Հալեպից գրոհայինների դուրսբերման գործընթացը դադարեցվել է՝ կրակահերթերի պատճառով, զինյալները փորձել են պատանդներ վերցնել

15:09 • 16.12.16

Հալեպի արևելյան շրջաններից զինյալների դուրսբերման գործընթացը ժամանակավորապես դադարեցվել է, երբ գրոհայինները, խախտելով պայմանավորվածությունը, փորձել են գերի վերցնել մարդկանց, հաղորդում է «ՌԻԱ նովոստի» գործակալությունը՝ հղում անելով սիրիական Al-Ikhbariya հեռուստաալիքին:

Հայտնի է, որ ահաբեկչական խմբավորումները կրակ են բացել Ռամուսե թաղամասի ելքի ուղղությամբ, երբ ավտոբուսների շարասյունն արդեն պատրաստ էր շարժվել: Միևնույն ժամանակ, գրոհայինները կրակ են բացել Ֆուա և Քեֆրայա քաղաքների ուղղությամբ:

Սիրիական ՍԱՆԱ գործակալությունը, իր հերթին, փոխանցել է, որ գրոհայինները կրակ են բացել ավտոբուսների ուղղությամբ և փորձել իրենց հետ տանել ծանր սպառազինություն և գերիներ։ Լրատվամիջոցը նաև հայտնել է, որ ահաբեկիչները նախօրեին պայթեցրել էին Հալեպում գտնվող իրենց ռազմական պահեստները՝ զգուշանալով, որ կարող է հայտնաբերվել իրենց հովանավորող ուժերի հետքը:

Նշենք, որ դեկտեմբերի 15-ին սիրիական Կարմիր Մահիկի հսկողությամբ Հալեպի զինյալների առաջին խումբն իրենց ընտանիքների հետ ավտոբուսներով և շտապօգնության մեքենաներով դուրս են բերվել Հալեպի տարածքից:
Վերջին 24 ժամվա ընթացքում Հալեպի արևելյան շրջաններից դուրս է բերվել շուրջ 6.000 մարդ, որոնցից 3.000-ը զինյալ գրոհայիններ են: