Նեպալի իշխանությունները բացառել են փլատակների տակից ողջ մարդ գտնելու հավանականությունը (լուսանկարներ)
Նեպալի ներքին գործերի նախարարության փոխանցմամբ` ապրիլի 25-ին տեղի ունեցած կործանարար երկրաշարժի փլատակների տակից այլևս անհնար է ողջ մնացած մարդ գտնել:
Ինչպես նշում է lenta.ru-ն, նախարարության մամուլի քարտուղար Լաքշմի Պրասադ Դհաքալը նշել է, որ թեև ներկայում ակտիվորեն իրականացվում են որոնողափրկարարական աշխատանքներ, այդուհանդերձ՝ ողջ մնացած մարդ գտնելու հավանականությունը զրո է:
Հայտնի է, որ որոնողափրկարարական աշխատանքներին մասնակցում են մասնագետներ աշխարհի 20 երկրներից: Մարդկանց գտնելու համար նրանք օգտագործում են շների ու հատուկ սարքավորումներ:
Ըստ վերջին տվյալների՝ զոհերի թիվը 6.621 է, իսկ տուժածներինը` 14.023: Բացի այդ՝ 100-ից ավելի մարդ է մահացել հարևան Չինաստանում ու Հնդկաստանում:
Ներկայում աղետի գոտում նկատվում է պարենի, խմելու ջրի ու առաջին անհրաժեշտության պարագաների պակաս: Առանց կացարանի են մնացել տասնյակ հազարավոր մարդիկ:
Նեպալի իշխանությունները միջազգային հանրությունից կրկին օգնություն են խնդրել։ «Մեզ թունա և մայոնեզ են ուղարկում։ Ինչների՞ս է պետք։ Մեզ հացահատիկ, աղ ու շաքարավազ է պետք»,- ասել է ֆինանսների նախարար Ռամ Շարան Մահաթը։



















