Հս. Կորեայի նկատմամբ «ռազմավարական համբերության դարաշրջանն ավարտվել է». ԱՄՆ փոխնախագահ

09:14 • 23.06.17

Միացյալ Նահանգների փոխնախագահ Մայք Փենսը, անդրադառնալով Կորեական թերակղզու շուրջ ստեղծված նախապատերազմական իրավիճակին, նշել է, որ Հյուսիսային Կորեայի նկատմամբ «ռազմավարական համբերության դարաշրջանն այլևս ավարտված է»:

«Եթե հարցը վերաբերում է Հյուսիսային Կորեային, ապա վարչակազմի ռազմավարական համբերության դարաշրջանն ավարտված է»,-ասել է փոխնախագահը Վաշինգտոնում Ուիլսոնի անվան կենտրոնում ելույթ ունենալու ժամանակ:

Փենսը նշել է, որ հյուսիսկորեական «բրուտալ ռեժիմն» Ասիա-խաղաղօվկիանոսյան տարածաշրջանի անվտանգության գլխավոր սպառնալիքն է:

ԱՄՆ փոխնախագահի խոսքով՝ նախագահ Դոնալդ Թրամփի կառավարման ներքո ԱՄՆ-ն կշարունակի համագործակցել տարածաշրջանային դաշնակիցների, ինչպես նաև Չինաստանի հետ Փհենյանի նկատմամբ  տնտեսական և դիվանագիտական ճնշումն ավելացնելու համար:

«Մենք դա կանենք այնքան ժամանակ, քանի դեռ Հյուսիսային Կորեան մեկընդմիշտ չի հրաժարվել միջուկային ու բալիստիկ ծրագրերից»,- եզրափակել է Փենսը:

Ինչպես ավելի վաղ հայտնել էր Tert.am-ը, Հյուսիսային Կորեայի ղեկավար Կիմ Չեն Ընը սպառնացել է գերհզոր կանխարգելիչ հարված հասցնել Միացյալ Նահանգներին՝ այդ երկրի կառավարությանը նախազգուշացնելով «գործ չունենալ իրենց հետ»:

Այնուհետև պետական լրատվամիջոցները հայտարարել են, որ Հյուսիսային Կորեան կարող է հաշված վայրկյանների ընթացքում երկրի երեսից ջնջել ԱՄՆ-ն ու իր թշնամուն մոխրի վերածել:

Միացյալ ազգերի կազմակերպությունում Հյուսիսային Կորեայի ներկայացուցիչ Կիմ Ին Ռյոնն ԱՄՆ-ին մեղադրել է Կորեական թերակղզում լարված իրավիճակ ստեղծելու համար՝ նախազգուշացնելով, որ ցանկացած պահի կարող է ջերմամիջուկային պատերազմ սկսվել:

Կիմ Ին Ռյոնի նախազգուշացմանը նախորդել էր ԱՄՆ փոխնախագահ Մայք Փենսի հայտարարությունն առ այն, որ դաշնակից Ճապոնիայի և Հարավային Կորեայի անվտանգությունն ապահովելու համար Վաշինգտոնը պատրաստ է ամեն ինչի՝ չբացառելով կանխարգելիչ հարված հասցնելու հավանականությունը: Փենսը նաև նշել էր, որ ԱՄՆ-ն ցանկանում է, որ Հյուսիսային Կորեան սառեցնի միջուկային ծրագրի զարգացումը: