Ծեծել են «Հայկական ժամանակ» օրաթերթի լրագրողուհուն

Այսօր առավոտյան՝ տանից դուրս գալիս, հարձակվել և ծեծի է ենթարկվել «Հայկական ժամանակ» թերթի լրագրող Լուսինե Բարսեղյանը։ Ինչպես Tert.am–ի հետ հեռախոսազրույցում պատմել է ինքը՝ լրագրողը, «սա նախորոք ծրագրված բան է եղել»։

Նա ասել է, որ իրեն ծեծի է ենթարկել սպորտային կազմվածքով երկու տղա, նրանքցից մեկը՝ սափրագլուխ, ովքեր մինչ այսօրվա ծեծը նախապես այցելել էին իր հորը, հետաքրքրվել «ՀԺ»–ի խմբագրության հասցեով, ապա՝ այցելել խմբագրություն և լրագրողի հետ զրուցելու ցանկություն հայտնել։ Սակայն մեկ ժամ անց սպորտային կազմվածքով տղան, ինչպես պատմել է Լուսինե Բարսեղյանը, հեռացել է խմբագրությունից։

Այսօր առավոտյան՝ հայրական տանից իջնելիս, շենքի մոտ լրագրողը նկատել է «Վազ 2106» մակնիշի մեքենա, որը հետևել է իրեն։ Այնուհետև երկու հոգի հարձակվել և սկսել են խփել նրա գլխին։ 

«Իմ գոռոցին, աղմուկին արձագանքեցին կողքի մարդիկ, որից հետո նրանք նստեցին մեկ այլ մեքենա և հեռացան»։Լուսինե Բարսեղյանի փոխանցմամբ՝ իր ինքնազգացողությունը վատացել է, և նրան տեղափոխել են Սուրբ Գրիգոր Լուսավորիչ հիվանդանոց։ Հետազոտության արդյունքում լրագրողի մոտ հայտնաբերել են գլխի սալջարդ և հեմատոմա, ինչպես նաև կապտուկներ թևերին։

«Սա միանշանակ կապում եմ իմ լրագրողական գործունեության հետ, հատկապես վերջին օրերի հրապարակումներիս հետ, որոնք Սամվել Ալեքսանյանի, Մհեր Սեդրակյանի և Հովիկ Աբրահամյանի մասին էին»,– ասել է Լուսինե Բարսեղյանը։

Լրագրողի վրա կատարված հարձակման դեպքի առթիվ նա արդեն դիմել է Մարդու իրավունքների պաշտպանին, ոստիկանությանը և դատախազությանը։