Ում են ընտրելու Թուրքիայի քաղաքացի դարձած սիրիացի ներգաղթյալները․ թուրքական կայքի անդրադարձը

Թուրքիայում բնակվող 3 մլն 589 հազ. սիրիացի ներգաղթյալներից շուրջ 50 հազարը հասցրել է Թուրքիայի քաղաքացիություն ձեռք բերել։ Օրերս Թուրքիայի վարչապետ Բինալի Յըլդըրըմը հայտարարել է, որ հունիսի 24-ի արտահերթ նախագահական ու խորհրդարանական ընտրություններին մասնակցության իրավունք ունի շուրջ 30.000 սիրիացի։

gazeteduvar.com.tr կայքը փորձել է պարզել, թե ինչ քաղաքական նախընտրություններ ունեն Թուրքիայի սիրիացի ընտրողները և ում են պատրաստվում տալ իրենց ձայնը։

Վեց տարի Թուրքիայում ապրող սիրիացի Մալիհը նշել է, որ ընտրություններում պատրաստվում է աջակցել գործող իշխանությանն ու նախագահ Ռեջեփ Թայիփ Էրդողանին։

Իր որոշումը բացատրելիս նա շեշտել է երկու ընդդիմադիր կուսակցությունների նախընտրական ծրագրի այն մասը, ըստ որի՝ սիրիացի գաղթականներին արտաքսելու են Թուրքիայից։

«Խոստանում են, որ մեզ դուրս կգցեն այստեղից և, այսպիսով, մեր դեմ ատելություն են սերմանում մարդկանց մեջ»,-ասել է Մալիհը՝ միևնույն ժամանակ խոստովանելով, որ ընտրությունների հետ կապված անորոշություն ու լարվածություն է զգում։

Յոթ տարի առաջ Թուրքիա եկած հալեպցի Մուհամեդը նույնպես պատրաստ է իր ձայնը տալ գործող իշխանություններին՝ շնորհակալ լինելով պատերազմի ամենադժվարին օրերին երկրի սահմաններն իրենց առաջ բացելու համար։

Փոխարենը՝ 5 տարի Ստամբուլի Բալաթ շրջանում ապրող ամուսիններ Սալմանն ու Համիդիեն նշում են, որ Էրդողանին ու նրա կուսակցությանը չեն աջակցի, քանի որ դժգոհ են, որ սիրիացի ներգաղթյալների հարցը Թուրքիան հաճախ օգտագործում է Եվրամիության հետ «առևտրի» մեջ մտնելու համար։ Թեև սիրիացի ամուսինները խոստովանում են, որ երկրի ներսում սիրիացի ներգաղթյալների հարցում իշխանությունների ձեռնարկած քաղաքականությունից գոհ են։