ԱՄՆ գլխավոր դատախազը շփումներ է ունեցել Ռուսաստանի դեսպանի հետ. ամերիկացի պաշտոնյաներ
ԱՄՆ գլխավոր դատախազ Ջեֆ Սեշնսը նախընտրական արշավի ժամանակ երկու անգամ խոսել է Միացյալ Նահանգներում Ռուսաստանի դեսպան Սերգեյ Կիսլյակի հետ, հայտնում է Associated Press-ը:
Ինչպես գրել է Washington Post-ը՝ վկայակոչելով Արդարադատության նախարարության պաշտոնյաներին, Սեշնսը հանդիպել է Կիսլյակի հետ մեկ անգամ 2016 թվականի սեպտեմբերին, երբ ԱՄՆ հետախուզության պաշտոնյաները հետաքննություն էին անցկացնում նախագահական ընտրություններին Ռուսաստանի հնարավոր միջամտության վերաբերյալ, և մեկ անգամ՝ նույն տարվա ամռանը:
Նշվում է, որ Կիսլյակի հետ շփումներն էին դարձել պատճառ, որ ազգային անվտանգության հարցերով Թրամփի առաջին խորհրդականը՝ Մայքլ Ֆլինը, հրաժարական տվեց փետրվարին:
Նշվում է, որ ԱՄՆ գլխավոր դատախազ Ջեֆ Սեշնսը հունվարին՝ Սենատում իր թեկնածության հաստատման վերաբերյալ լսումների ժամանակ հայտարարել է, որ նա չի շփվել ԱՄՆ-ում Ռուսաստանի դեսպան Սերգեյ Կիսլյակի հետ: Հաղորդվում է, որ պատախանելով այդ մասին հարցին՝ Սեշնսը հայտարարել է, որ «նա շփում չի ունեցել ռուսների հետ»:
Սեշնսը չի բացահայտել Ռուսաստանի դեսպանի հետ նրա կապերի մասին տեղեկատվությունը, երբ նրան հարցրել են, թե ինչ նա կձեռնարկի, եթե նախագահական արշավի մասնակիցների թիմից մեկը կապ ունեցած լինի ռուսական իշխանությունների հետ:
ԱՄՆ արդարադատության նախարարության մամուլի քարտուղար Սառա Ֆլորենսը մարտի 1-ի երեկոյան հայտարարել է, որ «նրա պատասխանում չի եղել բացարձակ ոչ մի մոլորեցնող բան»: Այնուամենայնիվ, դեմոկրատները պահանջում են նրա հրաժարականը՝ ընդգծելով, որ պաշտոնյան ստել է Սենատի առաջ:










