Իրականությանը չի համապատասխանում. Ռ. Քոչարյանի պաշտպանը՝ Ալեն Սիմոնյանի հայտարարության մասին, թե ձայնագրությունն արվել է իրենց կողմից

ԱԺ-ն պատգամավոր Ալեն Սիմոնյանի հայտարարությունը, թե իր կարծիքով՝ ԱԱԾ տնօրենի ու ՀՔԾ պետ Սասուն Խաչատրյանի գաղտնալսումն արվել է ՀՀ երկրորդ նախագահի կողմից, նրա փաստաբանների կողմից, իրականությանը չի համապատասխանում:

Այս մասին Tert.am-ի հետ զրույցում ասաց ՀՀ երկրորդ նախագահ, «Մարտի 1-ի» գործով մեղադրյալ Ռոբերտ Քոչարյանի պաշտպաններից Արամ Օրբելյանը:

«Ավել ի՞նչ մեկնաբանեմ, եթե իրականությանը չի համապատասխանում: Առնվազն փաստաբանների մասով կարող եմ հաստատել, որ չի համապատասխանում իրականությանը, նույնը ենթադրում եմ նաև Ռոբերտ Քոչարյանի մասով»,-ասաց Օրբելյանը:

Հիշեցնենք, որ սեպտեմբերի 11-ին համացանցում տարածվել է ՀՔԾ պետի ու ԱԱԾ տնօրենի հեռախոսազրույցի ձայնագրությունը, որում խոսակցությունը ՀՀ նախկին պաշտոնյաների, «Մարտի 1-ի» գործի, Ռոբերտ Քոչարյանին կալանավորելու, ՀԱՊԿ քարտուղար Յուրի Խաչատուրովին կալանավորելու վտանգի, փաստաբան Վահե Գրիգորյանի կողմից սպասվող գրառման, պաշտպանության նախկին նախարար Սեյրան Օհանյանի և այլոց մասին է: