Շենգավիթ վարչական շրջանի ընդհանուր իրավասության առաջին ատյանի դատարանում շարունակվում է ծննդկան Մերի Մարգարյանի և նրա նորածնի մահվան գործով դատավարությունը` դատավոր Դավիթ Բալայանի նախագահությամբ։ 

Վկայի կարգավիճակով դատարանում ցուցմունք տվեց Դավիթ Մխիթարյանը, որը «Շենգավիթ» ԲԿ-ում բուժգծով փոխտնօրեն է։

Վերջինս իր ցուցմունքում նշեց,որ Շուշանիկ Բախշյանն ասել է, որ կոնսիլիում պետք է հրավիրվի, որովհետև հիվանդանոցում բուժվող հղիներից մեկը խնդիրներ ունի. «Շուշանիկ Բախշյանն ասաց, որ ուշադրության արժանի հղի ունի,անհրաժեշտ է կոնսիլիում հրավիրել, ես ասել եմ հրավիրեք։ Կոնսիլիումի արդյունքների մասին ինձ տեղեկացրել են իմ աշխատասենյակում։ Բազմաֆունկցիոնալ հիվանդանոց տեղափոխելու մասին որոշում է կայացվել, ես կազմակերպել եմ նրա տեղափոխումը»։ 

Մեջբերելով նախկինում հարցաքննված վկա բժիշկների ցուցմունքները, տուժողի իրավահաջորդի ներկայացուցիչ Մարինե Թովմասյանը Մխիթարյանին ասաց, թե վկաներից երկուսն ասել են,որ իրենց ախտորոշումները եղել են նախնական և հարցրեց՝ ձեր հիվանդանոցում լիարժեք ախտորոշում  չե՞ն կարող տալ, ինչին Մխիթարյանը պատասխանեց. «Ուրեմն աշխարհում չկա  որևէ հիվանդանոց, որ տա կլինիկական ախտորոշում, կա ախտորոշման երեք ձև՝ նախնական,վերջնական և դուրս գրվելու ժամանակ կլինիկական ախտորոշում։ Չկա նման բան միանգամից վերջնական ախտորոշում և չի լինում»։

Հարցին, թե վերջնական ախտորոշման  մեջ բժիշկների նախնական ախտորոշումը չի հաստատվել,այդ դեպքում ինչն են բուժել, Մխիթարյանն ասաց, որ գոյություն ունի ընթացիկ բուժում. «Նայում ես ակնհայտ բաներ կան, ես ունեմ բուժական արսենալ, որ ընթացքում կիրականացնեմ, մինչև կունենամ որոշակի արդյունքներ»,- ասաց Մխիթարյանը և հավելեց, որ հիվանդանոցում հրաշքներ չեն գործում, հիվանդը կարող է և՛ բուժվել, և՛ մահանալ։

Հարցին, թե Մխիթարյանը տեղյակ եղել է,որ սարքի անսարքության պատճառով ռենտգեն հետազոտություն չի արվել,վկան ասաց, որ տեղյակ է եղել, որ այդ օրը նկարի միջոցով ռենտգենը չի արվել։ Հաջորդ հարցին, թե «Շենգավիթ» ԲԿ-ն, լինելով երրորդ կարգի հիվանդանոց, համալրված է այնպիսի սարքերով, որոնք ունեն հիշողություն, որոնք պատկերի միջոցով պահում են հետազոտության արդյունքը, ասաց, որ այդ ժամանակ բժշկական կենտրոնն աշխատել է դասական հին տեխնիկայով։

Պատասխանելով հարցին,թե հիվանդանոցը նյարդաբան, լյարդաբան ունի, Մխիթարյանն ասաց, որ այդ մասնագետները հրավիրվում են՝ ելնելով իրավիճակից։ Իսկ, թե այդ դեպքում ինչու են հենց նյարդաբան Գայանե Խաչատրյանին հրավիրել, ում ստիպված են եղել 2 ժամ սպասել,Մխիթարյանն ասաց,որ հրատապության խնդիր այդ պահին չկար։

Հարցին,թե հետազոտման համար այլ խնդիրներ եղել են, վկան բացասական պատասխան տվեց։

Անդրադառնալով կոնսիլիումի ընթացքում  քննարկվող հարցին, Մխիթարյանն ասաց, որ կոնսիլիումի ընթացքում Մերի Մարգարյանի ծննդալուծման հարց չի դրվել։

Շուշանիկ Բախշյանի պաշտպան Սիրունյանը վկային հարցրեց, թե ինչու հուլիսի 27-ին կեսարյան հատում չի արվել. «Այդ կեսարյանն անեիք, որ այս օրը չընկնեինք բոլորս։ Ձեզ ներկայացրին, որ կան խնդիրներ, որոնք արագ են զարգանում, ինչո՞ւ կեսարյան հատում չարեցիք»։ Մխիթարյանը պատասխանեց,որ վիրահատության համար  պետք է լինեն հստակ ցուցումներ և հակացուցումներ,իսկ դրանք որոշում են մասնագետները։

Սիրունյանը դիտարկեց՝ «Ունենք լյարդի խնդիր, ունենք թոքի խնդիր, ջերմություն։ Փորը բացեիք պրծնեիք»։

Մխիթարյանը պատասխանեց. «Դա հո հարևանի գրպանը չի,որ բացենք պրծնենք։ Ցուցում չկար, հետո էլ ասելու էին՝ ի՞նչ ցուցումի հիման վրա եք կեսարյան հատում արել»։

Հիշեցնենք, որ Մերի Մարգարյանը մահացել է կեսարյան հատումից հետո՝ «HELLP» սինդրոմ համախտանիշի թոքաբորբ ախտորոշմամբ, «Էրեբունի» բժշկական կենտրոնում՝ 2015 թվականի հուլիսի 29-ին, իսկ հաջորդ օրը մահացել է նաև վերջինիս նորածին դուստրը:

«Շենգավիթ» ԲԿ-ի մանկաբարձ-գինեկոլոգ Շուշանիկ Բախշյանին և նույն բժշկական կենտրոնի բժշկուհի Անի Բաբելյանին մեղադրանք է առաջադրվել Քրեական օրենսգրքի 130-րդ հոդվածի 2-րդ մասով (բժշկական օգնություն իրականացնողը, եթե թերանում է ու անզգուշությամբ հանգեցնում հիվանդի մահվան, պատժվում է ազատազրկմամբ` 2-6 տարի ժամկետով, իսկ պաշտոն զբաղեցնելու դեպքում` ազատում պաշտոնից` առավելագույնը 3 տարի ժամկետով): Բախշյանը գրավի դիմաց ազատ է արձակվել, իսկ Բաբելյանի նկատմամբ խափանման միջոց է ընտրվել ստորագրություն չհեռանալու մասին: