Իրանում զանգվածային ցույցերի զոհերի թիվը հասել է 12-ի (տեսանյութ)
Դեկտեմբերի 28-ից Իրանի մի շարք քաղաքներում անցկացվող զանգվածային ցույցերի հետևանքով զոհերի թիվը հասել է 12-ի: Այս մասին հայտնում է BBC News-ը՝ հղում անելով տեղական պետական հեռուստաընկերությանը:
«Անցած գիշերվա իրադարձությունների հետևանքով տարբեր քաղաքներում ցավոք մահացել է ընդհանուր առմամբ մոտ 10 մարդ», - նշել է հեռուստաընկերությունը: Այսպիսով, հինգշաբթի օրից՝ ցույցերի մեկնարկից հետո, մահացել է առնվազն 12 մարդ:
Ավելի վաղ հաղորդվում էր 10 զոհի մասին: Զինված ցուցարարները փորձել են ոստիկանության բաժանմունքներ և ռազմակայաններ բռնագրավել, սակայն անվտանգության ուժերը կանխել են նրանց գործողությունները:
Եվս երկու մարդ մահացել է դեկտեմբերի 30-ին՝ Լուրեստան նահանգի Դորուդ քաղաքում: Լուրեստանի նահանգապետ Հաբիբոլա Հոջաստեպուրը մարդկանց մահվան համար մեղադրել է «օտարերկրյա գործակալներին» և սադրիչներին:
Հիշեցնենք, որ իրանական Fars գործակալությունը դեկտեմբերի 29-ին հայտնել էր վեց քաղաքում զանգվածային ցույցերի մասին։ Ըստ իրանական լրատվամիջոցների՝ ցույցերն ուղղված են երկրի կառավարության վարած տնտեսական քաղաքականության դեմ։
Իրանի փոխնախագահ Էսհակ Ջահանգիրին ցույցերի անցկացման համար մեղադրել է պահպանողական շրջանակներին։ Նրա կարծիքով՝ նրանք օգտագործում են երկրի տնտեսական խնդիրները նախագահ Հասան Ռոհանիի վարած բարեփոխումների քաղաքականությունը տապալելու համար։ Դրանով են, ըստ նրա, բացատրվում ցուցարարների պաստառներն ու կոչերը՝ «Հեռացի՛ր Ռոհանի», «Մա՛հ բռնապետին»։










