Բալիում Ագունգ հրաբխի ժայթքումից լավան միախառնվել է գետերին (լուսանկարներ)
Բրիտանական The Daily Mail պարբերականը հրապարակել է մի շարք լուսանկարներ, որոնցում երևում է՝ ինչպես է Ագունգ հրաբխից ժայթքած սառը լավայի հոսանքը (մոխրի, փոշու, ցեխի ու ջրի խառնուրդ) թափվում հրաբխի մոտակայքով հոսող գետերը՝ դրանք դարձնելով սև:
Հիշեցնենք, որ անցած հանգստյան օրերից սկսած Ագունգը մի քանի հազար մետր բարձրությամբ մոխիր և փոշի է արտանետում: Մտավախություն կա, որ մոտ ժամանակներն այն կարող է շիկացած լավա ժայթքել:
Երկրի իշխանությունները հայտարարել են տագնապի բարձրագույն մակարդակ, իսկ հրաբխի մոտակայքում գտնվող բնակավայրերի բնակիչները տարհանվում են: Բացի այդ, ստեղծված իրավիճակում խափանվել է Բալիի օդանավակայանի բնականոն աշխատանքը, ինչի հետևանքով տասնյակ հազարավոր զբոսաշրջիկներ չեն կարողանում հայրենիք վերադառնալ:
Ավիաընկերությունները չվերթներ չեն իրականացնում՝ առաջնորդվելով մտավախությամբ, որ հրաբխային մոխիրը կարող է ներթափանցել ինքնաթիռների շարժիչների մեջ:
Ընդհանուր առմամբ, չեղարկվել է ավելի քան 400 չվերթ՝ անորոշ վիճակում թողներով մոտ 60.000 զբոսաշրջիկի:














