Կուբացի ժողովուրդը շարունակելու է պայքարը. Ռաուլ Կաստրո

12:21 • 30.11.16

Կուբայի առաջնորդ Ռաուլ Կաստրոն Հավանայում իր եղբոր՝ Ֆիդել Կաստրոյի հրաժեշտի արարողությունը եզրափակող ելույթում խոստացել է, որ կուբացի ժողովուրդը կշարունակի իր պայքարը, գրում է «ՌԻԱ Նովոստի»-ն:


Ֆիդել Կաստրոն մահացել է նոյեմբերի 25-ին՝ 90 տարեկանում: Կուբայում ազգային սուգ է հայտարարվել, իջեցվել են դրոշները և չեղյալ հայտարարվել ժամանցային միջոցառումները: 


«Թանկագին Ֆիդել, Խոսե Մարտիի հուշարձանի հարևանությամբ՝ այստեղ, որտեղ մենք 50 տարուց ավելի հավաքվել ենք մեծ վշտի պահերին մեր նահատակների հիշատակը հարգելու համար, որտեղ մենք հռչակել ենք մեր իդեալները և խորհրդանիշները, ժողովրդի հետ խորհրդակցել ենք սկզբունքային որոշումների մասին, որտեղ հիշել ենք մեր հաղթանակների մասին, հենց այստեղ մենք մեր անձնուրաց և մարտական ժողովրդի հետ ասում ենք քեզ՝ «միշտ մինչև հաղթանակ»,- հայտարարել է կուբացի առաջնորդը:


Ռաուլ Կաստրոն նաև նշել է, որ կուբացի ժողովուրդն այդ օրերին Ֆիդելին հարգանքի տուրք է մատուցել և երդում է տվել նրա գաղափարներին: Նա հիշել է կուբական հեղափոխության պատմության մի քանի կարևոր իրադարձությունների մասին, որոնց ընթացքում Ֆիդել Կաստրոն ելույթներ է ունեցել այդ հրապարակում: «Նրա խոսքերը դեռևս հնչում են այստեղ»,- ասել է նա: