Եթե քառյակը խնդիր է դնում, որ քվեարկության նկատմամբ ընդհանուր վերաբերմունք լինի, էլեմենտար էթիկա է, որ դա քննարկվի.Խ. Քոքոբելյան

Tert.am-ի հետ զրույցում անկախ պատգամավոր Խաչատուր Քոքոբելյանը, պատասխանելով լրատվամիջոցներից մեկի մեղադրանքին, որ «65 ՀՀԿ-ական + Խ. Քոքոբելյան = քվորում» բանաձևով այսօր ԱԺ-ում քվորում է ապահովվել` ի հեճուկս քառյակի ջանքերի, ասաց. «Նախ, իմ օգնությամբ չի ապահովվել, որովհետև սկզբում 63 գրանցում է եղել, իսկ քվորման համար անհրաժեշտ էր 66-ը»: (Այսինքն՝ Քոքոբելյանն ակնարկում է, որ իր համար պարզ է եղել, որ իր մասնակցությամբ քվորում չի լինի, և ՀՀԿ-ն հետագայում է պատգամավոր բերել): 

«Սա՝մեկ։ Եվ երկրորդ. ցանկացած քվեարկություն տապալել- չտապալելու խնդիրն ինքնանպատակ չէ, եթե ընդդիմադիր քաղաքական ուժերը ընդհանուր խնդիր են դնում, որ նման քվեարկության նկատմամբ ձևավորվի ընդհանուր վերաբերմունք, ապա դա պետք է լինի ընդհանուր քննարկման արդյունքում, այլ ոչ թե մանկական կապրիզների» ,-ասաց Քոքոբելյանը։

Ի պատասխան հարցի, թե այսինքն՝ Խաչատուր Քոքոբելյանն ակնկալու՞մ էր, որ քառյակն իր ծրագրերին հաղորդակից կդարձներ իրեն, պատգամավորն ասաց. «Դա ուղղակի էլեմենտար կանոն է. ցանկացած խնդրի հետ կապված, եթե մոտեցում պետք է լինի, պետք է քննարկում լինի: Դա էլեմենտար էթիկայի կանոն է: Եվ թող չփորձեն դա այլ հարթակ տեղափոխել»:

Ամփոփելով` Խաչատուր Քոքոբելյանը հիշեցրեց, որ ինքը չկա 4-ի ֆորմատում, և «ակնհայտ է, որ նրանց որոշումերը իրեն չեն վերաբերում: Այդ թվում՝ նաև իշխանության որոշումները»:

Հիշեցնենք, որ այս փաստի կապակցությամբ «Հայ Յեղափոխական Դաշնակցության» քարտուղար Աղվան Վարդանյանը Խաչատուր Քոքոբելյանի մասին խոսելով՝ նրան անվանել էր «մի քիչ պայմանական է ընդդիմություն ասելը»:

Աղվան Վարդանյանի հայտարարության վերաբերյալ Խաչատուր Քոքոբելյանն ասաց. «Նման մարդկանց հայտարարությունների վերաբերյալ մեկնաբանություն անելու անհրաժեշտություն չեմ տեսնում, և հասարակությունը շատ հստակ տեսնում է, թե ով ինչպիսի վարքագծով է օժանդակում իշխանություններին»:

Հարցին, թե այսուհանդերձ, նիստին գտնվելը Խաչատուր Քոքոբելյանի համար շա՞տ կարևոր էր, պատգամավորը պատասխանեց. «Խնդիրը նիստին գտնվել-չգտնվելը չէ։ Կրկնում եմ՝ եթե ԱԺ-ի նիստի տապալման խնդիր կա դրված, դա պետք է դրվի ընդհանուր քննարկման: Ավելին՝ իրենք եթե նման խնդիր են դնում, դրա համար կան բազում լուծումներ, այդ թվում օրինակ՝ մանդատները վայր դնելը, այլ ոչ թե ամեն մեկը փորձի իր կարևորությունն առաջ տանի: Եվ այնպես չէ, որ որոշ մարդիկ պետք է դահլիճում նստեն և որոշում կայացնեն, իսկ մյուսները փորձեն այդ որոշմանը «ենթարկվել»: Ինձ համար դրանք սկզբունքային խնդիրներ են, այլ ոչ թե պահի ազդեցության տակ վերաբերմունք արտահայտելու»:

Այսուհանդերձ, Խաչատուր Քոքոբելյանը երեկ միացավ քառյակի ներկայացուցիչների բողոքին, որ իշխող կուսակցությունը բերել է հասարակության համար սկզբունքային, կարևորագույն նշանակության մի շարք օրենքի նախագծեր ու ուզում է արագ «շտամպովկա» անել, առանց նախնական քննարկման, ինչն օրենքի պահանջ է:

Խաչատուր Քոքոբելյանը հավելեց, որ քառյակն էլ կարող է միանալ իր առաջարկին, որ ԱԺ-ում ստեղծվի էլեկտրաէներգիայի սակագների և էներգահամակարգի սեփականատերերի կողմից ներդրումների ուսումնասիրման ժամանակավոր հանձնաժողով: