Դա մեծ ապտակ էր Պապի երեսին. համաշխարհային առաջնորդներն իրենց հիասթափությունն են հայտնել Թրամփին Կլիմայական համաձայնագրից դուրս գալու պատճառով
Համաշխարհային առաջնորդներն արձագանքել են Միացյալ Նահանգների նախագահ Դոնալդ Թրամփի՝ Կլիմայական փոփոխությունների վերաբերյալ փարիզյան համաձայնագրից դուրս գալու որոշմանը՝ իրենց խոր հիասթափությունն ու ափսոսանքը հայտնելով այս առնչությամբ:
Ինչպես նշում է The Guardian-ը, Թրամփի հայտարարությունից հետո նրան անմիջապես զանգահարել է Գերմանիայի կանցլեր Անգելա Մերկելն ու իր հիասթափությունը հայտնել: Այնուհետև Գերմանիայի, Ֆրանսիայի և Իտալիայի ղեկավարները համատեղ հայտարարություն են տարածել՝ կոչ անելով մյուս երկրներին միավորել ջանքերն արդեն իսկ տեսանելի կլիմայական փոփոխությունների դեմ պայքարն առավել արդյունավետ դարձնելու համար:
«Հարգում եմ Թրամփի որոշումը, բայց կարծում եմ, որ նա սխալ է գործում իր երկրի, ժողովրդի, ինչպես նաև մոլորակի ապագայի համար»,-իր թվիթերյան էջում գրել է Ֆրանսիայի նախագահ Էմանուել Մակրոնը: Նա նաև հավելել է, որ Փարիզյան համաձայնագրի վերաքննարկումը կամ դրա կետերի մեղմացումը հնարավոր չէ:
«Կլիմայի հարցում չի կարող լինել «պլան Բ», քանի որ մոլորակ «Բ» էլ չկա»,-հավելել է Մակրոնը:
Բրիտանական պարբերականը նշում է, որ Թրամփի որոշման վերաբերյալ իրենց հիասթափությունն են հայտնել Կանադայի, Մեքսիկայի, Ճապոնիայի, Մեծ Բրիտանիայի, Նոր Զելանդիայի, Ավստրալիայի, Բրազիլիայի, Հնդկաստանի ղեկավարները, Եվրոպական միությունը, ինչպես նաև ՄԱԿ-ի գլխավոր քարտուղարը:
Մինչդեռ Վատիկանը հայտարարել է, որ Թրամփի քայլը «մեծ ապտակ էր Հռոմի պապի երեսին» ու «իսկական աղետ բոլորի համար»:
Աղբյուրը հիշեցնում է, որ պոնտիֆիկոսը մի քանի օր առաջ էր հանդիպել ԱՄՆ ղեկավարին ու խոսել նրա հետ շրջակա միջավայրը կլիմայական փոփոխությունների բացասական ազդեցությունից պաշտպանելու անհրաժեշտության մասին: Մինչդեռ Թրամփը Պապին ասել էր, որ չի մոռանա նրա ասածները:
Հավելենք, որ Թրամփի որոշումը քննադատողների թվում են նաև ԱՄՆ նախկին նախագահ Բարաք Օբաման և նախկին պետքարտուղար Հիլարի Քլինթոնը:
Հիշեցնենք, որ ԱՄՆ նախագահ Դոնալդ Թրամփը, ելույթ ունենալով Սպիտակ տանը, հայտարարել է Կլիմայական փոփոխությունների վերաբերյալ փարիզյան համաձայնագրից դուրս գալու որոշման մասին:
Ամերիկացի առաջնորդն ընդգծել է, որ ԱՄՆ-ն կարող էր 2.7 մլն աշխատատեղ կորցնել 2025 թվականին, եթե կատարեր 2015-ին կնքված համաձայնագրի պայմանները:
Փարիզյան համաձայնագիրը կնքվել է 2015 թվականի դեկտեմբերին, որի 195 մասնակիցները պայմանավորվել են թույլ չտալ մոլորակի վրա միջին ջերմաստիճանի բարձրացումն ավելի քան 2 աստիճանով:
Հայտնի է, որ Կլիմայական փոփոխությունների վերաբերյալ փարիզյան համաձայնագրին չմասնակցող երկրները 3-ն են՝ ԱՄՆ-ն, Նիկարագուան և Սիրիան:










