«Սասնա ծռերի» կողմից ՊՊԾ գնդի գրավման 2 շաբաթների խրոնիկան

Հուլիսի 17-ից հանրապետությունում ստեղծված աննախադեպ իրավիճակը, երբ «Սասնա ծռեր» խմբի անդամները գրավեցին Ոստիկանության պարեկապահակային ծառայության գունդը, հանգուցալուծում ստացավ հուլիսի 31-ին, երբ խմբի անդամները զենքը վայր դրեցին և հանձնվեցին իրավապահներին։ Tert.am-ը ներկայացնում է այս իրադարձությունները հակառակ` ամենաթարմ դեպքերի ժամանակագրությամբ։

Հուլիսի 31

Ժամը 20։00-21։00-ի միջակայքում Ոստիկանության պարեկապահակային ծառայության գնդի տարածքը գրաված «Սասնա ծռեր» զինված խմբավորման անդամները վայր են դնում զենքը և   հանձնվում իշխանություններին: Ձերբակալվում է 20 զինյալ, ՊՊԾ գնդի տարածքն ամբողջությամբ ազատագրված է:

Ժամը 18։00-ի սահմաններում ՊՊԾ գունդը գրաված «Սասնա ծռեր» խմբի անդամ Վարուժան Ավետիսյանը հարցազրույց է տալիս, որում հայտարարում  է, որ որոշել են չգնալ արյունահեղության և պայքարը շարունակել «ռազմագերու կարգավիճակով»:

Ազատության հրապարակում անցկացվող հանրահավաքում ևս հայտարարվում էր զինված խմբի հանձնվելու մասին:

Հետախուզման մեջ գտնվող Գարեգին Չուգասզյան Facebook-ում տեղեկացնում է, որ պայքարը շարունակելու են բանտից և ընդհատակից:

Նույն օրը կեսօրին հայտնի է դառնում, որ ՊՊԾ գնդի ներսում մնացած երկու բուժաշխատողները դուրս են եկել: Նրանք են`  բժիշկ Նորայր Թևանյանն ու  բուժքույր  Մալինա Մարգարյանը, բժիշկ Սալվադոր Խեչոյանը գնդի տարածքը լքել էր նախօրեին, բուժակ Դավիթ Տոնոյանին խմբի անդամներն ազատ էին արձակել դրանից երկու օր առաջ: Դրան նախորդել էր Եվրամիության կոչ–հայտարարությունը` անմիջապես ազատ արձակել պատանդ պահվող բուժաշխատողներին:

Կիրակի դատարանը բավարարում է «Դատապարտյալների հիվանդանոցում» գտնվող Պավել Մանուկյանին 2 ամսով կալանավորելու քննիչի միջնորդությունը:

Նույն օրը գնդի տարածքը լքում են ՊԾ գնդի զինված խմբի անդամներ Ռուբեն Գրիգորյանն ու Գևորգ Մելքոնյանը և պատմում, որ տեղեկացված չեն եղել, թե ինչի էին գնում:

Հիշեցնենք, որ հուլիսի 31-ի դրությամբ Երևանի Խորենացի փողոցում և Սարի թաղում գիշերը տեղի ունեցած բախումների հետևանքով ընդհանուր վնասվածքներ ստացած 73 հոգուց 22-ը  շարունակում էին  բուժում ստանալ հիվանդանոցներում:

Հակաճգնաժամային նախաձեռնող խորհրդի ազատության մեջ մնացած 4 անդամներից Ալբերտ Բաղդասարյանը հայտարարում է իր լիազորությունները վայր դնելու մասին:

Խորհրդի ձերբակալված և/կամ կալանավորված անդամների  թվում են` քաղաքագետ Անդրիաս Ղուկասյանը, «Ժառանգություն» կուսակցության փոխնախագահ Արմեն Մարտիրոսյանը, Հիմնադիր խորհրդարանի անդամ Ալեք Ենիգոմշյանը:






Հուլիս ի 30

Ազատության հրապարակում մեկնարկած հանրահավաքը փշալարերով արգելապատված Բաղրամյան փողոցում է: Մի քաղաքացի, ի նշան բողոքի բենզին է լցնում իր վրա ու այրվածքներ ստանալով` տեղափոխվում հիվանդանոց: Հորդ անձրևի պատճառով և մյուս օրը հավաքվելու մտադրությամբ հանրահավաքի մասնակիցները ցրվում են:

Նախքան այդ նրանք երթ էին անում Երևանի փոքր կենտրոնով` մտադիր լինելով կոնսենսուսով որոշել` արդյո՞ք գնալու են Խորենացի փողոց, որտեղ ավելի վաղ հայտարարվել էր, որ արգելված են զանգվածային երթերը, ցույցերն ու հանրահավաքները:

Նույն օրը ժամը 16-ին Ազգային անվտանգության ծառայությունը վերջնագիր է ներկայացնում զինյալներին` նշելով, որ իշխանություններին հանձնվելու վերջին ժամկետը նույն օրվա ժամը 17։00-ն է: Զինյալները չեն հանձնվում և գրեթե միաժամանակ հայտնի է դառնում, որ ՊՊԾ գնդի տարածքից դիպուկահարի արձակած կրակոցից սպանված է ոստիկանության աշխատակից Յուրի Տեփանոսյանը:

«Սասնա ծռերը» հերքում է, թե կրակոցն իրենք են արձակել:






Հուլիսի 29

ՊՊԾ գնդի գրավման 15-օրերից  ամենադրամատիկն է, երբ  Խորենացի փողոցում և Սարի թաղում սկսվում են բախումներ ցուցարարների և ոստիկանների ու անհայտ քաղաքացիական անձանց միջև,  այն բանից հետո, երբ մի խումբ թեքվում են դեպի Սարի թաղ ու փորձում  ՊՊԾ գնդի անվտանգության գոտին ճեղքել. ոստիկանությունը հատուկ միջոցներ է կիրառում. տեղի ունեցած բախումների արդյունքում տուժում են բազմաթիվ լրատվամիջոցների («Արմենիա» հեռուստաընկերություն, «Ազատություն» ռադիոկայան, ռուսական lifnenews.ru, «A1 պլյուս», «Առաջին լրատվական») լրագրողներ  և օպերատորներ, վնասվեց նաև տեխնիկա:

Շտապ օգնության մեքենաներով մայրաքաղաքի 5 բժշկական հաստատություն է տեղափոխվում  տարբեր վնասվածքներով 60 տուժած։ 17 –ամյա մի երիտասարդ կորցնում է աչքը, մի երիտասարդ աղջիկ ստանում է այրվածքներ: Ծանր էր նաև «Էրեբունի» բժշկական կենտրոն տեղափոխված 5 ոստիկանից մեկի վիճակը, ով որովայնի հրազենային վնասվածք ուներ:

Զուգահեռ սոցիալական ցանցերում տարածվում էին տեղեկություններ, թե, իբր, արտերկրից դիպուկահարներ են կանչվել, ինչն իրավապահների կողմից հերքվեց:

Նույն օրը, հետկեսօրին, երբ իրադարձությունները դեռ նման ընթացք չէին ստացել, հայտնի է դառնում, որ «Սասնա ծռեր» խմբավորման անդամներից  վիրավորված է Արայիկ Խանդոյանը` «Միայնակ գայլը», ով  հրաժարվում է «Էրեբունի» բժշկական կենտրոն տեղափոխվել՝ նախընտրելով բուժօգնությունը տեղում ստանալ: Սակայն խմբի անդամ Արմեն Լամբարյանը, ով ևս հրազենային վիրավորում ուներ, տեղափոխվում է «Էրեբունի» բժշկական կենտրոն:

Նույն օրը ազատ է արձակվում Գյումրի լրագրողների «Ասպարեզ» ակումբի նախագահ Լևոն Բարսեղյանը, քանի որ քրեագիտական փորձաքննության եզրակացությունը, և եզրակացության համաձայն՝ Լևոն Բարսեղյանի մոտ անձնական խուզարկությամբ հայտնաբերված դանակը սառը զենք չի կարող համարվել։

Նույն օրը կալանավորվում է «Հիմնադիր խորհրդարան»-ի անդամ Ալեք Ենիգոմշյանը՝ «Սասնա ծռերին» օժանդակելու կասկածանքով:







Հուլիսի 28

Իրավիճակը համեմատաբար հանգիստ էր, թեպետ այս օրվա դրությամբ Երևանի բժշկական կազմակերպություններում ՀՀ ոստիկանության պարեկապահակային ծառայության գնդի տարածքում զինված միջադեպի և հետագա զարգացումների հետևանքով հիվանդանոցային բուժօգնություն էր ստանում 11 հիվանդ, որից 4-ը` ոստիկան:

Հուլիսի 28-ի դրությամբ Վիտալի Բալասանյանի միջնորդական առաքելությունը դադարեցված էր, սակայն այս օրը նախորդող երկու օրերին Երևանի Խորենացի փողոցում գտնվող գնդի հարակից տարածքում և Ազատության հրապարակում  քաղաքացիները հանրահավաքներ էին կազմակերպում՝ հաջակցություն զինված խմբի անդամների։





Հուլիսի 27

Ոստիկանությունը հաղորդում է, որ պարեկապահակային ծառայության (ՊՊԾ) գնդի տարածքը գրաված զինված խումբը պատանդ է վերցրել բժիշկների, որոնք ահազանգ ստանալով ՊՊԾ գնդի տարածքում  երկու վիրավորների մասին` մեկնել էին դեպքի վայր: «Սասնա ծռերը» հայտարարում են, որ նրանք պատանդի կարգավիճակում չեն, սակայն իրավապահները հակառակն են պնդում:

Օրվա երկրորդ կեսին Առողջապահության նախարարության մամուլի քարտուղար Անահիտ Հայթայանը ֆեյսբուքյան էջում տեղեկացնում է, որ Ոստիկանության ՊՊԾ գնդի տարածքում բուժաշխատողներից մեկը` բուժակ Դավիթ Տոնոյանը, ազատ է արձակվել, սակայն բրիգադի 3 անդամները շարունակվում են մնալ ՊՊԾ գնդում: ՊՊԾ գունդը գրաված «Սասնա ծռերն» արգելել է գնդի տարածքից դուրս գալ շտապ օգնության բժիշկներին՝ պահանջելով նոր հերթափոխ:

Հայտնի է դառնում, որ Ալեք Ենիգոմշյանին ԱԱԾ-ը բերման է ենթարկել Ազատության հրապարակից:

Նախորդ  գիշեր Ոստիկանության և «Սասնա ծռեր» ջոկատի միջև տեղի ունեցած հրաձգության հետևանքով վիրավորված Աշոտ Պետրոսյանը և Հովհաննես Հարությունյանը, որոնք տեղափոխվել էին  «Էրեբունի» ԲԿ, տեղափոխվեցին դատապարտյալների հիվանդանոց։

«Սասնա ծռեր» զինված խմբի 31 անդամներից այդ օրվա դրությամբ Երևանի Ոստիկանության պարեկապահակային ծառայության գնդում շարունակում են մնալ 24 անձ:

Այդ օրվա դրությամբ զինված խմբի անդամներից Պավլիկ Մանուկյանը և նրա որդին՝ Արամ Մանուկյանը նախօրդ գիշերը տեղի ունեցած փոխհրաձգության հետևանքով հրազենային վիրավորում էին ստացել և տեղափոխվել հիվանդանոց: Ավելի վաղ վիրավորվել և հոսպիտալացվել էին Աշոտ Պետրոսյանը և Հովհաննես Հարությունյանը: Գնդի գրավման օրը վիրավորվել և հոսպիտալացվել էր նաև Թաթուլ Թամրազյանը:

Զինված խմբի անդամներից ըստ ոստիկանության՝ հանձնվել էին Գագիկ Եղիազարյանը և Արամ Հակոբյանը: 

Այսպիսով, հուլիսի 27-ի դրությամբ ՊՊԾ գնդում են դեռևս Տիգրան Մանուկյանը, Արեգ Կյուրեղյանը, Արմեն Լամբարյանը, Սմբատ Բարսեղյանը, Էդվարդ Գրիգորյանը, Արմեն Բիլյանը, Վարուժան Ավետիսյանը, Մխիթար Ավետիսյանը, Թորոս Թորոսյանը, Վարդան Գերավետյանը, Գևորգ Իրիցյանը, Սեդրակ Նազարյանը, Արայիկ Խանդոյանը, Սերգեյ Կյուրեղյանը,  Մարտիրոս Հակոբյանը,  Արթուր Սողոմոնյանը,  Հովհաննես Վարդանյանը, Ռուբեն Գրիգորյանը, Արայիկ Հակոբյանը,  Արթուր Մելքոնյանը, Էդգար Սողոմոնյանը, Գևորգ Մելքոնյանը, Գառնիկ Հովակիմյանը և  Տիգրան Սարգսյանը:

Զուգահեռ ընթանում է հանրահավաքնը. «Ժառանգություն» կուսակցության նախագահ Րաֆֆի Հովհաննիսյանն առաջարկում է կենտրոնանալ ազգային օրակարգի վրա, բոլոր կողմերին` վայր դնել զենքերը և խնդրի լուծումը բանակցային ճանապարհով գտնել:






Հուլիսի 26

Զինյալները այս, ինչպես նախորդ երեք օրերին հայտարարում են, որ զրկված էին սննդից: Պատգամավոր Զարուհի Փոստանջյանը ապարդյուն փորձում է սնունդ մտցնել գնդի տարածք: Քիչ անց հայտնի է դառնում, որ մի քաղաքացու հաջողել է ճեղքել սննդով բեռնված մեքենայով  ոստիկանության պատը ու սնունդ հասցնել խմբի անդամներին:

Ավելի ուշ Ոստիկանության հասարակայնության հետ կապերի և լրատվության վարչության պետ Աշոտ Ահարոնյանը տեղեկացնում է, որ Խորենացի փողոցում զինված խմբի կողմից զավթված ՀՀ ոստիկանության պարեկապահակային ծառայության գնդից անկանոն կրակոցներ են արձակվել` վտանգելով նշված վայրում ծառայություն իրականացնող իրավապահների և տարածքի բնակիչների անվտանգությունը:

Գիշերը ՊՊԾ գնդի տարածքում վիրավորված և հիվանդանոց տեղափոխված Աշոտ Պետրոսյանը կալանավորվում է: Բերման ենթարկված ակտիվիստ Անի Նավասարդյանն ազատ է արձակվում:

Ազատության հրապարակում ընթացող հանրահավաքին պահանջում են, որ շարժումը ղեկավարի Նիկոլ Փաշինյանը, ով հրաժարվում է:






Հուլիսի 25

Մամուլում հաղորդվում է, որ ԼՂՀ պատգամավոր Վիտալի Բալասանյանի միջնորդությամբ ընդհատված բանակցային գործընթացը վերսկսվել է:







Հուլիսի 24

«Հիմնադիր խորհրդարանը» տարածած հաղորդագրությամբ տեղեկացնում է, որ «Սասնա ծռերը» հայտնում են, որ ՊՊԾ գնդի ներսում անջատել են էլեկտրականությունը։ Նրանք զրկված են նաև սննդից:








Հուլիսի 23

ՊՊԾ գնդից ազատ են արձակվում վերջին 2 ոստիկան պատանդները՝ Վալերի Օսիպյանն ու Վարդան Եղիազարյանը: Նույն օրը Վիտալի Բալասանյանի միջնորդությամբ լրագրողները մուտք են գործում գնդի տարածք` լուսաբանելու զինյալների մամուլի ասուլիսը:







Հուլիսի 22

Նախագահ Սերժ Սարգսյանն Ազգային անվտանգության ծառայության, Ոստիկանության, Դատախազության և քննչական մարմինների ղեկավարների մասնակցությամբ խորհրդակցությունից հետո հայտարարում է,որ Հայաստանում բռնի ուժով, պատանդ վերցնելով հարցեր չեն լուծվելու և կոչ անում, որպեսզի զինված խումբը վայր դնի զենքը:

Նույն օրը «Հիմնադիր խորհրդարանի» անդամ Կարո Եղնուկյանը կալանավորվում է: Քրեական օրենսգրքի 218-րդ և 219-րդ հոդվածներով՝ պատանդ վերցնելուն, շենքեր, շինություններ, տրանսպորտի, հաղորդակցության կամ կապի միջոցներ զավթելուն աջակցելու մեղադրանքով:






Հուլիսի 21

Զինված խմբի անդամները ազատ են արձակում երկու պատանդ ոստիկանների: Իրավիճակը համեմատաբար խաղաղ է, սակայն հայտնի է, որ նախօրեին` հուլիսի 20-ի գիշերը կոշտ բախումների արդյունքում բերման է ենթարկվել 136 անձ, որոնցից 16 ձերբակալվել են ` ՀՀ քրեական օրենսգրքի 316-րդ հոդվածի շրջանակներում հարուցված քրեական գործի շրջանակներում: 





Հուլիսի 20

Ցուցարարների ու ոստիկանների միջև տեղի են ունենում կոշտ բախումներ, ինչի հետևանքով` կիրառվում են լուսաձայնային նռնակներ, այն բանից հետո, երբ ցուցարարներից ոմանք քարեր ու «պուգաչներ» են նետում ոստիկանների ուղղությամբ:

Այս գործողությունների հետևանքով հուլիսի 20-ի լույս 21-ի գիշերը մայրաքաղաքի տարբեր բուժկենտրոններ «գազային թունավորում» և «սալջարդ» ախտորոշումներով տեղափոխվում է 51 անձ՝ ոստիկաններ ու քաղաքացիներ, որոնց կյանքին, բարեբախտաբար, ինչպես հաղորդվեց, վտանգ չէր սպառնում:

Նույն գիշերվա ընթացքում բերման են ենթարկվում 136 անձինք, որոնցից 16 ձերբակալվում են` ՀՀ քրեական օրենսգրքի 316-րդ հոդվածի շրջանակներում հարուցված քրեական գործի շրջանակներում:

Ավելի ուշ կալանավորվում են ևս մի քանի անձինք, ովքեր մեղադրվում են խմբի հետ հանցավոր կապեր ունենալու և/կամ զանգվածային անկարգությունների հրահրման մեջ:






Հուլիսի 19


Հայտնի է դառնում ԼՂՀ պատգամավոր Վիտալի Բալասանյանի միջնորդական ջանքերի մասին: ԱԺ պատգամավոր Նիկոլ Փաշինյանին, ով մուտք էր գործել գնդի տարածք և այնտեղ իրականացված նկարահանումներ ու հարցազրույցներ հրապարակել խմբի անդամները մեղադրանք են ներկայացնում՝ «արյան վրա ձեռքերը տաքացնելու մեջ»:

Հուլիսի 19-ին և 18-ին հայտնի է դառնում, որ Մովսես Խորենացի փողոցում կատարվող իրադարձությունները նաև ակտիվ միջազգային արձագանք ունեն. հետևում են ՀՀ ԵՄ պատվիրակության, ՌԴ ԱԳՆ-ի և ԱՄՆ Պետքարտուղարության արձագանքները, որոնցում դատապարտվում էր զենքի միջոցով ոստիկանական շենքի գրավումը: 

«Մենք վճռականորեն դատապարտում ենք Երևանում ոստիկանության շենքի զինված գրավումը: Անընդունելի ենք համարում այդ քրեական դրսևորումները, որոնք վտանգ են ներկայացնում հանրապետության քաղաքացիների համար»,- ասում է ՌԴ ԱԳՆ պաշտոնական ներկայացուցիչ Մարիա Զախարովան:

Իսկ ԱՄՆ Պետքարտուղարության փոխխոսնակ Մարկ Թոներն էլ հայտարարում է. «Մենք խստորեն դատապարտում ենք բռնության միջոցով քաղաքական փոփոխություններ իրականացնելու եղանակը Հայաստանում և այլուր, և խրախուսում ենք Հայաստանի իշխանություններին իրադրությունը շտկելու համար ցուցաբերել համապատասխան զսպվածություն»:

ՌԴ-ն հավելյալ հանդես է գալիս մեկ այլ հայտարարությամբ՝ ԵՄ պատվիրակության հայտարարության մեկնաբանությամբ` նշելով, որ Եվրամիության դիվանագետները սիրաշահում են Հայաստանում «իրադրությունը սրող» ուժերին՝ «մտահոգությամբ ընդգծելով անհամաչափ ուժի կիրառման և ոստիկանության կողմից իրականացված զանգվածային ձերբակալությունների մասին զեկույցները» և/կամ իշխանություններին կոչ անելով՝ հարգել «համաչափության սկզբունքը խաղաղ բնույթի, ինչպես նաև՝ բռնությամբ ուղեկցվող հանրային բողոքի ակցիաների ժամանակ»:




Հուլիսի 17

Առավոտյան ժամը 5-ի սահմաններում «Սասնա ծռեր» խմբավորումը հաղորդագրություն է տարածում, որում ասվում է, որ ապստամբների 31 հոգանոց զինված խումբը՝ «Սասնա ծռերը», գրավել է Ոստիկանության պարեկապահակային գունդը և պահանջում է Նախագահ Սերժ Սարգսյանի հրաժարականը, Ժիրայր Սեֆիլյանի և մյուս բոլոր քաղբանտարկյալների ազատ արձակում: ՊՊԾ գնդի վրա հարձակման հետեւանքով սպանվում է գնդապետ Արթուր Վանոյանը, ևս 4 անձ հրազենային վիրավորում է ստանում։

Գունդ գնացած Երևանի փոխոստիկանապետ Վալերի Օսիպյանը և ՀՀ փոխոստիկանապետ Վարդան Եղիազարյանը հայտնվում են պատանդի կարգավիճակում: