Դատարանը մեղավոր է ճանաչել ռուս նախկին նախարար Ուլյուկաևին
Ռուսաստանի տնտեսական զարգացման նախկին նախարար Ալեքսեյ Ուլյուկաևը մեղավոր է ճանաչվել Մոսկվայի դատարանի կողմից իր դեմ հարուցված կաշառակերության գործով, այս մասին տեղեկացնում է РИА Новости գործակալությունը:
«Ուլյուկաևը մեղավոր է ճանաչվել իր պաշտոնավարման օրոք կաշառք վերցնելու համար», - ասված է դատավոր Լարիսա Սեմյոնովայի կայացրած վճռում:
Դատախազությունը պահանջել է Ուլյուկաևին դատապարտել 10 տարվա ազատազրկման, ինչպես նաև ենթարկել նրան 500 մլն ռուբլու չափով դրամական տույժի: Վճիռը կհրապարակվի այսօր։
Ինչպես ավելի վաղ հայտնել է tert.am-ը՝ անցյալ տարի ՌԴ Քննչական կոմիտեն քրեական գործ է հարուցել Ուլյուկաևի դեմ: Քրեական գործը կապված է «Ռոսնեֆտ» նավթագազային ընկերության կողմից «Բաշնեֆտ» նավթային ընկերության արժեթղթերի պետական փաթեթի գնման հետ:
Նախկին նախարարը ձերբակալվել է 2 մլն դոլար կաշառքը վերցնելու պահին:










