Ալիևի վերջին հայտարարություններն ասես միջնադարյան բռնապետի ելույթներ լինեն. Է. Շարմազանով

Հայաստանի Հանրապետական կուսակցության խոսնակ, ԱԺ փոխնախագահ Էդուարդ Շարմազանովը թեև նաև զավեշտալի է համարում Ադրբեջանի Նախագահ Իլհամ Ալիևի վերջին հայտարարությունները, բայց նաև զարմացած է և եվրոպական կառույցներին խորհուրդ է տալիս կարդալ՝ հասկանալու, որ դրանք հիշեցնում են միջնադարյան բռնապետի կամ Հիտլերի ելույթները:

«Զարմանալի և զավեշտալի է, երբ պետության ղեկավարը, նույնիսկ Ադրբեջան պետության ղեկավարը, որը Եվրոպայի խորհրդի անդամ է, ԱՊՀ անդամ, ով ինքը ունի դիվանագետի որակավորում, կարող է իրեն թույլ տալ նման բառապաշարով ելույթ»,- Tert.am-ի հետ զրույցում ասաց Էդուարդ Շարմազանովը և ավելացրեց, որ Ադրբեջանի Նախագահի պաշտոնը զբաղեցնող անձը ֆաշիզմ և ռասիզմ է քարոզում։

«Եվ այն, որ նրա քաղաքականության արդյունքում տարածաշրջանի անվտանգությանը կարող է վտանգ սպառնալ, սա փաստ է, և դա բոլորը պետք է գիտակցեն: Ինչքան աչքերը փակեն, այնքան պրոբլեմները շատ են լինում»,-ասաց Էդուարդ Շարմազանովը։

Հիշեցնելով ԵԽԽՎ-ում Իլհամ Ալիևի ելույթը ու պահվածքը՝ նա նկատեց. «Պատմությունը նրա համար է, որ պատմությունից դասեր քաղեն: Ժամանակին Եվրոպան աչք փակեց Ադոլֆ Հիտլերի վրա և 38 թվականին պայմանագիր ստորագրեցին, բայց Մյունխենյան գործարքից մեկ տարի անց Ադոլֆ Հիտլերը նախաձեռնեց Երկրորդ աշխարհամարտը, որը մեծագույն աղետ էր մարդկության պատմության համար: Եթե ցանկանում են երկրորդ օձը իրենց կրծքում տաքացնել, իրենց խնդիրն է։ Ես ընդամենը փաստում եմ պատմական ճշմարտություններ և այն, որ այսօր Ադրբեջանը դիկտատորական երկիր է. ժամանակները փոխենք ու դեմքերը, նույն հայտարարությունները 30-ականներին անում էր Ադոլֆ Հիտլերը»:

Հիշեցնենք, որ իր վերջին ելույթում Ադրբեջանի Նախագահը հայտարարել էր, թե քանի որ որոշներին դուր չի գալիս Ադրբեջանի կողմից վարվող անկախ քաղաքականությունը, գնալով ավելանում է իր երկրի վրա ճնշումը, և իբր այդ քարոզչական պատերազմի նպատակներից մեկն էլ Ադրբեջանը որպես ոչ ժողովրդավարական ու հետամնաց երկիր ի ցույց հանելն է: Ալիևի հայտարարությունների համաձայն՝ Ադրբեջանում առկա են ժողովրդավարական ազատություններ, ազատ հասարակություն, ազատ մամուլ: «Հապա մի նայեք որոշ երկրներում, որոնք մեզ փորձում են մեղադրել, ինչ վիճակ է: Բառացիորեն երեկ Եվրոպայի կենտրոնում ծեծվել, վիրավորանքների են ենթարկվել և կալանավորվել հարյուրավոր ցուցարարներ: Մյուս տեղերում մարդկանց խեղդում են, գնդակահարում և սպանում»,-առանց կոնկրետ հասցեատերերի նշել է Ալիևը, ապա հայտարարել, թե իբր միջազգային քաղաքականության մեջ առկա է կեղծավորություն, երկակի ստանդարտներ, ռասիզմ, իսլամատյացություն և այլատյացություն:

Զավեշտալի համարելով ալիևյան՝ «պատմական արդարությունը» վերականգնելու ու պատմական տարածքները հետ վերադարձնելու մասին հայտարարությունները (երբ խոսում է , թե հայկական տարածքները մինչև Զանգեզուր ու Երևան ադրբեջանական են)` Էդուարդ Շարմազանովը ևս մեկ անգամ խորհուրդ է տալիս կարդալ հունահռոմեական պատմիչներին` սկսած Ստրաբոնից:

«Եվ կհասկանա, որ ոչ միայն Երևանը, Հայաստանը, Լեռնային Ղարաբաղը իր պատմական հայրենիքի հետ կապ չունեն, այլև իր այսօրվա ղեկավարած պետության մեծ մասը կապ չունի իր պատմական հայրենիքի հետ»,-ասաց Էդուարդ Շարմազանովը:

Անդրադառնալով երեկ ղարաբաղա-ադրբեջանական սահմանին ադրբեջանական կողմից սանձազերծած դիվերսիոն գործողություններին՝ Շարմազանովը նշեց, որ դրա ողջ պատասխանատվությունը մնում է բացառապես Ադրբեջանի իշխանությունների վրա:

«Թե՛ հայ զինվորների, թե՛ ադրբեջանցի զինվորների արյունը բացառապես Ադրբեջանի իշխանությունների վրա է ընկնում, որովհետև Ադրբեջանի իշխանությունները և իրենց ղեկավարը տարիներ շարունակ քարոզում են հակահայկականություն, ֆաշիզմ և ռասիզմ: Իսկ Ալիևը դարձել է իր իսկ կողմից իրականացվող կեղծ գաղափարախոսության  գերին: Ալիևի քաղաքականությունն ինձ հիշեցնում է Սադամ Հուսեյնի և Ադոլֆ Հիտլերի քաղաքականությունն ու հայտարարությունները»,-մեկնաբանեց ՀՀԿ խոսնակը և Իլհամ Ալիևին խորհուրդ տվեց հիշել նրանց, ինչպես նաև բռնապետերի ու ֆաշիստական գաղափարախոսության կրողների ճակատագիրը:

«Ցավոք սրտի, ոչ միայն նրանց անձնական ճակատագրերն են վատը լինում, այլև իրենց ժողովուրդներին են իրենց հետ տանում դեպի կործանում»,-ավելացրեց նա: