Սա Ռուսաստանի նկատմամբ անպատվություն է. Լ. Շիրինյանն Անկարայում ՌԴ դեսպանի սպանության մասին

11:24 • 20.12.16

Քաղաքագետ Լևոն Շիրինյանը Tert.am-ի հետ զրույցում անդրադարձավ երեկ ուշ երեկոյան Թուրքիայում Ռուսաստանի Դաշնության դեսպան Անդրեյ Կառլովի սպանությանը:

«Անշուշտ այս դեպքը կազդի թուրք-ռուսական հարաբերությունների վրա, թեև երկուսն էլ ցույց կտան, թե ոչինչ չի պատահել, քանի որ այսօր աշխարհը սպասում է Ամերիկայում Հանրապետականների իշխանության վերադարձին, և ամեն մեկն իր տեղն է ճշտում այս արևի տակ: Սակայն դա Ռուսաստան պետության նկատմամբ անպատվություն է»,-ասաց նա:

Քաղաքագետը նշեց, որ այս ամենը կրկնակի, քառակի անգամ ցույց տվեց նաև, որ Թուրքիան եղել և մնում է պանթուրքիզմի և տեռորի հայրենիքը, որովհետև ոչինչ չի բացահայտվում:

«Կարծում եմ, որ այս ամենը արտացոլում է ռուս-թուրքական հարաբերությունների իրական վիճակը: Սա միանշանակ հարաբերությունների ճգնաժամ է: Իմ կարծիքով՝ ռուս-թուրքական հարաբերությունները ընթանում են ալիքաձև ճանապարհով, և հավանաբար կարգավորում չի լինի»,-ասաց նա և նշեց, որ Ռուսաստանի և Թուրքիայի հարաբերությունների ամեն մի սրացում օգուտ է Ամերիկային, դրա համար գուցե կլռեն առայժմ, իսկ հետո ժամանակը ցույց կտա, թե ինչպես կվարվեն:

Ինչ վերաբերում է այս ամենի մեջ թուրք ընդդիմադիր Գյուլենին ուղղված մեղադրանքներին, Լևոն Շիրինյանն ասաց, որ նույն տրամաբանությամբ կարելի է մեղադրել Ալիևին, քանի որ նույն կերպ ապացույցներ չկան:

«Ռուս-թուրքական ամեն մի մերձեցում հայ ժողովրդի համար միշտ վատ է եղել: Այս ամենից կարելի է եզրակացնել, որ Թուրքիան մղվում է դեպի քաոս, և ես հեռանկարում զինվորական հեղաշրջում եմ տեսնում, եթե իհարկե զինվորականները այդ քայլին գնան»,-ասաց նա և նշեց, որ Հայաստանը Թուրքիայի կողքին կարող է դառնալ կայունության կղզյակ, ինչը կարևոր է միջազգային փոխհարաբերություններում:

Լիանա Առաքելյան