Սաակաշվիլին ձերբակալվել է. գործիչն իր աջակիցներին խնդրել է չհավատալ իր դեմ մեղադրանքներին, իսկ կնոջը՝ դառնալ իր խոսնակը (տեսանյութ)
Վրաստանի նախկին նախագահ, Ուկրաինայի Օդեսայի շրջանի նախկին նահանգապետ Միխեիլ Սաակաշվիլիի աջակիցները մտադիր են մի քանի վրան խփել քննչական մեկուսարանի մոտակայքում, որտեղ պահվում է քաղաքական գործիչը, և հերթապահություն իրականացնել։ Այդ մասին, ինչպես հայտնում է «ՌԻԱ Նովոստի» գործակալությունը, շաբաթ հայտնել է Սաակաշվիլիի «Նոր ուժերի շարժում» կուսակցության անդամ Դավիդ Սակվարելիձեն։
Ուրբաթ ուշ երեկոյան Ուկրաինայի գլխավոր դատախազ Յուրի Լուցենկոն հայտարարել է, որ Սաակաշվիլին ձերբակալվել է և տարվել քննչական մեկուսարան։ Նա ձերբակալվել է հանցախմբերի անդամներին աջակցելու ու նրանց հանցավոր գործունեությունը քողարկելու մասին քրեական գործի շրջանակում:
Սաակաշվիլին խնդրել է իր աջակիցներին չհավատալ իր դեմ ներկայացված մեղադրանքներին։ Ինչպես հայտնում է «ՌԻԱ Նովոստի» գործակալությունը, այդ մասին շաբաթ ասել է նրա փաստաբան Ռուսլան Չերնոլուցկին։
«Նա նաև խնդրել է իր կնոջը դառնալ իր խոսնակը, իր հանրային ներկայացուցիչը»,- ասել է փաստաբանը Սաակաշվիլիի հետ մեկուսարանում հանդիպումից հետո։
Հիշեցնենք, որ Ուկրաինայի անվտանգության ծառայության աշխատակիցներն օրեր առաջ խուզարկում են իրականացրել և ձերբակալել Միխեիլ Սաակաշվիլիին: Այնուամենայնիվ, Օդեսայի շրջանի նախկին նահանգապետի աջակիցները որոշ ժամանակ անց կոտրել են Անվտանգության ծառայությանը պատկանող միկրոավտոբուսի հետևի դուռն ու ազատել քաղաքական գործչին: Այնուհետ Միխեիլ Սաակաշվիլին հայտարարել էր, որ չի գնա Ուկրաինայի գլխավոր դատախազ Յուրի Լուցենկոյի մոտ հարցաքննության, քանի որ նրան ոչ լեգիտիմ է համարում: Նա քննիչներին հրավիրել էր Կիևում Գերագույն ռադայի մոտ տեղակայված վրանային պալատ և հայտարարել, որ պատրաստ է նրանց ընդունել այնտեղ։
Նշենք, որ Ուկրաինայի գլխավոր դատախազի մամուլի քարտուղար Լարիսա Սարգանը հայտնել էր, որ Սաակաշվիլիի նկատմամբ հետախուզում է հայտարարվել երեք հոդվածով։
Локальна сутичка відбулася під будівлею ізолятора СБУ, де допитують затриманого Міхеіла Саакашвілі — чоловік перекинув бочку з багаттям pic.twitter.com/9iFBpUcPh4
— Hromadske.UA (@HromadskeUA) 8 декабря 2017 г.










