Դաշնակցության այսօրվա պարագլուխներն ուղղակի վերափոխված կոմսոմոլներ են. Նարինե Թուխիկյան

Հովհաննես Թումանյանի թանգարանի տնօրեն Նարինե Թուխիկյանի կարծիքով՝ Հայաստանում ռուսաց լեզվի հայեցակարգի ընդունումը մեր ինքնության կորստի մեկնարկը կլինի: Ըստ նրա՝ բոլոր օտար լեզուները օրենքով մեկ սանդղակում պետք է լինեն, իսկ հայերենը պետք է բացառիկ նշանակություն և իրավունքներ ունենա: Անդրադառնալով հայեցակարգի հետ կապված կրթության և գիտության նախարար Լևոն Մկրտչյանի պարզաբանումներին` Նարինե Թուխիկյանը նշեց. «Եթե Կոմունիստական կուսակցությանը պատկանող մի նախարար այդպես խոսեր, կհասկանայի, բայց շատ զարմանալի է, որ ազգային գաղափարախոսություն կրող դաշնակցական նախարարն է դա ասում: Ինձ համար արդեն բացահայտվում է, որ Դաշնակցություն կուսակցության այսօրվա պարագլուխները ուղղակի վերափոխված կոմսոմոլներ են»:

-Հայաստանի կրթության և գիտության նախարարությունը մտադիր է կրթական համակարգում ռուսաց լեզվին հատուկ կարգավիճակ տալ։ Սրա հետ կապված արդեն շրջանառության մեջ է դրվել ռուսաց լեզվի հայեցակարգը, որը ենթադրում է, որ դպրոցներում որոշ առարկաներ պետք է անցկացվեն ռուսերենով, դասարաններ լինեն ռուսերենով և այլն։ Ինչպե՞ս եք վերաբերում այս հայեցակարգին, այն ի՞նչ է տալու ՀՀ կրթության համակարգին:

-Բացարձակ բացասական վերաբերմունք ունեմ և այս հայեցակարգի ընդունումը մեր ինքնության կորստի մեկնարկը կլինի: Հուսամ, որ դա տեղի չի ունենա, որ դրա դեմ բավական լավ ընդվզում կլինի: Մենք նախ հայոց լեզվի հայեցակարգի խնդիր ունենք ամրապնդելու: Ոչ միայն լեզվի, այլև ընդհանրապես հայրենաճանաչողության հայեցակարգի մշակման կարևորությունն այսօր կա՝ սկսած նախակրթարաններից, դպրոցներից: Շատ լավ կլինի, որ օտար լեզուները խորացվեն, բայց ոչ այլ առարկաների լեզվական փոփոխությամբ: Ռուսաց լեզուն շատ սիրելով և գնահատելով այն գրականությունը, որ ժամանակին ստեղծվել է այս լեզվով, ամեն դեպքում, այսօր մրցունակ չէ և տարածում չունի, որքան էլ ոմանք փորձում են հակառակում մեզ համոզել: Այսօր, եթե դու ուզում ես համաքայլ գնալ աշխարհի զարգացմանը, ուրեմն անգլերենը պետք է խորացնես, առանց դրա դու ոչինչ ես, բայց սա նույնպես չի կարող լինել մայրենի լեզվի հաշվին:

-Կառավարությունից պարզաբանում են, որ ռուսաց լեզվի հայեցակարգի պահանջարկ կա, քանի որ Հայաստանը ԵԱՏՄ, ՀԱՊԿ անդամ է, ՌԴ-ի հետ դաշնակցային հարաբերություններ ունի և այլն: Սրա վերաբերյալ ինչ կարող եք ասել:

-Ես լսեցի նախարար Լևոն Մկրտչյանի հարցազրույցը, որտեղ նա ասում էր, որ ռուսերենը գիտական լեզու է: Ճիշտն ասած՝ ծիծաղս եկավ: Եթե սա Կոմունիստական կուսակցությանը պատկանող մի նախարար այդպես խոսեր, կհասկանայի, բայց ազգային գաղափարախոսություն կրող դաշնակցական նախարարը շատ զարմանալի է, որ այսպիսի բան է ասում: Ինձ համար արդեն բացահայտվում է, որ Դաշնակցություն կուսակցության այսօրվա պարագլուխները ուղղակի վերափոխված կոմսոմոլներ են: Իրենք էլ սկսում են կապ չունենալ մեր ազգային արժեքների և նպատակների հետ: Մենք այսօր խնդիր ունենք արևելահայերինի և արևմտահայերենի մերձեցման, արևմտահայերենի պահպանության, որովհետև գաղթօջախներում այս լեզուն մարում է: Բայց այս լեզվով պակաս հրաշալի գրականություն չի ստեղծված, քան ռուսերենով Ռուսաստանում: Մեր նախարարության սուրբ պարտականությունը պետք է լինի արևմտահայերենի և արևելահայերենի միջև անջրպետը հնարավորինս մեղմացնելը:

-Հայերենին մնացած լեզուներից ավելի բարձր դիրքում դասելուց բացի, կարծում եք, ճիշտ է  ռուսերենին հատուկ կարգավիճակ տալը, թե բոլոր օտար լեզուները հավասար մակարդակում լինեն:

-Կարծում եմ՝ բոլոր օտար լեզուները օրենքով պետք է մեկ սանդղակում լինեն, իսկ հայերենը պետք է բացառիկ նշանակություն և իրավունքներ ունենա: Այլ բան է, որ այդ հավասար պայմաններում գտնվող մնացած բոլոր օտար լեզուներին առաջնահերթություն տրվի այնպես, ինչպես կյանքը, շուկան ցույց կտա: Բայց դա ևս անհատական մոտեցումով պետք է լինի, թե որ լեզուն է կարևոր իմանալ: Օրինակ, եթե մենք ուզում ենք զբոսաշրջային երկիր դառնալ, ուրեմն տաքսու վարորդներից և հյուրանոցների հավաքարարներից սկսած գոնե շատ պարզ հաղորդակցման մակարդակում անգլերեն իմանանք:

-Կարծիք կա, որ ՌԴ-ն ինքը չի պնդում Հայաստանում ռուսաց լեզվի հայեցակարգ ներդնել, այլ ՀՀ իշխանություններն են սա նախաձեռնել՝ ՌԴ-ին հաճոյանալու համար: Դուք համամիտ եք այս կարծիքի հետ:

-Ես իրականությունը չգիտեմ, բայց լիովին ընդունում եմ, որ այդպիսի բան կարող է լինել: Ստորաքարշության աստիճանով մենք գիտենք, թե ինչ մակարդակների կարող ենք հասնել:


Մանրամասները՝ տեսանյութում: