«Պատրաստ ենք բանակցել թեկուզ 2 օր, միայն թե արդյունք լինի». Մամեդյարովը՝ Նալբանդյանի հետ սպասվելիք հանդիպման մասին
Ադրբեջանի արտաքին քաղաքական գերատեսչության ղեկավար Էլմար Մամեդյարովն այսօր Բաքվում կայացած մամուլի ասուլիսի ժամանակ հայտարարել է, որ Հայաստանի արտգործնախարար Էդվարդ Նալբանդյանի հետ պատրաստ է բանակցել թեկուզ 2 օր, «միայն թե արդյունք լինի», գրում է minval.az-ը։
Նա նշել է, որ Ղարաբաղյան հակամարտության խաղաղ կարգավորման հարցով հերթական հանդիպումը տեղի կունենա 2018թ. հունվարի կեսին՝ եվրոպական երկրներից մեկում:
«Պայմանավորվածություն է ձեռք բերվել հունվարի կեսին եվրոպական երկրներից մեկում Հայաստանի և Ադրբեջանի արտգործնախարարների հանդիպումն անցկացնելու վերաբերյալ»,-ասել է ադրբեջանցի պաշտոնյան:
Նա հավելել է, որ մոտ ժամանակներս կհայտարարվի հանդիպման հստակ ամսաթիվը:
«Մենք պատրաստ ենք թեկուզ 2 օր բանակցել, միայն թե արդյունք լինի»,- ասել է Մամեդյարովը՝ Ադրբեջանի, Իրանի և Թուրքիայի արտգործնախարարների եռակողմ հանդիպման ավարտից հետո կայացած մամուլի ասուլիսի ժամանակ:
Ինչպես ավելի վաղ հայտնել էր Tert.am-ը, դեկտեմբերի 6-ին Վիեննայում կայացել է Նալբանդյան-Մամեդյարով հանդիպումը։ Հանդիպմանը ներկա են եղել նաև ԵԱՀԿ Մինսկի խմբի համանախագահները։










