Զոհված զինծառայողների ծնողներին թույլ չտվեցին նախագահին հիշեցնել իր խոստումը

Մինչ նախագահական նստավայրում զինվորականները պարգևներ էին ստանում, զոհված զինծառայողների ծնողներն ու հարազատները դրսում բողոքի ակցիա էին անցկացնում նախագահական նստավայրի դիմաց, սակայն նրանց թույլ չեն տվել մոտենալ նախագահին:
Tert.am-ի հետ զրույցում նրանք ասացին, որ ցանկանում են նախագահին հիշեցնել իրենց մեկ տարի առաջ տված իր խոստումը:
«Այսօր լրանում է մեկ տարին, որ մենք պահանջում ենք նախագահից մեր երեխաների քրեական գործերի արդար լուծում»,-ասաց 2001թ. Վայքի զորամասում զոհված զինծառայող Արայիկ Մովսիսյանի մայրը` Անահիտ Մկրտչյանը, ով վստահ է, որ իր որդուն սպանել է զորամասի գումարտակի հրամանատարը:

«Մենք ուզում էինք մոտենալ նախագահին ու ասել իր տված խոստումը չի կատարվել, որ մեկ տարվա ընթացքում չգրանցվեց և ոչ մի առաջխաղացում, բայց մեր «փառապանծ» ոստիկանները վախեցան ու թույլ չտվեցին մոտենալ շենքի ճաղավանդակներին»,- ավելացրեց նա:

Զոհված զինծառայողների ծնողներն ու հարազատները ստիպված հավաքվել էին նախագահի նստավայրի հակառակ մայթին, որպեսզի նախագահը նկատի իրենց:

«Թող միշտ հիշեն, որ մենք միշտ գալու ենք ու պահանջելու ենք խնդրի լուծման օբյեկտիվություն: Թող ամաչի մեր նախագահը, որ անգամ ինքը խոստացավ ու ոչինչ չարեց: Իսկ այն որ ինքը անցած տարի խոստացավ, դրա մասին բազմաթիվ փաստեր ունենք»,- ասաց 2008թ-ի մայիսի 9-ին գիշերը մահցած Նարեկ Գալստյանի հորաքույրը` Սուսաննա Գալստյանը:

Նա տեղեկցրեց որ զինվորին այդ գիշեր գտել էին բենզինի դատարկ տարայի մեջ և կատարվածըորպես դժբախտ պատահար որակել: Սակայն Տիկին Սուսաննան վստահեցրեց, որ տեղի է ունեցել սպանություն` ավելացնելով, որ իրենց ունեն փաստեր:

Զոհված զինծառայողների ծնողներին հատկապես վրդովեցրեց այն, որ պարգևներ ստացած զինվորականներից որևէ մեկը նախագահականից դուրս գալուց հետո չմոտեցավ իրենց և չհետաքրքրվեց իրենց խնդիրներով:

«Այն զինվորականները, ովքեր հոշոտել են մեր երեխաներին, այսօր նախագահի կողքը կանգնած` լայն ժպիտներով, նկարվում են, էլ ի՞նչ ուզենք նրանցից»,- ասաց 2007թ.Կարճաղբյուրի զորամասում մահացած զինծառայող Տիգրան Օհանջանյանի մայրը` Գոհար Սարգսյանը: