Լևոն Արոնյանը չի սիրում քայլեր թաքցնել ոչ շախմատում, ոչ կյանքում

Միջազգային գրոսմայստեր Լևոն Արոնյանը այսուհետ տարվա մի մասը կանցկացնի Հայաստանում. Սերժ Սարգսյանը նրան Երևանում բնակարան է նվիրել։ Այսօր լրագրողների հետ հանդիպմանը Արոնյանը հաստատեց այս լուրը և նշեց, որ արդեն մեկ ամիս է՝ Հայաստանում է և զբաղվում է բացառապես մարզումներով։

Լևոն Արոնյանն այսօր լրագրողների հետ անկեղծացավ և պատասխանեց նաև շախմատին չվերաբերող հարցերին։ Պարզվում է, որ վերջին ժամանակահատվածում նա զբաղվում է նաև ընթերցանությամբ և կարդում է տնտեսության վերաբերյալ գրքեր։
«Ինձ հետարքրիր էր իմանալ, թե տնտեսության մեջ տեղի ունեցող քայլերն ինչո՞ւ են այդպես։ Շախմատիստներն այդպես են՝ ամեն ինչ կյանքում քայլերի են նմանեցնում»,– ասաց Արոնյանը։ Իսկ հնարավո՞ր է, որ Արոնյանը քաղաքականությամբ զբաղվի կամ պաշտոնի առաջարկի դեպքում ընդունի այն. այս հարցին գրոսմայստերը պատասխանեց, որ ինքը չգիտի, թե ինչով կզբաղվի վաղը կամ մյուս օրը։

«Չեմ սիրում պլանավորել վաղվա օրը։ Եթե ես իմանայի, որ այդ աշխատանքը կարող էի անել և իմ ընկերները դրա հետ հաշտվեին ու հավատային, որ կարող եմ անել, երևի կհաշտվեի այդ մտքի հետ ու կանեի»,– նշեց նա։
Արոնյանը գտնում է, որ շախմատի պատմության մեջ մնացած քայլը դեռևս չունի. «Ես դեռ շարունակում եմ խաղալ։ Դեռ կհասցնեմ խաղալ մի խաղ, որը կմնա մարդկանց հիշողության մեջ»։

«Շախմատից ավելի շատ ո՞ւմ կամ ի՞նչ եք սիրում»,– հարցին գրոսմաստերը պատասխանեց. «Դժվար հարց է։ Չեմ կարծում, որ ճիշտ կլինի... Ոնց որ հիմա ասենք՝ մամայի՞դ ես սիրում, թե՞ տոլմա։ Սխալ հարց է մի քիչ»։ Միաժամանակ նա նշեց, որ շախմատին հավասար դասական և ջազ երաժշտությունն է սիրում։ Խաղից առաջ էլ Արոնյանին ոգևորողը հենց երաժշտությունն է։
Հայաստանի ներքին կյանքի մասին հարցին Արոնյանը չպատասխանեց՝ նշելով, որ լուրերին գրեթե չի հետևում։ Իսկ որտե՞ղ է պատկերացնում իր կյանքը՝ Հայաստանում, թե Եվրոպայում՝ հարցին նա պատասխանեց. «Սխալ կլինի ասել՝ Եվրոպայում կամ Հայաստանում։ Իմ կյանքը շախմատում է»։

Արոնյանը նշեց, որ իր ծնողները նույնպես բնակվում են Գերմանիայում, սակայն հավատարիմ են իրենց արմատներին և չեն թաքցնում, որ ծնունդով գյուղից են։ Արոնյանը տեղեկացրեց, որ իր մայրը Տավուշի մարզի գյուղերից մեկում է ծնվել։
Գրոսմայստերը նշեց, որ այս փուլում միայն մտածում է մայիսի 3-27–ը Ռուսաստանի Կազան քաղաքում անցկացվելիք հավակնորդների մրցաշարի մասին։

Այստեղ Արոնյանն ունենալու է չորս խաղ և մրցելու է ռուս գրոսմայստեր Ալեքսանդր Գրիշչուկի հետ։ «Թե հաղթողն ում հետ կխաղա, դա կարևոր չէ։ Կարևորը սառնասրտությունն է, որ խաղի ժամանակ կարողանաս քեզ հանգիստ պահել։ Շախմատում բոլոր ուժեղագույնների խաղի մեջ մեծ տարբերություն չկա»,– ասաց նա՝ հավելելով, որ բարդ, բայց միաժամանակ հետաքրքիր խաղ է լինելու։

Արոնյանը նշեց, որ ինքը և շախմատում, և կյանքում չի սիրում քայլեր թաքցնել. «Վճռական խաղ եմ սիրում խաղաղ։ Չեմ պատրաստվում փոխել իմ մարտավարությունը և ուրախ եմ, որ իմ խաղը որակ ունի։ Այն փաստը, որ վաղուց չեմ պարտվել, ուրախացնում է ինձ»։

Արոնյանը նաև կարծիք հայտնեց, որ այս պահին հայկական շախմատը վերելքի փուլում է և պետք է օգտվել այդ իրավիճկից։