ԱԺ պատգամավոր Թևան Պողոսյանը Tert.am-ի հետ զրույցում ամփոփելով Հայաստան-Եվրամիություն 2016 թվականի հարաբերությունները, այն մի քանի քայլ առաջ համարեց՝ հաշվի առնելով, որ տարբեր ծրագրերում Հայաստանը կարողացավ առաջընթաց ունենալ, կառավարման պայմանագրերը ձևակերպել, բարեփոխումները փաթեթները շարունակվեցին, բանակցություններ գործընթաց եղավ:

Ըստ նրա՝ գործընթացի դանդաղումը պայմանավորված է քաղաքական խնդիրներով և Հայաստանում սպասվող ընտրություններով:

«Իմ կարծիքով կողմերը որքան էլ ցույց տան, որ այդպիսի գործընթացներ չկան,  այնուամենայնիվ կան: Հայկական կողմն ասում է, որ մանրակրկիտ բանակցում է և 300 էջանոց պայմանագրի ամեն մի նախադասություն քննարկում է, իսկ եվրոպական կողմն էլ արագության խնդիր չի ցուցաբերում՝ սպասելով, թե արդյոք Հայաստանում խորհրդարանական ընտրությունները կանցնեն միջազգային ստանդարտներով, ինչը թույլ կտա ասելու, որ Հայաստանում, այնուամենայնիվ, կա առաջընթաց»,-ասաց նա և նկատեց, որ պայմանագրի քաղաքական մասը բանակցված է և հիմա տնտեսական ոլորտի վերաբերյալ է բանակցությունները գնալու:

«Ես կարծում եմ, որ Հայաստանը ցանկանում է, որ պայմանագիրը մանրամասն կարդա, քանի որ ԵԱՏՄ-ում կա գործընթաց, որի վերաբերյալ հայկական կողմը չունի կանխատեսում, և եթե վաղը պայմանագրի որևէ կետ հակասի ԵԱՏՄ-ին, պարզ չէ, թե Հայաստանը ինչ իրավիճակում է հայտնվելու»,-ասաց նա:

Չնայած դրան՝ Թևան Պողոսյանն ասաց, որ որքան շուտ բարեփոխումները սկսվեին, այնքան շատ կշահեր Հայաստանը, ՀՀ բնակիչը: «Պետք չէ մոռանալ, որ ՀՀ-ԵՄ պայմանագիրը ՀՀ իշխանությունների կամ իշխող կուսակցության պայմանագիրը չէ, այլ ամբողջ Հայաստանինն է և այդ բարեփոխումները կբարելավեն քաղաքացու կյանքը»,-ասաց նա և հույս հայտնեց, որ այն, ինչ չստացվեց 2016 թվականին 2017 թվականին իր տրամաբանական ավարտին կհասնի:

Ինչ վերաբերում է Հայաստանը ԵՄ-ԵԱՏՄ հարաբերություններում կամուրջ հանդիսանալուն, ապա նա ասաց, որ Հայաստանը, հնարավորությունները  հաշվի առնելով, կարող է  դառնալ այդ կամուրջը, սակայն կասկածներ կան այդ ուղղությամբ արված Հայաստանի գործողությունների վրա, քանի որ դեռևս չկա որևէ նման օրինակ: