ԵԱՏՄ-ի և ՀԱՊԿ-ի գագաթնաժողովներում Լուկաշենկոյի բացակայության պատճառների մասին պետք է խոսի բելառուսական կողմը. Պեսկով

14:49 • 26.12.16

ԵԱՏՄ-ի և ՀԱՊԿ-ի գագաթնաժողովներում Բելառուսի նախագահ Ալեքսանդր Լուկաշենկոյի բացակայության պատճառների մասին պետք է խոսի բելառուսական կողմը: Այդ մասին հայտարարել է Ռուսաստանի նախագահի մամուլի քարտուղար Դմիտրի Պեսկովը, գրում է «ՌԻԱ Նովոստի»-ն:


«Իսկապես մեր բելառուս գործընկերները հայտնել են այն մասին, որ նախագահ Լուկաշենկոն չի կարողանա մասնակցել այսօրվա գագաթնաժողովներին: Ես կարծում եմ, որ մեր կողմից կոռեկտ չէր լինի խոսել պատճառների մասին, դա ամեն դեպքում պետք է անի Բելառուսի նախագահի մամուլի ծառայությունը»,- ասել է Պեսկովը լրագրողներին:


«Դուք գիտեք, որ Բելառուսը եղել է, կա և շարունակում է մնալ մեր ամենամոտ դաշնակիցը, մենք Միութենական պետություն ունենք: Բելառուսը բոլոր միջազգային գործերում, առևտրատնտեսական համագործակցությունում մեր ամենակարևոր գործընկերներից է: Մենք շատ ենք գնահատում այն փաստը, որ Բելառուսի ժողովուրդն այսօր սգում է ռուսների հետ: Դա շատ կարևոր է, և դա ևս մեկ անգամ վկայում է մեր հարաբերությունների, մեր միության մակարդակի մասին»,- հավելել է նա:


Հիշեցնենք, որ ՀՀ Նախագահ Սերժ Սարգսյանն այսօր առավոտյան աշխատանքային այցով մեկնել է Ռուսաստանի Դաշնություն։

Ինչպես տեղեկացնում են ՀՀ Նախագահի աշխատակազմի հասարակայնության և տեղեկատվության միջոցների հետ կապերի վարչությունից, Նախագահը մասնակցելու է այսօր Սանկտ Պետերբուրգում կայանալիք Հավաքական անվտանգության պայմանագրի կազմակերպության (ՀԱՊԿ) հավաքական անվտանգության խորհրդի նստաշրջանին և Եվրասիական տնտեսական բարձրագույն խորհրդի նիստին: