ԱՄՆ պետքարտուղարն ասել է, որ Մոսկվան նախապես տեղեկացված չի եղել Սիրիայի տարածքում հարձակման վերաբերյալ

09:52 • 07.04.17

Միացյալ Նահանգների պետքարտուղար Ռեքս Թիլերսոնը, մեկնաբանելով Սիրիայի տարածքում իրականացված հրթիռային հարձակումը, նշել է, որ Ռուսաստանը նախապես տեղեկացված չի եղել ԱՄՆ ծրագրերի վերաբերյալ:

«Հարձակման վերաբերյալ Մոսկվայի հետ ոչ մի քննարկում չի եղել»,-ասել է Թիլերսոնը:

The Guardian-ը նկատում է, որ ԱՄՆ պետքարտուղարի հայտարարությունը միանգամայն հակասում է Պենտագոնի հայտարարությանն առ այն, որ ամերիկյան կողմը հրթիռակոծությունից առաջ մի քանի անգամ զրուցել է ռուս զինվորականների հետ ու գաղտնազերծել իրենց ծրագիրը:

Ինչպես ավելի վաղ հայտնել էր Tert.am-ը, Պենտագոնի պաշտոնական ներկայացուցիչ Ջեֆ Դևիսը լրագրողների հետ ճեպազրույցի ընթացքում ասել է, որ իրենք չեն հարվածել այն հատվածներին, որտեղ, ենթադրաբար, գտնվել են ռուս զինվորականները:

Նա նշել է, որ ամերիկացի զինվորականները հարվածից առաջ մի քանի անգամ զրուցել են ռուս գործընկերների հետ:


Բրիտանական պարբերականը մանրամասնում է, որ այս հակասությունը կարող է ունենալ միայն մի բացատրություն. միգուցե, Թիլերսոնը նկատի ունի քաղաքական օղակների շրջանակում բանակցելը, իսկ Պենտագոնը՝ ռազմական:

Հիշեցնենք, որ Միացյալ Նահանգներն ապրիլի 6-ի երեկոյան թևավոր հրթիռներով հարվածել է Սիրիայի արևմտյան Հոմս նահանգում գտնվող կառավարական ուժերի ռազմաբազային, ինչն արվել է օրեր առաջ Իդլիբում սիրիացի զինվորականների կողմից քիմիական զենքի կիրառմանն ի պատասխան:

Հաղորդվում է, որ ԱՄՆ-ն արձակել է «Տոմահավկ» տեսակի 59 հրթիռ, որոնք արձակվել են «Շայրաթ» ռազմաբազայի ուղղությամբ, որտեղից ավելի վաղ իրականացվել էր քիմիական հարձակումը:

ԱՄՆ նախագահ Դոնալդ Թրամփը, մեկնաբանելով Սիրիայի տարածքում իրականացված հրթիռային հարձակումը, նշել է, որ «դա բխում էր ԱՄՆ ազգային անվտանգության կենսական շահերից»: