Իտալիայի վարչապետն արտակարգ դրություն է հայտարարել երկրաշարժից տուժած շրջաններում

09:02 • 26.08.16

Իտալիայի վարչապետ Մատեո Ռենցին արտակարգ դրություն է հայտարարել լույս չորեքշաբթի տեղի ունեցած երկրաշարժից տուժած շրջաններում, հայտնում է BBC-ի ռուսական ծառայությունը:

 

Վերջին տվյալներով՝ աղետի հետևանքով զոհերի թիվը հասել է 250-ի: Նրանց մեծ մասը՝ մոտ 200 հոգի, մահացել է Ամատրիչե քաղաքում:

 

Տուժածներին օգնություն տրամադրելու համար Իտալիայի կառավարությունը հատկացրել է 50 միլիոն եվրո: Ռենցին խոստացել է, որ շուտով կհատկացվեն լրացուցիչ միջոցներ:

 

Արդեն երկրորդ գիշերն է, ինչ ավերված քաղաքներում շարունակվում են որոնողա-փրկարարական աշխատանքները, որոնք բարդանում են պարբերաբար տեղի ունեցող ստորգետնյա ցնցումների պատճառով:

 

Իտալիայի մշակույթի նախարարությունը հայտարարել է, որ տուժածներին որպես օգնություն կտրամադրվեն բոլոր միջոցները, որոնք կհավաքվեն առաջիկա կիրակի օրը թանգարաններ այցելությունների տոմսերի վաճառքից:

 

6,2 մագնիտուդով երկրաշարժը տեղի է ունեցել Իտալիայի կենտրոնական հատվածում՝ Պերուջա քաղաքից հարավ-արևելք: