Տարածաշրջանում և դրանից դուրս հունիսի 1-ից 7-ը գրանցվել  է 20 երկրաշարժ. ՍՊԾ-ն որոշել է օջախի հիմնական պարամետրերը

13:03 • 08.06.17

Ս.թ. հունիսի 1-ից մինչև 7-ը Սեյսմիկ պաշտպանության ծառայության (ՍՊԾ) սեյսմոլոգիական ցանցի կողմից գրանցված երկրաշարժերից 20-ի համար որոշվել են օջախի հիմնական պարամետրերը:

Ինչպես հայտնում են «ՍՊԾ» գործակալությունից, տեղի ունեցած սեյսմիկ իրադարձություններից 6-ը տարածականորեն գտնվում են Հայաստանի Հանրապետության տարածքում:

Թույլ երկրաշարժերի պարս է տեղի է ունեցել Կոտայքի մարզում`

հունիսի 1-ին, ժամը 10:57-ին, M=1.0, Աբովյան քաղաքից 6 կմ դեպի հյուսիս-արևմուտք,

հունիսի 4-ին, ժամը 17:08-ին, M=1.7, Աբովյան քաղաքից 17 կմ դեպի հյուսիս-արևելք,

հունիսի 4-ին, ժամը 17:12-ին, M=2.3, Աբովյան քաղաքից 17 կմ դեպի հյուսիս-արևելք,

հունիսի 4-ին, ժամը 17:13-ին, M=0.9, Աբովյան քաղաքից 24 կմ դեպի հյուսիս-արևելք,

հունիսի 4-ին, ժամը 17:21-ին, M=1.5, Աբովյան քաղաքից 17 կմ դեպի հյուսիս-արևելք:

Տարածաշրջանում 3 բալ և ավելի ուժգնությամբ գրանցվել է 6 երկրաշարժ:

Հունիսի 2-ին Ադրբեջանի Շաքի քաղաքից 31 կմ դեպի հարավ-արևելք տեղի ունեցած 6 բալ ուժգնությամբ (մագնիտուդ 4.6) երկրաշարժը զգացվել է Ադրբեջանի հյուսիս-արևմուտքում, ինչպես նաև Արցախի մայրաքաղաք Ստեփանակերտում` 3 բալ ուժգնությամբ:

Հունիսի 2-ից 7-ը 3 բալ ուժգնությամբ (մագնիտուդ 2.3, 2.4 և 2.6) երեք ստորգետնյա ցնցում է տեղի ունեցել Իրանում` Խոյ քաղաքին հարող տարածքում: Նույն ուժգնությամբ (մագնիտուդ 2.3) երկրաշարժ է գրանցվել հունիսի 3-ին Թուրքիայի Արդահան քաղաքից 11 կմ դեպի հարավ-արևմուտք:

Հունիսի 6-ին Թուրքիա-Իրան սահմանային գոտում՝ Վան քաղաքից 72 կմ դեպի արևելք գտնվող էպիկենտրոնով երկրաշարժի ուժգնությունն էր 3-4 բալ (մագնիտուդ 2.8):

Հունիսի 7-ին Վրաստան-Ադրբեջան սահմանային գոտում` ադրբեջանական Աղստաֆա քաղաքից 28 կմ դեպի հյուսիս-արևելք, տեղի է ունեցել երկրաշարժ, որի ուժգնությունն էպիկենտրոնային գոտում կազմել է 6-7 բալ (մագնիտուդ 4.8):

Ստորգետնյա ցնցումները զգացվել են նաև ՀՀ տարածքում, մասնավորապես հետևյալ քաղաքներում. Նոյեմբերյան, Իջևան, Բերդ, Ալավերդի, Դիլիջան` 4-5 բալ, Ստեփանավան, Տաշիր, Սևան և Ճամբարակ` 4 բալ, Վանաձոր, Սպիտակ, Գավառ և Վարդենիս` 3-4 բալ, Երևան, Գյումրի, Հրազդան, Աբովյան, Չարենցավան և Ապարան` 3 բալ, Վաղարշապատ, Արտաշատ, Եղեգնաձոր և Ջերմուկ` 2-3 բալ ուժգնությամբ: Երկրաշարժի հետևանքով խուճապ է առաջացել Դաղստանի Հանրապետության որոշ բնակավայրերում:

Տարածաշրջանից դուրս. 6.0 և ավելի մագնիտուդով գրանցվել է 2 երկրաշարժ: Հունիսի 2-ին Ալեուտյան կղզիների տարածքում տեղի է ունեցել 6.8 մագնիտուդով սեյսմիկ իրադարձություն:

Հաջորդ օրը Հարավային օվկիանոսի Բալենի կղզիներից դեպի հյուսիս գրանցվել է երկրաշարժ, որն ունեցել է 6.0 մագնիտուդ: Երկրաշարժերի հետևանքով զոհեր և ավերածություններ չկան: