ԱՄՆ-ում Թրամփի հաղթանակի դեմ ցույցերը վերաճել են անկարգությունների (լուսանկարներ)
Նոյեմբերի 8-ին ԱՄՆ-ում կայացած նախագահական ընտրություններում հանրապետական Դոնալդ Թրամփի հաղթանակն անակնկալ էր շատերի համար: Ուստի` մեծ թվով ամերիկացիներ, որոնք չեն ցանկանում էքսցենտրիկ միլիարդատիրոջը տեսնել երկրի ղեկավարի պաշտոնում, տարբեր քաղաքներում դուրս են եկել փողոցներ` հրաժարվելով ընդունել Թրամփի հաղթանակը:
Ինչպես հայտնում է CNN-ը, մասնավորապես` Օրեգոն նահանգի Պորտլենդ քաղաքում ոստիկանությունը հրապարակայնորեն հայտարարել է, որ ցույցերը վերաճել են անկարգությունների:
Ոստիկանության թվիթերյան էջում արված գրառման մեջ նշվում է, որ ցուցարարները սկսել են կարգազանց ու վտանգավոր վարք դրսևորել: Ոստկանությունը նաև հավելել է, որ ցուցարարներն արդեն նախազգուշացվել են:
Իրավապահների փոխանցմամբ`անկարգությունների ժամանակ ցուցարարները ոստիկանների ուղղությամբ տարբեր իրեր են նետել, վնասել են կայանված մեքենաները:
Աղբյուրը հավելում է, որ Թրամփի հաղթանակի դեմ բողոքի ակցիաները շարունակվում են Ֆիլադելֆիայում, Դենվերում, Մինեապոլիսում, Օքլենդում և Կալիֆորնիայում. ցույցերը կրում են խաղաղ բնույթ:
Ինչպես ավելի վաղ հայտնել էր Tert.am-ը, ԱՄՆ նորընտիր նախագահ Դոնալդ Թրամփն անարդար է անվանել նախագահական ընտրությունների արդյունքների դեմ բողոքի ցույցերը:
«Անցկացվել են շատ բաց և հաջող նախագահական ընտրություններ: Այժմ պրոֆեսիոնալ ցուցարարները, որոնց հրահրում են ԶԼՄ-ները, դուրս են գալիս բողոքի ցույցերի: Շատ անարդար է»,- գրել է Թրամփը Twitter-ում:
Հիշեցնենք, որ ԱՄՆ նախագահի հանրապետական թեկնածու Դոնալդ Թրամփը հաղթել է նոյեմբերի 8-ին կայացած նախագահական ընտրություններում. նա ստացել է ընտրական կոլեգիայի անդամների 276-ի ձայնը, իսկ նրա մրցակից դեմոկրատ Հիլարի Քլինթոնը՝ 218 ձայն։
Նրա երդմնակալությունը տեղի է ունենալու 2017 թվականի հունվարի 20-ին:













