Չեմ համատեղի նախարարի պաշտոնը թեկնածուի կարգավիճակի հետ, արձակուրդ գնալու դիմում կգրեմ. Արտակ Զեյնալյան

Ես, որպես արդարադատության նախարար, կներկայացնեմ արձակուրդ գնալու դիմում ու այդ պայմաններում կմասնակցեմ Երևանի ավագանու ընտրությունների  քարոզարշավին: 

Այս մասին լրագրողների հետ զրույցում հայտարարեց արդարադատության նախարար Արտակ Զեյնալյանը, ով  գլխավորելու է  Երևանի ավագանու արտահերթ ընտրություններում «Հանրապետություն» և «Լուսավոր Հայաստան»  կուսակցությունների դաշինքի ցուցակը:

«Չեմ համատեղի նախարարի պաշտոնը թեկնածուի կարգավիճակի հետ», - ասաց Արտակ Զեյնալյանը:

Անդրադառնալով դիտարկմանը՝ եթե ԼՀԿ-ն ու «Հանրապետությունը» դաշինքով են գնում  ընտրություններին, ՔՊ-ն՝  միայնակ, արդյոք սա չի նշանակում, որ «Ելք» դաշինքը դադարում է գոյությունը՝ նախարարն արձագանքեց, որ դաշինքը գործում է խորհրդարանում:

««Ելք»-ը շարունակում է լինել ներկայիս կառավարության հիմնական հենարանը», - ընդգծեց նա: