«Ռուսաստանը դրախտ է կոռումպացված պաշտոնյաների համար». Սոբչակը խոսել է ՌԴ խնդիրներից
Ռուսաստանի Դաշնության նախագահի թեկնածու, հեռուստառադիոհաղորդավարուհի Քսենիա Սոբչակը թվարկել է երկրի խնդիրները, դրանք են՝ «ծանր աշխատանքով չվաստակած» նավթային գումարները, սեփականության վատ պաշտպանությունը և կոռուպցիան, հայտնում է «ՌԻԱ Նովոստի»-ն:
«Տնտեսական աճը ժողովրդավարություն չբերեց Ռուսաստան: Դրա համար երեք պատճառ կա: Նախևառաջ նավթային փողերը… Մենք այդ գումարները ծանր աշխատանքով չենք վաստակել, պետք է սովորել հարգել աշխատանքի արժանապատվությունը»,- ասել է Սոբչակը՝ ելույթ ունենալով Նյու Յորքում Կոլումբիայի համալսարանում:
«Բացի այդ, այդ միջոցները գնում են սպառման, այլ ոչ ներդրումների»,- ասել է նա:
Սոբչակը հավելել է, որ տնտեսությունը չի բարգավաճի, եթե չպաշտպանվի մասնավոր սեփականությունը՝ նշելով, որ մասնավոր սեփականության անձեռնմխելիությունը նրա ծրագրի հիմնական կետերից մեկն է:
Երրորդ խնդիրը, ըստ Սոբչակի, կոռուպցիան է:
«Ռուսաստանը դրախտ է կոռումպացված պաշտոնատար անձանց համար»,- ասել է նա:
Նախօրեին հաղորդվել էր, որ Ռուսաստանի կենտրոնական ընտրական հանձնաժողովը գրանցել է «Քաղաքացիական նախաձեռնություն» կուսակցության կողմից առաջադրված Քսենիա Սոբչակին և «Ռուսաստանի կոմունիստներ» կուսակցության կողմից առաջադրված Մաքսիմ Սուրայկինին որպես նախագահի թեկնածուներ։
ՌԴ նախագահական ընտրությունները կայանալու են մարտի 18-ին:










