Թիվ 11 դպրոցի աշակերտները պահանջում են տնօրենի հրաժարականը (թարմացված)

12:47 • 04.05.18

15:10

Թիվ 11 դպրոց  ոստիկանության ծառայողները այցելել են այսօր դպրոցի վերաբերյալ հրապարակումներն / հեռարձակման միջոցով / ուսումնասիրելու նպատակով:

Այս մասին Tert.am –ին հայտնեցին ՀՀ ոստիկանության հասարակայնության հետ կապերի և  լրատվության վարչությունից:

Հիշեցնենք, որ լրագրողների հարցին, թե ահազանգով են եկել Մոնթե Մելքոնյանի անվան դպրոց, ոստիկաններից մեկն ասել էր. «Դիմե՛ք լրատվական ծառայություն»:

Հիշեցնենք նաև՝ դպրոցում աշակերտների և ծնողների ակցիայի ժամանակ հնչեցին քրեաիրավական բնույթի բազում հայտարարություններ: 


14:31

Թիվ 11 դպրոց են այցելել ոստիկանության ծառայողներ: Լրագրողների հարցին, թե ովքեր  են իրենք, ներկայացած անձն ասաց. «Ես տարածքի ոստիկանության պետն եմ՝ Զոհրաբյան»:

Հարցին, թե ահազանգով են եկել Մոնթե Մելքոնյանի անվան դպրոց, Զոհրաբյանն ասաց. «Դիմե՛ք լրատվական ծառայություն»:

Հարցին, թե ինչու է առանց համազգեստի ու առանց փաստաթղթի եկել դպրոց, նա պատասխանեց. «Լավ եմ արել, ես ձե՞զ պետք է հարցնեմ, թե ուր գնամ: Մնացած բոլոր հարցերով դիմե՛ք լրատվականին»:

Ոստիկանության երկու ծառայողներին ընդունեց դպրոցի տնօրեն Ռուզան Ազիզյանը: Նրանց հանդիպումը դռնփակ է:



13:46

Թիվ 11 դպրոցի գրադարանավար Ռուզան Սաֆարյանը հայտարարում է, որ իրենց դպրոցի տնօրեն Ռուզան Ազիզյանը հավելավճարներ է տվել աշխատակիցներին, բայց դրանք հետ է վերցրել:

«5 տարի շարունակ ստացել եմ պրեմիաներ՝ որպես լավ աշխատանք: Եղել է 40.000, եղել է 70.000, ստացել եմ, բերել եմ փոխանցել եմ իրեն, հրամանը այդպես է եղել, որ ստանում ենք, բերում ենք, հանձնում ենք: Հազարից մեկ «շան փայ» են թողել՝ 5000 կամ 10.000: Անձամբ տնօրենին չենք տվել, կոլեգաների միջոցով ենք տվել, եկեք նրանց անունը չտամ»,- ասաց գրադարանավարը:

Նա նշեց, որ չգիտի՝ քանի աշխատակից է նման կերպ հավելավճարներ ստացել:

«Ես գնացել եմ, բանկից ստացել եմ, բերել ենք կոլեգայի միջոցով հետ ենք տվել իրեն: Չգիտեմ՝ էլ ովքեր են ստացել»,- նշեց կինը:


Լուսանկարում՝ թիվ 11 դպրոցի գրադարանավար Ռուզան Սաֆարյանը


13:40

Թիվ 11 դպրոցի տնօրեն Ռուզան Ազիզյանի աշխատասենյակում ծնողները շարունակում են վիճել. մի քանիսն ասում են, որ Ազիզյանը լավ տնօրեն է, նրա հրաժարականը պետք չէ պահանջել, մյուսներն ասում են, որ նա գումար է պահանջել, օգտագործել է աշակերտներին՝ իշխանության համար ընտրություններում ձայն հավաքելու համար:

«Ամեն տարի երկրորդ մասնաշենքի համար գումար է հավաքվում: Մոնթեի անունը մի՛ ապականեք: Խնդրում եմ, մի՛ ապականեք այս անունը, ո՞ւր է երկրորդ մասնաշենքը, որի համար 3 տարի է՝ գումար է հավաքվում»,- ասաց մի կին, ով ներկայացավ որպես համայնքի բնակիչ:

Ռուզան Ազիզյանն ասաց, որ ինքը սովոր չէ նման իրավիճակի. «Մենք ջունգլիներից չենք, ես այնպիսի տնօրեն եմ, որ հօգուտ աշակերտի եմ աշխատել»:

Նա ասաց, որ սուտ են ասում ծնողները, թե մասնաշենքի համար գումար է հավաքվել կամ անձնագիր ներկայացնելու պահանջ է եղել:

«Իմ տղան 2008թ.-ին եկավ տուն, ասաց՝ անուն-ազգանունները հավաքում են, ցուցակագրում են, «պասպորտդ» տուր»,- կրկնեց ծնողը:

Դանիել Իոաննիսյանն ասաց, որ այս զրույցը անիմաստ է, նա ասաց, որ Ռ. Ազիզյանի հետ կխոսեն քննիչները:




13:32

Թիվ 11 դպրոցի աշակերտների պահանջին՝ հրաժարական տալ դպրոցի տնօրենի պաշտոնից, վերջինս՝ Ռուզան Ազիզյանը, պատասխանում է հետևյալ կերպ՝ կա օրենք:

«Դրանք կարծես իմ աշակերտները չլինեն, այսօր նրանց չեմ ճանաչում: Այդ երեխաները հրապարակում էլ են այդպես գոռացել»,- ասաց Ռ. Ազիզյանը:

Տնօրենը նշեց, որ մինչև հիմա ապրել ենք այն երկրում, որտեղ հարաբերությունները մարդկային են եղել:

«Իրազեկ քաղաքացի միավորման» համակարգող Դանիել Իոաննիսյանն ասաց, որ մանկավարժներից, ծնողներից լսել է դժգոհություններ, որոնք հիմք են տալիս քրեական հետապնդում սկսելու նրա նկատմամբ: «Ահազանգեր են հնչել կոռուպցիայի մասին, այլ ահազանգեր էլ կային: Եթե այս պաշտոնից հրաժարականով պրծնեք՝ Ձեր բախտը կբերի»,- ասաց տնօրենը:

Այնուհետև եկավ աշակերտներից մեկի հայրն ու ասաց, որ սուտ են այն լուրերը, թե Ազիզյանը գումար է հավաքել երեխաներից:

«Երեխաներին այս սթրեսին չէր կարելի ենթարկել: Ես առաջին օրվանից պայքարում եմ, իմ տղան ունեցել է այստեղ պրոբլեմ, մոտեցել եմ տիկին Ազիզյանին, ու նա հոգատարությամբ լուծել է այդ հարցը: Ես այսօր լսում եմ հեռուստացույցով, որ դասատուն ծնողին հարվածել է, եկեք չմոռանանք իր լավ արարքները»,- ասաց ծնողը: 

Նա նշեց, որ իր երեխան այդ դպրոցում ապահով ձեռքերում է, դպրոցը խիստ է, տնօրեն Ազիզյանն էլ հանդես է եկել դրական հատկություններով:

«Էս հեղափոխությունը բոլորիս խեղդել է, էս մարդը տարիների բան ունի արած էստեղ, եկեք չուրանանք: Ես ՀՀԿ-ական չեմ, ես Ազիզյանի հետ բարեկամական կապ չունեմ, ծնող եմ, որը վրդովված է, ես ավելի լավ տնօրեն չեմ էլ կարողացել երազել»,- ասաց տղամարդը:

Մեկ այլ ծնող հակադարձեց, որ տնօրենը բազմաթիվ անգամներ գումար է պահանջել. «Երեխեն եկել է, ասել է պապա, պասպորտը տուր, ցուցակարգրում են, տանեմ դպրոց, եկել ասել է գումար տուր»:


13:21

Թիվ 11 դպրոցի տնօրեն Ռուզան Ազիզյանը համաձայնեց ընդունել շարժման ակտիվիստներին ու լրագրողներին:

«Ես զարմացած եմ այս իրավիճակից, սա ինձ համար անսպասելի էր, ես իմ աշակերտների աչքերում ատելություն երբեք չէի տեսել, սա կազմակերպված էր, այն, ինչ կազմակերպվեց մեր վարչապետի դեմ, հիմա շարունակվում է դպրոցում: Հեղափոխություն դպրոցո՞ւմ»,- ասաց Ազիզյանը:

Նա նշեց, որ թող հանեն դպրոցները քաղաքականությունից, թող դպրոցները չլինեն ընտրական տեղամաս: Ըստ տնօրենի՝ սխալ են այն մեկնաբանությունները, թե այս դպրոցում աշխատում են ստրուկի հոգեբանությամբ:

