Մասնագետները մատնանշել են Թբիլիսիի ողբերգության հավանական պատճառը

20:07 • 14.06.15

Թբիլիսիում հեղեղումների պատճառ կարող էր դարձած լինել Վերե գետի կիրճի սողանքը. այս մասին հայտնում է «Գազետա»-ն` վկայակոչելով մասնագետների գնահատականը կատարվածին:

Վրաստանի Երկրաբանության ազգային գործակալության ղեկավարությունը ասել է, որ Վերե գետի կիրճը «խցանած» սողանքը կարող էր լինել նման մասշտաբների ջրհեղեղի պատճառ:

Կառույցից ասել են, որ սողանքի հետևանքով արհեստական ջրամբար է ձևավորվել, որն էլ ողբերգության բուն պատճառ է դարձել: Մասնագետները հստակեցրել են, որ սողանքի հետևանքով կիրճում հավաքված ջուրը ճեղքել է փլուզված ամբարտակը` իր հետ բերելով արմատախիլ արված ծառեր և կեղտի զանգվածներ: Հենց վերջին հանգամանքներն են այդքան աղետալի հետևանքների պատճառ դարձել:

Այսօր գիշերը Վրաստանի մայրաքաղաքը ուժեղ անձրևների հետևանքով պատուհասել էր տարերային աղետը` հեղեղների տեսքով, որոնց հետևանքով առնվազն 12 մարդ է զոհվել, կան տասնյակ անհետ կորածներ:

Հունիսի 15-ը Վրաստանում հայտարարվել է սգո օր: