Դատախազությունը ոստիկանությանը ցուցում է տվել նյութեր նախապատրաստել ԱԺ պատգամավորի կողմից լրագրողին հարվածելու դեպքի առթիվ

Դատախազությունը պատգամավոր Ռուբիկ Հակոբյանի կողմից լրագրող Վահե Մակարյանին հարվածելու դեպքով ոստիկանությանը նյութեր նախապատրաստելու ցուցում է տվել: 

Այս մասին լուրը Tert.am-ի հետ զրույցում հաստատեցին Ոստիկանության լրատվության ԶԼՄ-ների հետ կապի բաժնից։

«ՀՀ ոստիկանությունը դեկտեմբերի 7-ին Ազգային ժողովում լրագրողի և պատգամավորի միջև տեղի ունեցած դեպքի առթիվ Դատախազությունից գրավոր ցուցում է ստացել նյութեր նախապատրաստելու»,-ասացին լրատվական ծառայությունից։

Նաև հայտնեցին, որ նշանակվել է դատաբժշկական փորձաքննություն, կատարվում է հետաքննություն:

Հիշեցնենք, որ երեկ Ազգային ժողովում լրագրողի՝ պատգամավորին ուղղված հարցից հետո Ռուբիկ Հակոբյանը Վահե Մակարյանին հրավիրել էր զրուցելու: Լրագրողի խոսքով՝ պատգամավորն իրեն հրավիրել է այն տարածքը, որտեղ տեսախցիկներ չկան և հարվածել ու հայհոյել է:

Ռուբիկ Հակոբյանն էլ միջադեպի վերաբերյալ ասել էր, որ խուլիգանը տեղ չունի լրատվական դաշտում: