«Ժառանգությունում» ջինն արդեն շշից դուրս է եկել. քաղաքագետը` հնարավոր պառակտումների մասին

Քաղաքագետ Գագիկ Համբարյանը, Tert.am –ի հետ զրույցում անդրադառնալով «Ժառանգություն» կուսակցությունում ներքին պառակտումներին և հնարավոր բեկորների պոկմանը,  նշեց, որ ջինն արդեն շշիշ դուրս է եկել, և հիմա արդեն հնարավոր է՝ այդ պոկումը ձևակերպվի դե յուրե: «Բավական երկար ժամանակ է՝ «Ժառանգության» անդամները չեն հարցնում Րաֆֆի Հովհաննիսյանի կարծիքը, կամ եթե այդքան գնահատում են նրա կարծիքը, ապա կարելի էր մտային կեղտը ջրի  երես չհասնելու մասին սկանդալային հայտարարություններ չանել և սպասել Րաֆֆի Հովհաննիսյանի գալուն, նոր ընդհանուր հայտարարի գային: Հիմա ինչքան էլ ուզում է՝ Րաֆֆի Հովհաննիսյանը գա, որևիցե հարց լուծի,  հայտարարություն անի, «Ժառանգությունում» ջինը շշից դուրս է եկել»,-ասաց նա:

-Պարո՛ն Համբարյան, կայքերից մեկին տված հարցազրույցում «Ժառանգությունում» ստեղծված իրավիճակը  պայմանավորել էիք նրանով, որ «ժառանգությունում» աջ ձեռքը չգիտի` ինչ է անում ձախը: Բայց չե՞ք կարծում, որ այս անգամ այդ դեպքը չէ,  քանի որ եթե ուրիշ անգամ քայլերի անհամաձայնության մասին է խոսք լինում,այս անգամ արդեն    Զարուհի Փոստանջյանը հայտարարում է,   որ  պետք է դնել  Բաղրամյան 26  գնացած   Արմեն Մարտիրոսյանի և  Ռուբիկ Հակոբյանի՝ կուսակցությունից  հեռացման հարցը։

-Նախագահի հետ հանդիպման գնալ-չգնալը քաղաքական կուլտուրայի մասին է խոսում, որովհետև դու կարող ես գնալ, բայց համաձայն չլինել (սահմանադրական փոփոխություններին) ու ունենալ սեփական տեսակետ: Եվ թեպետ շատ ճիշտ նկատեցիք, որ «Ժառանգությունում» սա առաջին դեպքը չէ, և ավելի կոնկրետ ` «Ժառանգությունը» պառակտվեց 2012-ի խորհրդարանական ընտրություններին, երբ  «Ժառանգության» լիդերը թույլ տվեց, որ իր ցուցակով Ազգային ժողով ներթափանցեն գրեթե բոլորին անծանոթ «Ազատ դեմոկրատներ» կուսակցության անդամները: Սա շատ մեծ պառակտում առաջացրեց, իսկ հիմա պառակտման գործըթնացը շարունակվում է, և արդեն պառակտվում է «Ժառանգության» կարկառուն դեմքերի բացեիբաց, սկանդալային վարքի հետևանքով: Այնպես որ՝  կրկնումեմ՝  հիմա «Ժառանգությունում» աջ ձեռքը չգիտի` ինչ է անում ձախը: Եվ հենց դրանով է պայմանավորված, որ շատ դեպքերում «Ժառանգության» անդամները տարբեր քաղաքական ուժերի հետ են համագործակցում վերջին շրջանում: Իսկ հիմա գործընթացը կարելի է ասել` հասել է կիզակետին:

-Հիմա իրենք սպասում են արտասահմանում գտնվող Րաֆֆի Հովհաննիսյանին,  Ձեր կարծիքով`  Րաֆֆի  Հովհաննիսյանը ո՞ր թեևին կպաշտպանի` Զարուհի Փոստանջյանի՞, թե՞ Մարտիրոսյանենց, ովքեր մեղադրվում են իշխանությունների հաճախորդը լինելու մեջ:

-  Ես հիմա չեմ կարող ասել` Րաֆֆի Հովհաննիսյանը կոնկրետ ում կպաշտպանի, դա իրենց ներքին խոհանոցն է, բայց պետք է նշեմ, որ նույն Րաֆֆի Հովհաննիսյանը, ժամանակին ընդունելով Նախագահի հրավերը , գնաց նախագահական պալատ, բանակցեց Նախագահի հետ, և դրա հետևանքները Դուք շատ լավ գիտեք:

- Եթե ջինը շշից դուրս է եկել, ինչ-որ բեկոր կպոկվի՞ կուսակցությունից, և եթե  «այո՛», ապա դա արմենմարտիրոսյանակա՞ն բեկորը կլինի, թե՞ Փոստանջյանի թևը:

-Խնդիրն այն է, որ եթե պոկվի էլ, ապա բեկոր  չի լինի, եթե հաշվի առնենք, որ կոնկրետ Ազգային ժողովում «Ժառանգությունը»,կարելի է  ասել, հավասարապես երեք մասի է բաժանված,  և պոկվելու դեպքում էլ գործըթնացը կլինի արդեն դե յուրե, քանի որ դե ֆակտո պոկված են: Իրենք վաղուց են պոկված, հիմա չէ, որ պետք է պոկվեն:

-Այնուամենայնիվ, ո՞ր թևը կմնա Րաֆֆի Հովհաննիսյանի հետ:

- Դա կախված է նրանից, թե Րաֆֆի Հովհաննիսյանը  որ թևին կնախընտրի: Հիմա դա արդեն Րաֆֆի Հովահաննիսյանի  որոշելիքն է, բայց այն, որ կուսակցությունը պառակտված է, դա փաստ է: