Մենք չենք ուզում ունենալ ո՛չ գծատերեր, ո՛չ էլ երթուղայիններ, որոնցում մարդիկ ստիպված են երթևեկել կռացած. Վահե Նիկոյան (տեսանյութ)
Մենք չենք ուզում ունենալ ո՛չ գծատերեր, ո՛չ էլ երթուղայիններ, որտեղ մարդիկ ստիպված են երթևեկել կռացած, չենք ցանկանում ունենալ կանգառներում երկար սպասող քաղաքացիներ, տրանսպորտային թանկ համակարգ: Այսօր Երևան քաղաքի հասարակական տրանսպորտի բարեփոխումների հանրային փոխգործակցության էլեկտրոնային հարթակի գործարկման ժամանակ նման հայտարարություն արեց Երևան քաղաքի հասարակական տրանսպորտի բարեփոխումների ծրագրի աշխատանքային խմբի ղեկավար Վահե Նիկոյանը:
Նրա խոսքով՝ իրենց հիմնական նպատակն այն է, որ լուծումներ առաջարկվեն ոչ միայն բոլորին ակնառու խնդիրների համար, այլև ձգտեն լուծել համակարգային խնդիրները:
«Խոսքս, մասնավորապես, վերաբերում է երթուղային ցանցի, կառավարման մեխանիզմների, տոմսային համակարգի հստակ մոդելների մշակմանը: Այս ուղղությամբ համապատասխան մասնագիտական խումբ է աշխատում՝ խորհրդատու կազմակերպության հետ միասին: Խոսելով ներկա փուլի մասին՝ նշեմ, որ խորհրդատու կազմակերպությունը՝ WTG-ն, արդեն իսկ աշխատանքային խմբին ներկայացրել է 4 հաշվետվություն, որոնցում մասնագիտական գնահատական է տրվել առկա իրավիճակին»,- ասաց նա:
Նիկոյանի խոսքով՝ WTG խորհրդատու կազմակերպությունն արդեն իսկ ներկայացրել է իր առաջարկությունները տրանսպորտային ամբողջ համակարգն օպտիմալացնելու մասին, ավտոբուսային ցանցի, սակագնի և այլնի վերաբերյալ: Քաղաքապետի տեղակալը շեշտեց, թե ներկայումս գործընթացները նախադեպը չունեցող են և մանրամասն ուսումնասիրության առիթ կա:
«Սխալվելու իրավունք չունենք, քանի որ հակառակ դեպքում կարող է կաթվածահար լինել ամբողջ տրանսպորտային համակարգը»,- շարունակեց Վահե Նիկոյանը:
«Երևան քաղաքի կառավարման տեխնոլոգիաների կենտրոն» ՓԲԸ տնօրեն Սարգիս Մանուկյանն էլ տեղեկացրեց, որ քաղաքացիներին տրանսպորտային համակարգի բարեփոխումներում ներգրավելու համար ստեղծվել է transport.yerevan.am հարթակը:
«Փորձել ենք այցելուների համար կայքը դարձնել հնարավորինս պարզ ու հեշտ կիրառելի: Կայքի բովանդակությունը հնարավորինս օպերատիվ թարմացվելու է, աշխատանքային թիմն էլ ապահովելու է կայքի անխափան աշխատանքը՝ գործընթացի բոլոր փուլերում: Պաշտոնական կայքում առկա է նաև տեղեկատվություն WTG միջազգային խորհրդատվական ընկերության և վերջինիս կողմից տրամադրված զեկույցների մասին»,- ներկայացրեց Սարգիս Մանուկյանը:
Վերջինս հավելեց, որ սոցիալական ցանցերում ևս ստեղծվել են ակտիվ էջեր, որոնց միջոցով հանրությունը հնարավորություն կունենա ակտիվորեն ներգրավվել այս գործընթացում:










