Շուշիի ազատագրումը բեկում մտցրեց Արցախյան պատերազմի մեջ, որից հետո հայկական բանակը հաղթանակը հաղթանակի հետևից տարավ: Tert.am-ի հետ զրույցում այս մասին ասաց պաշտպանության նախկին փոխնախարար, գեներալ Գագիկ Մելքոնյանը: «Ինչպես Շուշիի ազատագրումը, այնպես էլ այս հեղափոխությունը անհավատալի էին, բայց մենք արեցինք և ապացուցեցինք, որ հզոր ազգ ենք»,- նշեց նա:

- Արցախյան պատերազմի ժամանակ ի՞նչ էր Շուշիի ազատագրումը, այն ի՞նչ նշանակություն ունեցավ:

- Շուշիի ազատագրումը մեզ համար պատմության մեջ մի նոր էջ բացեց: Այն բեկում մտցրեց պատերազմի մեջ, և Շուշիի ազատագրումից հետո սկսվեց հաղթանակը հաղթանակի հետևից:

- Շուշիի ազատագրման օրերին դուք որտե՞ղ էիք:

- Շուշիի ազատագրման ժամանակ մենք՝ Հատուկ գունդը, գտնվում էր Շահումյանում:

- 1992 թ. մայիսի 7-ին, 8-ին հավատո՞ւմ էիք, որ Շուշին կազատագրվի, ինչպե՞ս ստացվեց այդ ամենը:

- Շուշին անառիկ ամրոց էր, անհավատալի էր թվում Շուշիի գրավումը, բայց այդ ժամանակ ամբողջ ազգը ոտքի էր կանգնած: Հիմնականում երիտասարդներն էին, այն տարիքում էինք, ինչ տարիքում որ այսօրվա հեղափոխություն կատարողներն են: Ես կարող եմ համեմատականներ տանել այսօրվա հաղթանակի և Շուշիի ազատագրման հետ, որովհետև այսօրվա վիճակն էլ անհավատալի էր, որ այս իշխանությունները կարող են հեռանալ: Անհավատալի էր, որ կփոխվի, բայց նորից միասնական ուժերով վճռական պահին հայը ոտքի կանգնեց: Հայի ոգին շատ ուժեղ է, մենք մի քանի անգամ համոզվեցինք դրանում: Նույն հաղթանակը մենք տարանք այսօր: Չնայած մի քիչ լավ համեմատություն չէ, որ մեր ազգի ներսում սա համարում ենք հաղթանակ, բայց փաստացի սա հաղթանակ էր կոռուպցիայի, ապաշնորհ կառավարության նկատմամբ:

- Կուզեի նաև «Հարսանիք լեռներում» օպերացիայի մասին պատմեիք: Ինչպե՞ս եք գնահատում դա՝ որպես ռազմական ոլորտի մարդ:

- Դա ռազմագիտության դասական օրինակներից է, փայլուն ծրագրված օպերացիա էր, փայլուն հաղթանակ էր: Օպերացիան մշակվել էր ընդհանուր ուժերով, մենք բանակ ունեինք, գլխավոր շտաբ կար, այնտեղ կային Արկադի Տեր-Թադևոսյան, Գուրգեն Դալիբալթայան, Ֆելիքս Գզողյան և շատ այլ հրամանատարներ:

- Նշեցիք, որ բեկում եղավ պատերազմի մեջ, ազգային զարթոնք էր այդ օրերին, նաև համեմատեցիք այսօրվա հեղափոխության հետ: Արցախյան շարժումից, Շուշիի ազատագրումից հետո ժողովուրդը մշտապես դժգոհել է իշխանություններից՝ սոցիալական վատ պայմանների, կոռուպցիայի, անարդարության համար: Ինչպե՞ս անել, որ այս օրերին տեղի ունեցած հեղափոխությունից հետո նույնը չկրկնվի:

- Ես հավատացած եմ, որ մենք ունենալու ենք մեր երազած Հայաստանը: Մի նոր Հայաստան ենք ունենալու՝ ուժեղ տնտեսությունով և քաղաքականությունով: Անցածը մեզ համար դաս է լինելու: Ներկայիս իշխանությունները չեն կարողանալու ինչ-որ բան անել, ինչպես նախկինները, որովհետև ժողովուրդը մատը պահել է զարկերակի վրա: Ժողովուրդն է հաղթել, ժողովուրդն էլ պահելու է այդ հաղթանակը, իր իշխանությունը: Համոզված եմ, որ նույն սխալները չեն կրկնվի: Եվս մեկ անգամ հայ ժողովուրդը ապացուցեց, որ ինքը հզոր է, իր դեմ խաղ չկա: