Գուանչժոու քաղաքում գնացքների հետաձգման պատճառով մոտ 100.000 մարդ է կուտակվել

Մոտ 100 հազար մարդ է կուտակվել չինական Գուանչժոուի երկաթուղային կայարանի մոտ՝ գնացքների ուշացումների պատճառով, հաղորդում է РИА Новости-ն։

Հաղորդվում է, որ փետրվարի 1-ի երեկոյան թաց ձյան և անձրևի պատճառով մի քանի գնացքի մեկնումը հետաձգվել է: Կայարան ժամանած մարդկանց թիվն աստիճանաբար սկսել է ավելանալ, իշխանությունները ստիպված են եղել արտակարգ իրավիճակների համար նախատեսված գործողությունների ծրագիր կիրառել։

Ընդհանուր առմամբ, կայարանի մոտ կուտակվել է մոտ 100 հազար մարդ: Իշխանությունները խնդրում են ուղևորներին կայարան չժամանել ավելի վաղ, քան իրենց գնացքի մեկնումից երեք ժամ առաջ։

Իրավիճակը բարդացնում է այն, որ այժմ Չինաստանում շարունակվում է «Չունյուն» ուղևորությունների ամանորյա սեզոնը, որը համարվում է աշխարհում ամենախոշոր միգրացիոն երևույթը։ Հարյուր միլիոնավոր չինացիներ մեկնում են տուն՝ Նոր տարին ընտանիքի հետ անցկացնելու համար: Այն սկսվել է հունվարի 24-ին և կտևի մինչև մարտի 3-ը։

Սեզոնի մեկնարկից ի վեր Չինաստանի տրանսպորտային համակարգն ամեն օր տեղափոխում է ավելի քան 70 միլիոն ուղևորի։