«Իսկանդեր»-ները պատկանում են Հայաստանին և միանշանակ կառավարվում ՀՀ ԶՈՒ կողմից. Վիգեն Սարգսյան
«Իսկանդեր» օպերատիվ-մարտավարական հրթիռային համալիրները, որոնք անցած տարի ձեռք են բերվել Ռուսաստանից, պատկանում են Հայաստանի զինված ուժերին, և դրանք կառավարում են հատուկ պատրաստություն անցած հայկական զինված ուժերի սպաները: Այդ մասին ռուսական «ՌԻԱ Նովոստի» գործակալությանը տված հարցազրույցում ասել է Հայաստանի պաշտպանության նախարար Վիգեն Սարգսյանը:
Ինչպես նշում է կայքը, «Իսկանդերներն» առաջին անգամ ցուցադրվել են անցած տարվա սեպտեմբերի 21-ին Երևանում անցկացված ռազմական շքերթի ժամանակ: Սակայն, որոշ տվյալներով, դրանք հայկական զինված ուժերն ավելի վաղ էին ձեռք բերել, և դրանք մարտական պատրաստության էին բերվել Լեռնային Ղարաբաղում անցած տարվա ապրիլին հակամարտության սրացման ժամանակ: Ավելի ուշ որոշ ԶԼՄ-ներ ենթադրություններ են հայտնել, որ համալիրները շարունակում են պատկանել ՌԴ-ին:
«Այն, որ «Իսկանդերները» տրամադրվել են Հայաստանին, իմ կարծիքով, բոլորի համար ակնհայտ է, որովհետև դրանք բոլորն իրենց աչքով են տեսել: Այն, որ դրանք պատկանում են Հայաստանի զինված ուժերին, նույնպես կարող եմ հաստատել 100 տոկոսանոց վստահությամբ: Եվ այստեղ ոչ մի երկրորդ կարծիք լինել չի կարող: Ինչ վերաբերում է մնացած բոլոր հարցերին՝ երբ, ինչ գումարով, վճարման ինչ ժամկետով և այլն, ինչպես հասկանում եք, այդ ամենը դասակարգվում է որպես «հույժ գաղտնի»: Կառավարում ենք մենք, կառավարում են նրանք, ում դրանք պատկանում են: Այստեղ ես կարող եմ բացել գաղտնիքի քողը»,- ասել է նախարարը:
Ճշգրտող հարցին, թե արդյոք համալիրների կառավարումը համապատասխան պատրաստություն անցած ՀՀ զինված ուժերի սպաների ձեռքում է, Վիգեն Սարգսյանը պատասխանել է՝ «միանշանակ»:










