Ադրբեջանի խորհրդարանական ընտրություններում հաղթել է Ալիևի կուսակցությունը. պատգամավոր է ընտրվել նաև երկրի առաջին տիկինը

10:45 • 02.11.15

Ադրբեջանում կիրակի օրը կայացած խորհրդարանական ընտրություններում հաղթել է իշխող «Ենի Ազերբայջան» («Նոր Ադրբեջան») կուսակցությունը։

 

Ինչպես տեղեկացնում է «Թրենդ» գործակալությունը, այդ մասին ասված է Ադրբեջանի ԿԸՀ-ի հրապարակած նախնական տեղեկություններում։

 

125 շրջաններից 71-ում հաղթել է իշխող կուսակցության թեկնածուն։ Պատգամավոր է ընտրվել նաև Ադրբեջանի առաջին տիկին Մեհրիբան Ալիևան:

 

Իլհամ Ալիևի կինը երկրի Միլլի Մեջլիսում պատգամավոր է եղել նաև 2005 և 2010 թվականներին:

 

Անկախ թեկնածուներին հաջողվել է ընտրություններում հաղթել 42 շրջաններում: «Քաղաքացիական համերաշխություն» կուսակցությունից ընտրվել է 2 թեկնածու, իսկ 10 այլ կուսակցություններից՝ մեկական:

 

Ըստ նախնական տվյալների՝ ընտրողների ակտիվությունը կազմել է 55.7 տոկոս: Քվեարկությանը մասնակցել է ավելի քան 2.89 մլն ընտրող:

 

Խորհրդարանի 125 տեղերի համար պայքարել են 767 թեկնածուներ: Ընտրություններին մասնակցել են 15 կուսակցությունների ներկայացուցիչներ, ևս 7 քաղաքական ուժեր միավորվել են «Ազադլըգ-2015» («Ազատություն-2015») բլոկում:

 

Ադրբեջանում ընտրելու իրավունք ունի մոտ 5.2 մլն մարդ: Քվեարկության օրը բաց է եղել ավելի քան 5.500 ընտրատեղամաս։