Ալիևը քաղաքական նույն մուղամն է երգում՝ ֆոնոգրամայի տեսքով. ԼՂՀ Նախագահի մամլո խոսնակ

Տարիներ շարունակ Ադրբեջանի նախագահ Իլհամ Ալիևը նույն քաղաքական մուղամն է երգում, ինչով էլ ցույց է տալիս իր ու իր երկրի դեմքը: Tert.am-ի հետ զրույցում ԼՂՀ Նախագահի մամուլի քարտուղար Դավիթ Բաբայանն այսպես բնութագրեց ԵԽ ԽՎ գարնանային նստաշրջանում Ադրբեջանի Նախագահ Իլհամ Ալիևի հնչեցրած հայտարարությունները:

-Պարո՛ն Բաբայան, ի՞նչ գնահատական կտաք ԵԽ ԽՎ-ում Ալիևի պահվածքին. նա խոսեց «օկուպացված տարածքների», ադրբեջանական փախստականների ու մի շարք այլ հարցերի մասին:

-Արդեն մի բանաձև եմ գտել` բնութագրելու Ալիևի քաղաքականությունը և հայտարարությունները. դա քաղաքական մուղամ է՝ ներկայացրած ֆոնոգրամայի տեսքով: Անընդհատ նույն բաներն են, անընդհատ նույն ոճն է: Իրենց համար օրինաչափություն է դարձել այդ քաղաքական մուղամը ֆոնոգրամայի տեսքով ներկայացնելը: Մի կողմից էլ՝ դա իրոք ցույց է տալիս Ադրբեջանի իրական պատկերը, թե ինչ են ուզում այդ մարդիկ՝ այդպիսի գռեհիկ մոտեցմամբ և իրենց ներկայացրած պահանջներով: Սա պետք է համապատասխան հետևությունների բերի, որովհետև չար երեխայի պես ամեն ինչ անում են, բոլորը աչք են փակում՝ չտեսնելով, որ նա երեխայական մակարդակում չի մնում, աճում է և դառնում մի մեծ հրեշ, որը մենք տեսել են Հիտլերի պարագայում, որը տեսել ենք բազմաթիվ պատմական այլ ժամանակահատվածներում: Հետևաբար, Ալիևն ուղղակի ցուցադրեց իր իրական դեմքը:

-Հայ-ադրբեջանական շփման գծում ամենօրյա հրադադարի խախտման բազմաթիվ դեպքեր են արձանագրվում: Վերջերս քաղաքագիտական շրջանակներում հաճախ են այնպիսի տեսակետներ հնչում, թե ԵԱՀԿ Մինսկի խումբը սպառել է իրեն ու չի կարողանում տարածաշրջանում իրեն վերապահված գործառույթներն իրականացնել: Դուք ևս այդպե՞ս եք կարծում:

-Իհարկե՝ ո՛չ, այդպես չէ: Նախ և առաջ` Մինսկի խումբը չի սպառել իրեն, քանի որ հակամարտության կարգավորումը դիտարկել լոկ վերջնական մի համաձայնագրի հասնելու, ստորագրելու և այն իրականացնելու մեջ՝ շատ թերի պատկերացում կլինի: Մինչև այդ ժամանակահատվածը գալը շատ աշխատանք պետք է կատարվի, առաջին հերթին՝ տարածաշրջանում խաղաղությունը և կայունությունը պահպանելու համար լուրջ գործողություններ: Իսկ այդ գործում Մինսկի խմբի դերակատարությունը չափազանց կարևոր է: Իսկ ինչ վերաբերում է այդ խախտումներին, ապա այստեղ Ադրբեջանի պահվածքն է ապակառուցողական: Բայց, այնուամենայնիվ, բոլորի համար պարզ է, որ միջազգային հանրության և գերտերությունների համար առնվազն՝ այս ժամանակահատվածում, ինչպես նաև՝ տեսանելի ապագայում, ձեռնտու չի լինելու պատերազմական գործողությունների վերսկսումը, ապակայունացումը և այլն: Սա ո՛չ միայն մարդասիրական մոտեցում է, այլ նաև՝ սառը աշխարհաքաղաքական դատողության հետևանք:

-ՀՀ և ԼՂՀ ԱԺ միջխորհրդարանական հանձնաժողովը հայտարարությամբ է հանդես եկել, որտեղ ԵԱՀԿ Մինսկի խմբին կոչ է արվում գործնական քայլեր ձեռնարկել Հայաստանի, Լեռնային Ղարաբաղի և Ադրբեջանի սահմանագծից դիպուկահարների ետ քաշման, միջադեպերի հետաքննության և ժողովուրդների միջև ատելություն սերմանող հայտարարությունների ու գործողությունների բացառման ուղղությամբ, ինչպես նաև՝ դիմում է Մինսկի խմբի համանախագահներին՝ կոչ անելով ձեռնարկել անհրաժեշտ քայլեր` ուղղված Լեռնային Ղարաբաղի Հանրապետության լիարժեք մասնակցության ապահովմանը բանակցային գործընթացի բոլոր փուլերին: Իրատեսական համարո՞ւմ եք, որ արձագանքը համարժեք կլինի:

-Այս քայլը ևս մեկ հնարավորություն է՝ միջազգային հանրության ուշադրությունը սևեռելու ընթացող գործընթացների վրա: Թե ինչ կլինի՝ ժամանակը ցույց կտա, բայց մենք շահագրգռված ենք, որ կոնկրետ քայլեր ձեռնարկեն: Ադրբեջանն ամեն դեպքում խախտում է նման պայմանավորվածությունները և ապակառուցողական քաղաքականություն է վարում: Հատկապես՝ հիմա, կարծում եմ, որ էլ ավելի ապակառուցողական կլինի. Ալիևի հայտնի ելույթից հետո, որպեսզի շեղեն ներքին և արտաքին հանրության կարծիքը, պիտի ինչ-որ ապակառուցողական քայլերի դիմեն: Դրանցից մեկը վերջերս Ստեփանակերտի օդանավակայանի շուրջ ստեղծած աղմուկն է: Սա մի քայլ է, որ ըստ իրենց՝ պետք է շեղի հանրության ուշադրությունն այն գռեհիկ հայտարարությունից, որ Ալիևն արել է ԵԽԽՎ նստաշրջանում:

-Արցախում մտահոգություններ չկա՞ն ռուս-ադրբեջանական հարաբերությունների ջերմացումից: Վերջին շրջանում դրանք կարծես մի տեսակ առավել ընդգծված են:

-Նախ՝ մենք պետք է պատկերացնենք, որ Ռուսաստանը գերտերություն է, և տարբեր տարածաշրջաններում, հատկապես՝ հարակից տարածաշրջանում, ունի իր շահերը: Նույն Ռուսաստանի համար, մանավանդ՝ ներկա դրությամբ, չափազանց կարևոր է, որպեսզի իր սահմանների ողջ երկայնքով իրավիճակը հնարավորինս կայուն լինի: Հետևաբար այդ ջերմացումը չպետք է տեսնել որպես հակահայկական քայլ: Ինչ վերաբերում է հնարավոր հակահայկական զարգացումներին, ապա ինքը՝ ՌԴ արտգործնախարար Սերգեյ Լավրովը, փարատել է այդ կասկածները՝ Երևանում հայտարարելով, որ Հայաստանը եղել է և կլինի ՌԴ ռազմավարական դաշնակիցը: Այնպես որ՝ ես դրան շատ հանգիստ եմ վերաբերում, ինչպես հանգիստ եմ վերաբերում Ադրբեջանի վերաբերյալ ԱՄՆ քաղաքականությանը: Մենք պետք է վաղուց հրաժարվեինք նման պահվածքից: Վերջապես կայացած պետություն ենք, երիտասարդ չենք, պետք է շատ սառը դատողությամբ մոտենանք այդ հարցերին: