«Հրապարակ». Մարտի 1-ի գործով հարցաքննության է կանչվել ԲԴԽ անդամ Գևորգ Դանիելյանը 

09:16 • 15/08

Երևանում և Տավուշի մարզում էլէներգիայի մատարակարումը մինչև 6 ժամով կդադարեցվի

09:12 • 15/08

Սլովակիայում կնոջը ձերբակալել են 16 տարի հարևաններին Վերդիի «Տրավիատա»-ով «ահաբեկելու» համար (տեսանյութ)

09:11 • 15/08

«Հրապարակ». Ալյուրը թանկացել է. առաջիկայում հացի փռերը կվերանայեն հացի կա´մ գինը, կա´մ քաշը

09:04 • 15/08

«Հրապարակ». Սեպտեմբեր-հոկտեմբեր ամիսներին 15-22 դեսպան հետ է կանչվելու Հայաստան

08:20 • 15/08

«Ժողովուրդ». Սյունիքի նախկին մարզպետ Սուրիկ Խաչատրյանի որդիների պատճառով լարվել են պետական կառույցների հարաբերու­թյունները

07:57 • 15/08

Դենվերի բնակելի շենքերից մեկում հզոր պայթյուն է որոտացել. կան տուժածներ (լուսանկարներ)

07:19 • 15/08

Կիմ Չեն Ընը շնորհավորական հեռագիր է հղել Պուտինին՝ Կորեայի ազատագրման 73-րդ տարեդարձի կապակցությամբ

06:41 • 15/08

Նեբրասկայում վերջին 21 տարվա ընթացքում առաջին անգամ մահապատիժ է կիրառվել

06:07 • 15/08

ԱՄՆ-ում 11-ամյա երեխան 10 րոպեում կոտրել է ընտրական համակարգի կայքի կրկնօրինակը

05:33 • 15/08

Լոնդոնը չի պատրաստվում Վաշինգտոնի պահանջով պատժամիջոցներ սահմանել Իրանի դեմ

04:52 • 15/08

Ռուսաստանում մահացել է մանկագիր Էդուարդ Ուսպենսկին

04:05 • 15/08

Մեքսիկայում զինված անձինք առևանգել են Վերակրուս նահանգից ընտրված պատգամավորին

03:18 • 15/08

ԱՄՆ-ը և Հրվ. Կորեան որոշել են շարունակել ճնշում գործադրել Հս. Կորեայի վրա

02:30 • 15/08

Ցիպրասը Թուրքիա կուղարկի իր ինքնաթիռը՝ հույն զինվորականներին Հունաստան բերելու նպատակով

01:50 • 15/08

Թրամփը դատի է տվել իր նախկին օգնականին

23:59 • 14/08

ԱՄՆ-ում արջը պատահաբար ներս է մտել խմիչքների խանութ (տեսանյութ)

23:57 • 14/08

Թուրքիան ի պատասխան ԱՄՆ պատժամիջոցների պատրաստվում է հրաժարվել ամերիկյան շինանյութերից․ թուրք նախարար

23:52 • 14/08

Ադրբեջանական «Ղարաբաղը» դուրս մնաց Չեմպիոնների լիգայից (տեսանյութ)

23:52 • 14/08

Մադուրոյի դեմ մահափորձի գործով կասկածյալների թվում են հայտնվել երկու բարձրաստիճան զինվորականներ

23:49 • 14/08

Բրանսոնը պետք է անհապաղ ազատ արձակվի․ խոսել է թուրք-ամերիկյան ճգնաժամի պատճառ դարձած ամերիկացի քահանայի հայազգի փաստաբանը

23:40 • 14/08

Փրկարարները հայտնաբերել են օձին և տեղափոխել անվտանգ տարածք

23:22 • 14/08

Գետափ - Շատին ավտոճանապարհին տեղի ունեցած ՃՏՊ–ի հետևանքով մեկ մարդ հոսպիտալացվել է

23:03 • 14/08

«Ինտերի» գլխավոր մարզիչը երկարաձգել է ակումբի հետ պայմանագիրը

22:50 • 14/08

Ռուսաստանում կաշառակերության կասկածանքով ձերբակալվել է Օրենբուրգի քաղաքապետը

22:30 • 14/08

ՀՀ ՀՔԾ-ի՝ ՊԲ հրամանատարության շրջանում հարցաքննություն անելու, ինչպես նաև Արցախի բանակի՝ մարտիմեկյան դեպքերին մասնակցելու մասին տեղեկություն չունեմ. Դ. Բաբայան

22:22 • 14/08

Մեսսին այս տարի չի հրավիրվի Արգենտինայի հավաքական

22:22 • 14/08

Թուրքիայում ամիսներ շարունակ բանտարկված երկու հույն զինվորականներն ազատ են արձակվել

22:06 • 14/08

Ն. Փաշինյանը ցավակցական հեռագիր է հղել Իտալիայի վարչապետ Ջ. Կոնտեին՝ Ջենովայում կամրջի փլուզման հետևանքով մարդկային զոհերի կապակցությամբ

22:01 • 14/08

«Ուրարտու» բասկետբոլային ակումբը ամերիկացի խաղացող է ձեռք բերել

21:58 • 14/08

Հայ վետերան ֆուտբոլիստները Իրանի վետերաններին հաղթել են 8:0 հաշվով

21:55 • 14/08

Առաջին փոխվարչապետի գրասենյակի նախկին ղեկավարը կստանձնի ՔՊ մամուլի խոսնակի պարտականությունները

21:44 • 14/08

Ասուլիսի տապալման միջադեպը ծառայեց 2-րդ նախագահին լրացուցիչ անգամ PR անելուն և հալածյալի կերպար տալու գործընթացին. Արմեն Բադալյան

21:33 • 14/08

25-ամյա լեհ երիտասարդը հազվագյուտ հիվանդության պատճառով երեխայի տեսք ունի

21:20 • 14/08

Նախատեսում ենք Երևանում 4 տարում $1 մլրդ-ի ներդրումներ կատարել և ստեղծել 30 000 նոր աշխատատեղ. Ա. Թարխանյան (տեսանյութ)

21:11 • 14/08

ՃՏՊ Մյասնիկյան պողոտայում. կա տուժած

20:56 • 14/08

ՕԵԿ–ը կոչ է անում ակտիվորեն մասնակցել օգոստոսի 17-ի հանրահավաքին

20:43 • 14/08

Լեգենդար ավտոարշավորդ Ալոնսոն կհեռանա Ֆորմուլա 1-ից

20:43 • 14/08

ՄԻՊ–ի ներկայացուցիչները հանդիպել են Շանթ Հարությունյանի հետ

20:34 • 14/08

ՀԱԿ–ն իր համակիրներին կոչ է անում միահամուռ մասնակցել օգոստոսի 17-ի հանրահավաքին

20:29 • 14/08

Համասեռամոլների խումբը ներխուժել է ոստիկանության բաժին. երկու ոստիկաններ մարմնական վնասվածքներ են ստացել (տեսանյութ)

20:12 • 14/08

Իտալիայի Ջենովա քաղաքում երթևեկելի կամրջի փլուզման հետևանքով զոհված քաղաքացիների թիվը հասել է 35-ի

20:09 • 14/08

Ռոնալդոն դուրս է գրվել հիվանդանոցից

20:09 • 14/08

«Մարտի 1-ի» գործը ԱՄՆ կառավարության ուշադրության կենտրոնում է. դեսպան Միլս

19:55 • 14/08

Վայքի սոցիալական աջակցության ծառայության պետը մեղադրվում է կաշառք ստանալու մեջ

19:47 • 14/08

Չինաստանում սագն ընդունվել է Շանհայի համալսարան

19:32 • 14/08

Քաղաքաշինության կոմիտեի նախագահ Էլոյանը փոխվարչապետ Ավինյանին է ներկայացրել երկրաշարժից անօթևան մնացածներին աջակցության ծրագիրը

19:19 • 14/08

Բունդեսթագում Ցեղասպանության մասին բանաձևի համահեղինակ Ջեմ Օզդեմիրն առաջարկում է Գերմանիային օգտվել Թուրքիայի տնտեսական ճգնաժամից

19:03 • 14/08

Քաղաքացու առևանգման մեջ կասկածվողը հայտնաբերվել է ԱՄԷ-ում

18:57 • 14/08

Մեծ Բրիտանիայի ոստիկանությունը խորհրդարանի շենքի մոտ տեղի ունեցած միջադեպը դիտարկում է որպես ահաբեկչություն․ նոր մանրամասներ

18:41 • 14/08

Ավելի լավ կլինի, եթե ավագանու ընտրություններին ՀԱԿ-ն աջակցի հեղափոխություն իրականացրած ուժերին. ՀԱԿ վարչության անդամ