Հազարավոր ամերիկացիներ դուրս են եկել փողոցներ՝ բողոքելով Թրամփի հաղթանակի դեմ (լուսանկարներ)

09:00 • 10.11.16

Հազարավոր ամերիկացիներ երկրի տարբեր քաղաքներում դուրս են եկել փողոցներ՝ իրենց բողոքն արտահայտելով նախագահական ընտրություններում հանրապետական Դոնալդ Թրամփի անսպասելի հաղթանակի դեմ:


Ինչպես տեղեկացնում է Reuters-ը, մասնավորապես՝ Նյու Յորքում և Չիկագոյում բողոքի ակցիա են կազմակերպել հազարավոր մարդիկ, իսկ Ֆիլադելֆիայում և Բոստոնում՝  հարյուրավոր: Նմանատիպ ակցիաներ են անցկացվելու նաև Սան Ֆրանցիսկոյում, Լոս Անջելեսում և Օքլենդում:


Աղբյուրը մանրամասնում է, որ Վաշինգտոնում մոտ 500 հոգուց բաղկացած ցուցարարների խումբը շարժվում է   Սպիտակ տան ուղղությամբ:


Ցուցարարները նորընտիր նախագահին մեղադրում են ռասիզմի համար՝ վանկարկելով «Ասենք ո՛չ Կու Կլուքս Կլանին» (Կու Կլուքս Կլան- սպիտակամորթների ռասիստական խմբավորում-Tert.am):


Նշվում է  նաև, որ մի շարք քաղաքներում բախումներ են տեղի ունեցել ցուցարարների և ոստիկանների միջև:

 

Ինչպես ավելի վաղ հայտնել էր Tert.am-ը, ԱՄՆ նախագահի հանրապետական թեկնածու Դոնալդ Թրամփը հաղթել է նախագահական ընտրություններում. նա ստացել է ընտրական կոլեգիայի անդամների 276-ի ձայնը, իսկ նրա մրցակից դեմոկրատ Հիլարի Քլինթոնը՝ 218 ձայն։ 


Նշվում է նաև, որ ԱՄՆ նախագահի պաշտոնի համար պայքարող Հիլարի Քլինթոնը, որն առաջադրվել էր Դեմոկրատական կուսակցության կողմից, ընտրությունների ավարտից հետո զանգահարել է հաղթած թեկնածուին ու ընդունել իր պարտությունը: