Եթե ՀՀ-ն ցանկանում է փոխել ՀԱՊԿ գլխավոր քարտուղարին, ապա հենց պաշտոնական Երևանը պետք է նախաձեռնի նրա հետկանչումը. ՌԴ ԱԳՆ

Եթե Հայաստանը ցանկանում է փոխել ՀԱՊԿ գլխավոր քարտուղար Յուրի Խաչատուրովին, ապա հենց պաշտոնական Երևանը պետք է նախաձեռնի այդ պաշտոնից իր քաղաքացու հետկանչումը, հայտարարել է Ռուսաստանի Դաշնության արտաքին քաղաքական գերատեսչությունը՝ մեկնաբանելով Հայաստանի՝ ՀԱՊԿ գործընկեր պետություններին Գլխավոր քարտուղարի փոխարինման գործընթացը սկսելու առաջարկը:

Ինչպես նշում է ria.ru-ն, ՌԴ ԱԳՆ-ից ընդգծել են, որ ՀԱՊԿ գործընթացի կանոնների համաձայն՝ հենց հայկական կողմը պետք է պաշտոնապես նախաձեռնի Գլխավոր քարտուղարի պաշտոնից իր քաղաքացու հետկանչումը, եթե Երևանում դրա վերաբերյալ արդեն պաշտոնական որոշումը կայացվել է:

ՌԴ ԱԳՆ-ից նաև հայտնել են, որ տվյալ հարցի շուրջ հայկական կողմին բոլոր անհրաժեշտ բացատրությունները տրվել են ՌԴ արտգործնախարար Սերգեյ Լավրովի ու նրա հայազգի պաշտոնակից Զոհրաբ Մնացականյանի հեռախոսազրույցի ընթացքում:

Մինչդեռ ՌԴ դիվանագիտության բարձրաստիճան աղբյուրը ՏԱՍՍ գործակալության հետ նույն թեմայի շուրջ զրույցում նշել է, որ պաշտոնական Երևանի՝ ՀԱՊԿ գլխավոր քարտուղարին փոխարինելու վերաբերյալ  հայտարարությունը «ոչ պրոֆեսիոնալիզմի նշան է»:

Աղբյուրը մանրամասնել է, որ «Ռուսաստանը ոչ պրոֆեսիոնալ է համարում ՀՀ ԱԳՆ-ի՝ Խաչատուրովին վերոհիշյալ պաշտոնից հեռացնելու վերաբերյալ հայտարարությունը»:

«Այսօր Հայաստանի ԱԳՆ-ն հանդես եկավ ՀԱՊԿ անդամ պետություններին ուղղված և ոչ պրոֆեսիոնալիզմով զարմացնող հայտարարությամբ՝ կազմակերպության գլխավոր քարտուղարի փոխարինման գործընթացի մեկնարկի վերաբերյալ: Նման հայտարարություն լսելը տարօրինակ է՝ հաշվի առնելով, որ Հայաստանում տեղի ունեցած փոփոխությունները չեն անդրադարձել ԱԳՆ-ի կոլեկտիվի վրա, որը դեռ վերջերս ներկայացրել էր Խաչատուրովի թեկնածությունը, և ամենակարևորը՝ շատ լավ գիտեն ընթացակարգը, համաձայն որի՝ հենց Հայաստանը պետք է ընթացք տա գլխավոր քարտուղարին հետ կանչելու գործընթացին, քանի որ նա այդ երկրի ներկայացուցիչն է»,-ասել է աղբյուրը:

Նա շարունակել է, որ Երևանը պետք է գրավոր ծանուցում ուղարկի ՀԱՊԿ-ին, և միայն դրանից հետո ընթացք կտրվի Խաչատուրովի լիազորությունների վայր դրման գործընթացը:

«Եթե Երևանում որոշել են, որ պարոն Խաչատուրովն այլևս հարմար չէ այդ պաշտոնի համար, ուրեմն ՀԱՊԿ-ը Հայաստանից այդ մասին գրավոր ծանուցում պետք է ստանա, և միայն դրանից հետո ընթացք կտրվի ոչ թե գլխավոր քարտուղարի փոխարինման, այլ նրա լիազորությունների դադարեցման գործընթացին»,-եզրափակել է աղբյուրը:

Հիշեցնենք, որ  ՀԱՊԿ գլխավոր քարտուղար Յուրի Խաչատուրովին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: