Կանադայի Լիբերալ կուսակցությունը դատապարտել է արցախյան ուղղաթիռի խոցումը
Կանադայի խորհրդարանում Լիբերալ կուսակցության պատգամավոր Առնոլդ Չենը հայտարարություն է տարածել նոյեմբերի 12-ին ղարաբաղա-ադրբեջանական հակամարտ զորքերի շփման գծում ադրբեջանական կողմից ղարաբաղյան օդուժի ուղղաթիռի խոցման առիթով:
Կուսակցության կայքում ասված է, որ Չենը կուսակցության անունից իր ցավակցությունն է հայտնում երեք օդաչուների ընտանիքներին ու հարազատներին, որոնք իրենց կյանքն են կորցրել:
Կանադացի պատգամավորը նշում է, որ խորապես մտահոգ է, որ միջադեպը կարող է մեծացնել լարվածությունը շփման գծում: Նա դատապարտել է ուղղաթիռի խոցումը և խաղաղ բանակցությունների կոչ արել ԵԱՀԿ-ի Մինսկի խմբի ձևաչափում:
Նշվում է, որ «տևական խաղաղության ու անվտանգության համար ամենալավ ուղին բանակցային կարգավորումն է»:
Հիշեցնենք, որ նոյեմբերի 12-ին ղարաբաղա-ադրբեջանական սահմանի արևելյան հատվածի օդային տարածքում ժամը 13.45-ի սահմաններում ուսումնավարժական թռիչքի ժամանակ ադրբեջանական ԶՈՒ-ի կողմից խոցվել է ԼՂՀ ՌՕՈւ ՄԻ-24 ուղղաթիռը, ինչի հետևանքով զոհվել է ուղղաթիռի 3 հոգանոց անձնակազմը՝ մայոր Սերգեյ Սահակյանը, ավագ լեյտենանտ Սարգիս Նազարյանը, լեյտենանտ Ազատ Սահակյանը:
Նոյեմբերի 22-ին հաղորդվել է, որ ԼՂՀ զինված ուժերը ստիպված դիմել են նոյեմբերի 12-ին հակառակորդի կողմից խոցված ուղղաթիռի անձնակազմի ճակատագիրը անկման վայրում պարզելու և դրանից բխող խնդիրները լուծելու հատուկ նշանակության գործողության և մարտական խնդրի կատարման արդյունքում դեպքի վայրից տարհանվել են ուղղաթիռի անձնակազմից մեկի դին, երկու օդաչուների մասունքները և ուղղաթիռի որոշ անհրաժեշտ մասեր:










