Մենք վերջնականապես վերջակետ չենք դրել բանակցային գործընթացին, թեև կա նման հնարավորություն. Վահրամ Բաղդասարյան (տեսանյութ)

ՀՀԿ-ն Լեռնային Ղարաբաղի անկախությունը ճանաչելու հարցում ունի հետևյալ դիրքորոշումը` քաղաքական այս զարգացումների իրավիճակում մենք որևէ մեկ անգամ չենք ժխտել, որ ապրիլյան դեպքերից հետո կա նման անհրաժեշտություն: Այս մասին Tert.am-ի հետ զրույցում ասաց ԱԺ «Հանրապետական» խմբակցության ղեկավար Վահրամ Բաղդասարյանը:

Ըստ նրա՝ անհրաժեշտությունը պայմանավորված է նրանով, որ ադրբեջանական կողմն անգամ պայմանական հրադադարը խախտում է:
 

«Մենք միշտ ժխտել ենք, որ կրակոցների դեպքում, հրադադարի դեպքում, երբ մեր զինվորները զոհվում են, կնստենք, կբանակցենք: Հանրապետության Նախագահի կողմից հնչեցվեց, որ պետք է հավատարիմ մնանք 94-ի հրադադարի պայմանագրին, որ ստորագրող կողմերը հավատարիմ մնան իրենց ստորագրությանը, որ երաշխիքներ լինեն միջազգային կառույցների կողմից, որ նման իրավիճակ այլևս չի կրկնվի, կտեղադրվեն սահմանի ողջ երկայնքով հետաքննող սարքեր»,- շեշտեց Վահրամ Բաղդասարյանը:
 

ՀՀԿ խմբակցության ղեկավարը նկատեց, որ Հայաստանն իրավունք չունի դիվանագիտական անզգուշություն թույլ տալ, սխալվել:
 

«Գնդակը պետք չէ տեղափոխել մեր դաշտը: Մենք որևէ մեկ անգամ ԼՂ անկախությունը ճանաչելու հարցը մեր օրակարգից չենք հանելու: Սա հեռու ապագայի հարց չէ: Մի փոքր համբերատարություն պետք է ցուցաբերենք: Փոքր անզգուշությունը, սխալը, կարող է միջազգային հանրության հետ ունեցած մեր հարաբերությունների, դիվանագիտական հաջողությունների վրա ազդել: Երբ լինի պատեհ պահը, համայն հայությունը դա կլսի նախագահի շուրթերից»,-նշեց Վ. Բաղդասարյանը:
 

Հիշեցմանը, որ նախագահը դեկտեմբերին լրագրողների հետ հարց ու պատասխանի ժամանակ հայտարարել էր, որ եթե ՀՀ-ն ճանաչի ԼՂ անկախությունը, «էլ ի՞նչ բանակցություններ, բանակցությունների այլընտրանքը՝ պատերազմն է», պատգամավորն արձագանքեց. «Բնականաբար, դրա մասին է խոսքը, երբ ես ասում եմ, որ անզգույշ քայլեր չպետք է անենք: Սա ամենավերջին տարբերակն է, երբ նման երևույթներ նկատվեն ագրեսոր Ադրբեջանի կողմից, երբ Ադրբեջանը գնա պատերազմի: Այդ դեպքում մենք պատրաստ ենք, մեր բանակը մարտունակ է, ու մեզ մնում է կատարել այս քայլը: Բայց դեռ այս աստիճանի չի հասել, այդ կետում չենք, որ այդ քայլը կատարենք, որովհետև հենց ադրբեջանական կողմն է խնդրել հրադադար, հիմա ականջալուր են լինում բանակցություններին»:
 

Հարցին՝ Հայաստանը դեռ ակնկալիքներ ունի՞, որ բանակցությունները կօգնեն լուծել հակամարտությունը, Բաղդասարյանը պատասխանեց. «Եթե չլիներ ակնկալիք, մեր քայլերի հաջորդականությունն այլ կլիներ: Մենք վերջնականապես վերջակետ չենք դրել բանակցային գործընթացին, թեև կա նման հնարավորություն»:
 

Հարցազրույց ամբողջությամբ՝ Tert.am-ի տեսանյութում։