Խոսելով այն մասին, որ ֆիզկուլտուրայի ուսուցչի դեմ ստորագրահավաք էր ընթանում՝ նրան հեռացնելու համար, Ռուզան Ազիզյանն ասաց, որ նման բան չկա:

«Դուռը բացել է, առանց ինձ ասելու մարդկանց լցրել է ներս, քաոսային իրավիճակ է ստեղծվել: Սա ինքնապաշտպանության ձև է, մտածել է, որ իրեն կհեռացնեմ դպրոցից»,- նշեց տնօրենը:

 


13:18

Դպրոցի աշակերտները «Ազիզյան, դուրս արի» վանկարկումներով բարձրացան աշխատասենյակի մոտ: Մի քանի րոպե ակցիայի մասնակիցները կոչեր հնչեցրին, բայց տնօրեն Ռուզան Ազիզյանն այդպես էլ դուրս չեկավ:


Քիչ հետո աշակերտներից երկու հոգու ծնողներն ու մի ուսուցիչ եկան ու երեխաներին տարան աշխատասենյակի մոտից: Նրանք ասացին, որ աշակերտներն իրավունք չունեն այդտեղ բղավել և փակեցին դպրոցի տնօրենի աշխատասենյակի դուռն ու թույլ չեն տալիս, որ ակցիայի մասնակիցներն էլ մտնեն ներս:


«Ես ուղղակի աշակերտ եմ, իմ իրավունքն է, ինչը ճիշտ է, ես դա եմ անում: Նման բան չի կարող լինել, դուք գալիս եք մի մարդու վրա, ով չի կարող… »,- ասաց Էրիկան, ով ևս փակել է Ռուզան Ազիզյանի աշխատասենյակն ու թույլ չի տալիս, որ իր ընկերները մտնեն:


------------------------------


Երևանի Մոնթե Մելքոնյանի անվան թիվ 11 դպրոցի աշակերտներն ու ուսուցիչները պահանջում են տնօրենի հրաժարականը: Նրանք նշում են, որ դպրոցի տնօրեն Ռուզան Ազիզյանը փորձել է թույլ չտալ իրենց մասնակցել Նիկոլ Փաշինյանի նախաձեռնած՝ իշխանությունների դեմ տարվող շարժամը:

Ուսուցիչներին ու աշակերտներին աջակցելու էին եկել շարժման մասնակիցներ՝ Դանիել Իոաննիսյանը, Անահիտ Բախշյանը, Դավիթ Խաժակյանը և այլք:

«Մենք դիմելու ենք քաղաքապետին՝ օր առաջ այս տնօրենին հեռացնելու համար: Ակնհայտ է, որ նա իրավիճակին չի տիրապետում, արել է այնպիսի արարանքեր, որ որևէ մեկն իրեն չի ներելու: Մինչև քաղաքապետին դիմելը նա հնարավորություն ունի գրել հրաժարականի դիմում»,- այս մասին հայտարարեց Դավիթ Խաժակյանը:

Դպրոցի ֆիզկուլտուրայի ուսուցիչն էլ պատմեց, որ շարժման օրերից մեկի ժամանակ դպրոցի դուռը փայտե իրով փակվել է, որպեսզի աշակերտներն ու ուսուցիչները չմասնակցեն դասադուլի ու գործադուլի:

«Դուռը փակ էր, չէին կարողանում դուրս գալ աշակերտները: Փայտից մեծ բան էր դրվել, որ դուրս չգան: Այնինչ ուսուցիչներն ուզում էին գնալ, մասնակցել ակցիային, ես էլ գնացի ու բացեցի: Հետո իմ դեմ ստորագրահավաք էին անցկացնում, բայց չստորագրեցին»,- ասաց ուսուցիչը:

Ընթացքում պարզվեց, որ կենսաբանության ուսուցիչ Նալբանդյանը, մի քանի աշակերտի խոսքով, հարվածել է իրենց և վիրավորել: 

Երբ այդ ուսուցիչը դուրս եկավ, շարժման մասնակիցները փորձում էին հասկանալ, թե արդյոք նա խփել է աշակերտներին, նման արտահայտություններ արել է: Բայց տեղի ունեցավ միջադեպ, վերջինս բավական նյարդայնացած դուրս եկավ դպրոցից: Աշակերտներն ասացին, որ ձայնագրություն ունեն:

Ներկայումս դպրոցի երեխաները բակում վանկարկում են «Ազիզյա՛ն, դո՛ւրս արի», պահանջում են, որ տնօրենը պատասխանի իր արարքների համար: