Շինանյութ, թեթև արդյունաբերություն, գյուղատնտեսություն, ՏՏ. ԵՏՄ արդյունաբերության նախարարը թվարկեց ՀՀ-ի հետ համագործակցության ուղղությունները

ՀՀ էկոնոմիկայի նախարարությունում հրավիրված արդյունաբերական համաժողովին քննարկման ներկայացվեց ԵՏՄ շրջանակներում անդամ պետությունների արդյունաբերական համագործակցության հիմնական ուղղությունների նախագիծը:

ԵՏՄ արդյունաբերության  և ագրոարդյունաբերության նախարար, կոլեգիայի անդամ Սերգեյ Սիդորոսկին նշեց, որ նախագիծը ներկայացնում են բոլոր անդամ երկրներում, իսկ մինչ այդ հասցրել են հանդիպել տեղական բիզնես ոլորտի ներկայացուցիչների հետ, քննարկել առավել գործնական քայլեր՝ կարճաժամկետ և միջնաժամկետ ծրագրերի համար՝ 5 տարվա կտրվածքով:
 

Սերգեյ Սիդորոսկին առանձնակի շեշտեց, որ Հայաստանը հանդիսանում է այն պետությունը, որը չունի միության հետ ընդհանուր սահման, և ուստի հասկանալ է պետք, թե ինչ հարցեր կան, որոնք կարճաժամկետ և երկարաժամկետ կտրվածքով կարող են լուծում ստանալ և Հայաստանի տնտեսությունը հասցնել ԵՏՄ-ի տնտեսական պահանջներին:

Լրագրողների հետ զրույցում արդեն հստակեցրեց, թե կոնկրետ որ ճյուղերն են առավել հեռանկարային՝ շինանյութերի արտադրություն, թեթև արդյունաբերություն, նաև գյուղատնտեսություն:

«Մենք այսօր  հստակ պատկերացում ունենք Հայաստանի արդյունաբերությունից: Պետք է այսօր տեսնել այն ոլորտները, որոնք այս համատեքստում կզարգանան: Օրինակ՝ դուք ունեք լավ շինանյութ, իսկ այսօր միության անդամ երկրներում մեծ ծավալի շինանյութ է օգտագործվում: Ես կարծում եմ, որ այս ճյուղը Հայաստանի համար հեռանկարային է: Շինանյութ հիմա ներկրվում է ոչ միության անդամ երկրներից, ուստի հիմա պետք է այն փոխարինել հայկական արտադրանքով, ինչը կարճ ժամանակում կարծում եմ կարվի»,- ասաց նա և հեռանկարային համարեց նաև հայկական կոշիկի արտադրանքը,  տրիկոտաժը, որոնք պետք է զարգացնել և ԵՏՄ շուկաներ հանել:

Իսկ թե ինչ ներդրումների հաշվին, պատասխանեց, որ Եվրասիական բանկի հետ աշխատել են այս ծրագրերի շուրջ, դրանք  կլինեն ներդումային բոլոր անդամ երկրների համար և կուղղվեն այն ոլորտներին, որոնք հեռանկարային են:

Նա նաև հավելեց, թե քննարկվել է գյուղատնտեսության ոլորտը: «Ձեզ համար այս ոլորտի զարգացման համար պետք են մեքենաներ, տրակտորներ, կոմբայններ, ուղղակի դրանք ավելի երկարաժամկետ ծրագրերի համար»,- ասաց նա:

Իսկ հարցին, թե տարվա կտրվածքով տնտեսական անկումը շարունակություն կունենա արդյոք և ինչպես ԵՏՄ-ին կհաջողվի փակել տարին, Սերգեյ Սիդորոսկին միանշանակ պատասխանել չկարողացավ, բայց հույս հայտնեց, որ կհաջողվի խուսափել դրանից: «Չէի ասի, որ միանշանակ անկում կլինի, կան  տնտեսական հատվածներ, որոնք աճ են գրանցում և կան ճյուղեր, որոնք անկում են ունենում»,- ասաց նա և նշեց, որ հիմնականում խնդիրները արտահանման են վերաբերվում, և հավելեց, որ նման բացասական միտումները միայն ԵՏՄ-ի համար չեն և խնդիրը գլոբալ է: 

«Առևտրաշրջանառության անկումն այսօր ոչ միայն Եվրասիական միությունում է, այլ նաև այլ երկրներում, այդ թվում նաև մեր այնպիսի գործընկերների հետ, ինչպիսին Եվրամիությունն է, Չինաստանը, Ասիան, Մերձավոր Արևելքը»,- ասաց նա:

ԵՏՄ արդյունաբերության  և ագրոարդյունաբերության նախարարը նշեց, որ իրենց խնդիրն է  վերափոխել ընդհանուր տնտեսության առանձնահատկությունը և անդամ երկրների համար շղթայական զարգացում ապահովել: Ըստ նրա՝ աշխատանքներն արդեն իսկ արդյունք են տալիս, որոնք հիմնված են գիտատեխնիկական ուղղության վրա և որն էլ թույլ է տալիս ենթադրել, որ անկում չի լինի: Հեռանկարային ճյուղերից թվարկեց ՏՏ ոլորտը, վերամշակման ձեռնարկատիրությունները:

Ընդհանուր տնտեսական վիճակի համար, ըստ նրա՝ տնտեսական աճ կապահովի միության երկրներից Ղազախստանը՝ 1-2%-ով: Բելառուսը այսօր  ունի անկում նախորդ տարվա համեմատ, ՌԴ-ն նույնպես նույն մակարդակի է, իսկ Հայաստանի  համար նշեց, որ ոլորտային դրական դինամիկա կա, մասնավորապես՝ գյուղոլորտում: