Ռուսաստանն առանցքային դեր է խաղում Ղարաբաղյան հակամարտության կարգավորման գործընթացում. Արմեն Սարգսյանի հարցազրույցը ՏԱՍՍ-ին
Արմեն Սարգսյանը, որը երկուշաբթի ստանձնել է ՀՀ նախագահի պաշտոնը, ռուսական ТАСС գործակալությանը տված հարցազրույցում հայտարարել է, որ չափազանց կարևոր է համարում Ռուսաստանի դերը Լեռնային Ղարաբաղի հակամարտության կարգավորման գործընթացում:
«Արդեն ավելի քան 25 տարի հակամարտության կարգավորման շուրջ բանակցություններն անց են կացվում ԵԱՀԿ Մինսկի խմբի ձևաչափով՝ համանախագահ երկրներ Ռուսաստանի, ԱՄՆ-ի և Ֆրանսիայի առաջարկած կարգավորման սկզբունքների և տարրերի հիման վրա: Ռուսաստանն առանցքային դեր է խաղում ղարաբաղյան հակամարտության կարգավորման գործընթացում՝ որպես Մինսկի խմբի համանախագահներից մեկը»,- նշել է ՀՀ նախագահը:
Արմեն Սարգսյանն ընդգծել է, որ «23 տարի առաջ Ղարաբաղում եռակողմ հաշտեցումը ձեռք է բերվել հենց Ռուսաստանի միջնորդության շնորհիվ»:
«Մենք բարձր ենք գնահատում այդ միջնորդական ջանքերը խնդրի խաղաղ կարգավորման լուծման որոնումներում: Ակնհայտ է, որ խնդրի կարգավորման համար անհրաժեշտ է խաղաղության և համաձայնության գալու քաղաքական կամք: Իր կողմից Հայաստանն անում է հնարավոր ամեն բան խաղաղության ձեռքբերման համար և ակնկալում է, որ ադրբեջանական կողմը նույնպես նույնկերպ կվարվի»,- ասել է նա:
Նախագահը նշել է, որ «վերջնական հաշվով, բոլոր տարածաշրջանային հակամարտությունները լուծվում են, և դրանք հաղթահարելի են»:
«Պատմությունը տեսել է հակամարտություններ՝ ոչ ավելի դաժան և ողբերգական»,- նշել է նա:










