Եթե ծխելու համար տուգանքի հարցում մեր չինովնիկները Սինգապուրի օրինակն են բերում, ասեմ, որ այնտեղ կոռուպցիայի համար գնդակահարում են. Կ. Քոչարյան (տեսանյութ)

Օրենքն ուշացած է և պետք է, այստեղ խնդիրը օրենքի կոնտենտի մեջ է` այդ տուգանքների և այլնի մասով, Tert.am-ի հետ զրույցում ասաց քաղտեխնոլոգ Կարեն Քոչարյանը՝ անդրադառնալով «Ծխախոտային արտադրատեսակների օգտագործման բացասական ազդեցության նվազեցման» մասին օրենքի նախագծին, որով խոշոր չափի տուգանքներ են նախատեսվում չնախատեսված վայրերում ծխելու համար:

«Քանի որ ես արդեն բազմիցս եմ խոսել, որպեսզի տպավորություն չստեղծվի , որ ես ծխելուն կողմ եմ, ասեմ, որ ես ծխում եմ, և համարում եմ ծխելը հիմարություն, այսինքն` օրենքը ուշացած է և օրենքը պետք է, այստեղ խնդիրը օրենքի կոնտենտի մեջ է, այդ տուգանքների և այլն: Մեզ մոտ, ինչպես միշտ, մենք ծայրահեղությունից ծայրահեղություն ենք գնում՝ կամ պետք է ազգովի ծխենք, հետո այդ ծխախոտի մնացորդներն էլ, գլանակը գցենք գետնին, աղտոտենք մեր քաղաքը, կամ 250, 500 հազար տուգանքներ նշանակենք»,-ասաց Կարեն Քոչարյանը:

Նա կարծում է, հակածխախոտային օրենքի անհրաժեշտություն իրապես կա, բայց ոչ այն տեսքով, ինչպես ներկայացված է, իսկ համեմատությունը այլ երկրների հետ քաղտեխնոլոգը տեղին չի համարում:

«Ես այսօր նկատեցի «Ֆեյսբուքում» իբր PR են անում՝ գրում են, որ Սինգապուրում ոչ միայն ծխելու, այլ սիգարետ ունենալու համար միայն 2 հազար դոլար տուգանք է հասնում: Մեր  խելոք չինովնիկներին ասեմ, որ իրենց սիրած Սինգապուրում կոռուպցիայի համար գնդակահարում են»,-ասաց Քոչարյանը:

Նա կարծում է, որ պետք է ի սկզբանե հասկանալ` ներկայացված օրենքը մեռելածին կլինի, թե ոչ: Տվյալ դեպքում, ըստ Քոչարյանի` անհասկանալի է թե ով է ստուգելու արգելված վայրերում ծխելու գործընթացը:

«Եթե մենք օրենք ենք ընդունում, որն ի սկզբանե պետք է մեռելածին լինի, ո՞վ է  ստուգելու հիմնարկներում ղեկավարը թո՞ւյլ է տալիս, թե ոչ, ղեկավարն ինքը ծխում է, թե չի ծխում, ստուգողը ո՞վ է, ո՞նց են մարդկանց փողոցում բռնելու, տանեն քաղմաս, եթե չունի ենթադրենք փաստաթուղթ, որովհետև առանց փաստաթղթի չեն կարող տուգանել, իսկ մեզ մոտ ընդունված չէ փաստաթուղթ պահել, համենայնդեպս, պարտադրող օրենք չկա, որ քաղաքացին իր հետ փաստաթուղթ պահի, նշանակում է պետք է տանեն քաղմաս մի քանի ժամ պահեն, հետ տուգանեն, որովհետև ծխել է ինչ- որ մի տեղ»,-ասաց նա:

Tert.am-ի դիտարկմանը, թե արդյոք սրճարաններում, ռեստորաններում և այլ ժամանցի վայրերում ծխելու արգելանքը չի վնասի բիզնեսի տեսանկյունից, նաև առևտրաշրջանառության ծավալներին՝զբոսաշրջիկների քանակ չի՞ կրճատվի, Քոչարյանը ասաց.« Եթե բաց սրճարաններում չթույլատրեն,  ինչը  ևս օրենքով արգելված է, իհարկե մեծ պրոբլեմ կլինի: Բայց զուտ սրճարաններում չեմ կարծում, քանի որ  թե տուրիստները կամ թե մեր քաղաքացիները, ովքեր դրսում շատ են լինում, գիտեն   որ դա այդպես է աշխարհում, պրոբլեմ չէ: Չեմ կարծում, որ փակ տարածքներում ծխելն արգելելը  բիզնեսի վրա կազդի, մի փոքր կարող է, հետո կսովորեն»:

Մանրամասները՝ տեսանյութում։